Epaddi 8
Efunelo Ya Mulugu Enofuna Osoriheya
1, 2. Mulugu onkosaga dhavi masasanyedho a ogomihana goi?
OLAMULELA wa athu abene asadduwile vina wa adomonyo onokwekwethaga nlogo na athu oromana wale mpaka mazana a vyaka. Masiki dhaene, Mulugu kampwazaga goi dhehu. Mbwenye, mwari mwa mazana aba otene a vyaka, iyene onokosaga masasanyedho wila aafurule athu mmadani mwa obure vina goi.
2 Nsaka na osadduwela mu Edeni, Mulugu wahiroma ovuhula efunelo yaye ya wita nlamulelo nthene nigasaddulile elabo eji bikala murala wa paraizu wila athu akalegemo. (Wita 3:15) Musogorhomwa, ninga munamukathi wa makamaka wa Mulugu, Yezu wahikosa nlamulelo nthi na Mulugu ninfuna odha, ninga musorho wa olaleya waye. Baloga wila bunakale njeedheelo nimodha bahi na nlogo na athu.—Daniyel 2:44; Mateu 6:9, 10; 12:21.
3. Yezu otxemerhile dhavi nlamulelo ntho ninfuna odheela elabo ya vati, nanda sabwa yani?
3 Yezu watxemerhile nlamulelo ntho ninda na Mulugu, okala “omwene wa odhulu,” vowila nthi ninfuna nilamulelege ovenyedha odhulu. (Mateu 4:17) Iyene vina wahitxemerha nlamulelo nthi okala “omwene wa Mulugu,” vowila ddi Mulugu Mwinyaya. (Luka 17:20) Mwari mwa mazana a vyaka Mulugu wahawubuweliha anamaleba aye wila alebe mavuhulo mwaha wa abale anakose epaddi ya nlamulelo ntho vina esile dhinfuna okosa nlamulelona.
Mwene Muswa Wa Elabo Ya Vati
4, 5. Mulugu walagihile dhavi wila Yezu ddi Mwene waye onimurumeeliye?
4 Othamagela vyaka matxikwi meeli nsaka na mundduni, ddi Yezu wasorihile mavuhulo menjene mwaha wa oddule agakalile Mwene wa Omwene wa Mulugu. Iyene wahooniha wila ddi yene wasakuliwe na Mulugu wila akale Mulamuleli wa nlamulelo nthile na odhulu ninfuna olamulela nlogo na athu. Nanda mumaleliye okwa, Mulugu ohinvenyihedha Yezu egumi odhulu ninga muya wa guru vina yothanddiwa ehinkwa. Ovenya waye mu okwani wahooniwa na anamoona enjene.—Merelo 4:10; 9:1-9; Roma 1:1-4; 1 Korinto 15:3-8.
5 Mumaleliye Yezu “okala vamodha na Mulugu,” obe ‘okala omononi woja wa Mulugu.’ (Ahebreu 10:12, Tradução do Novo Mundo) Wenewale iyene wahijeedha mudhidhi ogekiwiye na Mulugu wila alabe ninga Mwene wa Omwene wa odhulu wa Mulugu. Eji yahisoriha nivuhulo nili va Masalmo 110:1, veneva vanloga Mulugu dhahi: “Kagilati o mononi waga wa oja, mpaka miyo wawika amwiddani awo ninga vonyigala manyalo awo.”
6. Yezu walagihile dhavi wila wanfanyeela okala Mwene wa Omwene wa Mulugu?
6 Bali velaboni ya vati, Yezu wahilagiha wila wanfayeela mpaddo obu. Masiki na ofarafariwa, iyene wahisakula okaanavi nroromelo naye namukaaneliye Mulugu. Sabwa ya okosa ejilene, iyene wahilagiha wila Satana walogile othambi mwalogeliye wila kuli muthu agamuroromeli Mulugu agehiwa. Yezu, muthu wowakwana, ‘Adamu wanawili,’ wahilagiha wila Mulugu kaavonyile na wathandda athu owakwana.—1 Korinto 15:22, 45; Mateu 4:1-11.
7, 8. Dhilobo gani dhaderetu dhikosile Yezu bali velaboni ya vati, nanda iyene walagihile okala eni?
7 Mulamuleli gani wakosilege oderetu vaddiddi ninga mwakoseli Yezu mwari mwa vyaka dhiñgonovi nsaka na orumiwi waye? Na ovahiwa ewodhelo na muya wokoddela wa Mulugu, Yezu wahavulumutxa aredda, wahawogola aragali, aliba ohoona, aliba ohiwa vina aliba ohiloga. Wahifiyedha vina wavenyiha akwile! Wahilagiha na muthengo muñgonovi esile dhinfuniye okosela nlogo na athu mwilaboni motene, agawela vampaddoni va Omwene.—Mateu 15:30, 31; Luka 7:11-16.
8 Yezu wahikosa oderetu vaddiddi bali velaboni ya vati mpaka namasunza waye Joau ologa dhahi: “Yezu ohira matikiniho mena menjene ahilebiwe munivuruni-mpu. Ddinowubuwela wi kolebiwa etene, manivuruyá agafwanyele olebiwa, mwilaboni kagakwanilemo.”—Joau 21:25.a
9. Athu a murima wororomeleya adhowelani gwe wa Yezu?
9 Yezu wali muthu wowazuzumela akwaye vina wa nthebwa, wannakwela vaddiddi athu. Iyene wahakamiha ayelegi vina athu abale anyigaliwa, mbwenye kaakaaneli nsakulano areeli obe ana mpaddo wothukuwa. Athu a murima wororomeleya ahakulela niwobelo nokwela na Yezu mwalogeliye dhahi: “Nyuwo motene mulemile, mukukumuwile mudhe vali miyo, ddinoulibihani. Mpwathele muthorho waga, sunzaní dhinira miyo, ddinna murima wofwasa, wokurumuwa. Dhahene munofwanya osanzaya. Kanga yaga kinwoma, muthorho waga kunlemela.” (Mateu 11:28-30) Athu animova Mulugu aahidhowa gwe wa iyene nanda aahijeedhela nlamulelo naye.—Joau 12:19.
Alamuleli Akamihedhi
10, 11. Bani anfuna olamulela elabo ya vati vamodha na Yezu?
10 Ninga malamulelo a omuthu munkaanelani akamihedhi ansogorhela mabasa, Omwene wa odhulu wa Mulugu vina ohikaana. Yezu balivi, athu ena anfuna akamihedhe olamulela elabo ya vati, sabwani Yezu waharoromeliha amarho aye andaniletxiyena wila awene agahilamulela na iyene nlogo na athu ninga amwene.—Joau 14:2, 3; Ovuhulela 5:10; 20:6.
11 Dhaene, vamodha na Yezu, muthengo muñgonovi wa athu anovenyihedhiwa okalawo odhulu. Abene bankosa epaddi ya Omwene wa Mulugu obwene onfuna odheelana nlogo na athu mareeliho a mukalakala. (2 Korinto 4:14; Ovuhulela 14:1-3) Noona, mwari mwa masaka aba otene, Yehova onowimetxaga matibeelo a nlamulelo nthene ninfuna odheelana nlogo na athu mareeliho a mukalakala.
Olamulela Wa Ofuru Onfuna Ogome
12, 13. Ovanene Omwene wa Mulugu ovikomeli okosa eni?
12 Mu vyaka zana dhivirile Mulugu oheeddiha dhilobo dha velaboni ya vati. Ninga munfunela osekeserha Epaddi 9 ya brochura nthi, mavuhulo a Bibilia anlagiha wila Omwene wa Mulugu obwene onlamuleliwa na Kristu wimetxiwe yaka ya 1914 nanda ovanene ohivikoma wila otolotxe elabo eji yotene ya Satana. Omwene obu ohimala ovikoma wila ‘wapuranye amwiddani a [Kristu].’—Masalmo 110:2.
13 Ji sabwa ya ejene enlogela nivuhulo nili va Daniyel 2:44 wila: ‘Nsaka ninalamulelege amwene aba [aliwo ovanene] Mulugu wa odhulu onela wimetxa omwene [odhulu] obwene txipo ohinadhe otolotxiwa, vina olamulelawa onddimuwa kunavahiwe nlogo nina [olamulela wa omuthu txipo kunathiyiwe vina olamulela]. Obu [Omwene wa Mulugu] onela onyenyedha mamwene aba otene bakala dhipathaso dhipathaso vina bagomiha, nanda omwene obu onela okala vampaddoni na mukalakala.’—Revised Standard Version.
14. Dhaderetu gani dhinfuna okalawo sabwa ya ogoma wa olamulela wa omuthu?
14 Malamulelo otene ahinimugayela Mulugu bamalile otolotxiwa, olamulela wa Omwene wa Mulugu velaboni ya vati onela wakwanela. Nanda sabwa ya Omweneya olamulelaga ovenyedha odhulu, obu txipo kunda oviriganihiwaga na athu. Ewodhelo ya olamulela enela okala okule walani omaromowene, odhulu, na Mulugu. Vowila olamulela wa Mulugu onela wañganela elabo yotene ya vati, kunakale muthu onapupurutxiwe na marelijiau ahili a ebaribari obe mafilozofiya a omuthu abene ahimpurela elobo vina masunziho a politika. Kunathiyiwe wene nne elobo modha mwa esene okalawo.—Mateu 7:15-23; Ovuhulela, kapitulu 17 mpaka 19.
[Dhowenjedhedha dhili mutxiddo]
a Wila ononelemo mowakwanela miselu dhosekeserhiwa dha egumi ya Yezu, koona nivuru O Maior Homem Que Já Viveu, nilebiwe yaka ya 1991 na Watchtower Society.
[Foto vanikukuni 18]
Yezu bali velaboni ya vati wahavulumutxa aredda vina wahavenyiha akwile wila oonihe esile dhinfuniye okosa mwilaboni eswa
[Foto vanikukuni 19]
Omwene wa Mulugu wa odhulu onela otolotxa makalelo otene a olamulela okwene ohinimugayela iyene