Mohigoneela Goi Yotene Enela Ogoma!
Mudhidhi mwina mwigumini yawo txino weyo ohivuza: ‘Okaleli eni goi dhaene?’ Mwari mwa vyaka matxikwi na matxikwi, nlogo na athu nihoona goi vaddiddi na koddo, oyelega, ngovi, opanga, otuwa oligana, maredda, vina okwa. Vyaka zana dhivirile nlogo na athu nihoona goi vaddiddi opitha munddunimwa. Ngani goi eji yotene enela ogoma?
Yowakula empangarhaza jawila indde, oziwa wila goi enela ogoma, nanda enela ogoma mohigoneela, enolibiha vaddiddi! Nzu na Mulugu, Bibilia, ninloga wila: ‘Muthu wabure kanda okalawo viina . . . Mbwenye akurumuwi anela okaana elabo ya vati vina anela ojavo na winjiva wa murenddele.’ Na mudhidhi mungasi? ‘Aligani anela okaana elabo ya vati vina anela okalamo na mukalakala.’—Salmo 37:10, 11, 29.
Mulugu agamala ogomiha obure vamodha na goi, elabo ya vati enela osadduliwa bikala paraizu. Venevo athu anela owodha okalawo na mukalakala na egumi yowakwana vina na osanzaya. Nzu na Mulugu nihithaga ologa wila: ‘[Mulugu] onela okuputha mmentoni mwawa mintori dhotene, kunakale viina okwa, nne vina olila, nne okuwa, nne wiwa opa.’—Ovuhulela 21:4.
Mwilaboni ejo eswa, masiki abale akwile anela okalihiwawo wili, wila ajevo mareeliho aba: ‘Onela okala ovenya mu okwani wa aligani vina ahiligani.’ (Merelo 24:15) Ji sabwa ya ejene yampangeli Yezu Kristu panga oddule watxinuwile, oddulene wamuroromeli iyene: ‘Weyo onela okala na miyo mParaizu.’—Lukas 23:43.
Goi Eromeli Eni?
Vowila Mulugu wafuna wila nlogo na athu nikaane musogorho mpo motikiniha, ki iyene othiyeli eni goi oroma? Iyene onthiyela eni goi eji okalagawovi na mudhidhi wolapa dhaene?
Mulugu mwamuthanddeliye Adamu na Eva, Iyene waakosile na maningo vina mubuwelo wowakwana. Iyene wahawika mmunddani wa paraizu vina wahavaha mabasa oohagalaliha wila akosege. Bibilia onloga dhahi: ‘Mulugu wahoona dhotene dhakosiliye, nanda dhali dhaderetu vaddiddi.’ (Wita 1:31) Awene komwiwelela Mulugu, agahabaala ana oowakwana, nanda elabo yotene ya vati egahikala paraizu, mwenemwa mugakalege athu na mukalakala na murenddele vina na osanzaya.
Mulugu wahinvaha Adamu na Eva mvaho waderetu vaddiddi wa ofuru wa osakula, ofuru obu wali epaddi ya muthu wa omaningoni. Awene kagakalile ninga makina ahina ofuru wa osakula. Masiki dhaene okalagavi oosanzaya ogagayeli awene olabihedhaga na mukalelo waderetu ofuru wawa wa osakula—wiwelelaga malamulo a Mulugu. Ninga mulogeli Mulugu wila: ‘Miyo Yehova, ddili Mulugu wawo, Oddule onusunziha opuramo, Oddule onukosiha onyigala mu dila munfanyeela weyo weedda.’ (Izaia 48:17) Olabihedha wabure ofuru wa osakula ogahitota makathamiho, vowila athu kaathanddiwe wila eeddeleyege deretu s’ohimugayela Mulugu. Bibilia onloga dhahi: ‘Kayo muthu wa maningo onfanyeela dila yaye. Kayo ya muthu wila iyene eeddihege tharho yaye.’—Jeremiya 10:23.
Mokubanyeya, amambali ehu ooroma oobuwela wila kayali yofuneya omugayela Mulugu, nanda masiki dhaene awene agaheeddeleyavi deretu. Mbwenye muvanyelani olamula wa Mulugu, awene aahiyeleela nikamihedho naye vina aahiyeleela wakwana wawa wa maningo. Dhaene aahiroma onyowa mpaka omagomelowa awene wuluvala vina okwa. Sabwa yawila iyo nili ana awa, iyo nihikaana ohakwana wawa vina ninokwa.—Roma 5:12.
Mwaha Wa Makamaka—Bani Onfanyeela Olamula?
Mulugu okooddeli eni watolotxa Adamu na Eva nanda baathandda athu ena? Sabwa ya olamula onddimuwa wa Mulugu wa elabo yotene, kuloga dhahi, ofanyeela waye olamula, wahivaaneliwa. Nivuzona nali nthi: Bani onfanyeela olamula, vina olamula okalile kwa ani? Musogorho: Athu agaheeddeleya deretu kowiliwa Mulugu kanalamula? Sabwa yawila Mulugu wahathiyedha athu mudhidhi wowakwana wila alamulege s’ohigayela olamula waye, Mulugu agahithonga na mukalakala akala athu agaheeddeleya deretu s’ohilamuliwaga na iyene, obe ageeddeleyi deretu koovilamulaga woka. Mudhidhi wathiyedhiwani wanfanyeela wakwana wila athu atagihe mikalelo dhotene dha osogorhela nlogo modheela olabihedha politika, weeddiha nlogo, mpinddu, vina na relijiau s’oheeddihiwa na Mulugu.
Ki yodhavoya txini? Vyaka matxikwi na matxikwi a okalawo wa athu dhinnipanga wila onokalaga goi vaddiddivene. Mu vyaka zana dhivirile, nlogo na athu nihoona goi enddimuwa vaddiddi ehinakalagawo. Athu matxikwi na matxikwi ahipiwa mu Koddoni Yanawili ya Elabo Yotene. Okwaranya athu miliau 100 ahipiwa mu koddoni. Opanga na otimbwini ohimwadheyela mpaddi wotene. Ozugunuwa elabo yotene athu anolabihedha mirobwe dhinnonga maningo vina ogogo. Maredda anraviwa mu ogonihanani anowapakelavi athu. Makumi a matxikwi a athu anokwa kadda yaka sabwa ya dala vina maredda. Mpaddi wotene egumi ya murala vina meeddelo aderetu ahinongeya. Kuli nlamulelo na omuthu ninwodha ogomiha makathamiho aba. Kuli nne nlamulelo nimodha niwodhile opemberha wuluvala, maredda, vina okwa.
Mukalelo wa nlogo na athu oli wene ninga mwathageli ologa Bibilia mwaha wa masaka ehu. Nzu na Mulugu ninotonya nsaka nehu ninga ‘masiku oomariha’ a elabo eji, abuwene agakalilewo ‘midhidhi dhorutxa dhoyima weeddanawa.’ Nanda ninga mwalogeli wene Bibilia, ‘athu abure vina aliba onyengetha, anela odhowa bagathabwavi.’—2 Timoteo 3:1-5, 13.
Ogoma Wa Goi Oli Vakukuvi
Mitonyo dhotene dhinolagiha wila ninowaddamela omagomo wa goi yoonile athu sabwa ya okoodda omugayela Mulugu. Ehimala wooneya wila olamula wa athu s’ohimugayela Mulugu txipo kuneeddeleya deretu. Onwodha odhana murenddele, osanzaya, egumi yowakwana vamodha na egumi ya mukalakala ku olamula wa Mulugu bahi. Noona mudhidhi othiyeli Yehova obure vamodha na goi onowaddamela omagomowa. Mohigoneela Mulugu onela ogwaddela makathamiho a athu modheela otolotxa elabo eji yotene enkoodda osoriha esile dhinroromelihiwa.
Nivuhulo na Bibilia ninloga dhahi: ‘Mmasikuni a amwene abale [malamulelo aliwo ovanene a omuthu] Mulugu wa odhulu onela wimetxa omwene [odhulu] txipo ohinadhe otolotxiwaga. . . . Onela watxila, vina wagomiha amwene aba [malamulelo a ovanene] otene, nanda omwene obu onela wimela na mudhidhi wohimala.’ (Danieli 2:44) Wiyelihedhiwa wa olamula onddimuwa wa Yehova, ofanyeela waye wa olamula, modheela Omwene waye wa odhulu thi nsunziho noroma na Bibilia. Bagathagela ologa epaddi ya makamaka ya ezinddiyelo ya ‘masiku oomariha,’ Yezu walogile dhahi: ‘Bili eji yaderetu ya omwene enela olaleyiwa velaboni yotene ya vati enkaliwa, mwa onamoona wa dhilabo dhotene; agamala magomo anela ofiya.’—Mateus 24:14.
Omagomo onadhe mudhidhi gani, bani onaviluwe? Bibilia onowakula: ‘Athu oonyaala banakale velaboni ya vati vina abale ahina muladdu banathiyiwe veneva. Mwaha wa athu abure, awene anela otolotxiwa kakamwe velaboni ya vati.’ (Vimarya 2:21, 22) Athu oonyaala ba abale ansunza vina ankosa efunelo ya Yehova. Yezu Kristu walogile dhahi: ‘Eji entapulela egumi ya mukalakala, wila akaane eziwelo yenyu, Mulugu mmodha bahi wa ebaribari, na oddule omurumile nyuwo, Yezu Kristu.’ (Joau 17:3) Indde, ‘elabo enovira . . . , mbwenye oddule onkosa efunelo ya Mulugu onela okalawo na mukalakala.’—1 Joau 2:17.
Ogahikale ntonyihedho ninagu, Malebo ali mpu athukuliwe mBibiliani mwa Tradução do Novo Mundo das Escrituras Sagradas—Com Referências wa elogelo ya ovanene.