Mulugu Onttiyela Eni Goi Okalagawovi?

1, 2. Goi gani engumana na attu ovanene, bigattukulela attu enjene okosa mavuzo gani?

MUVIRELI koddo yowopiha mmuruddani dhahi womala onongiwa na koddo, attu ahaali anyakoddo matxikwi na matxikwi a ayana na aima abene aapiwe aahitibeeliwa mu nttoloni nimodhene, nttene naarijiwe na migimanyo dhing’ono. Kadda mwigimanyo wahilebiwa dhahi: “Sabwa yani?” Midhidhi dhiina ntti nivuzo na opa vaddiddi wa attu otene. Na okubanya attu anovuza amudhi awa ahina muladdu agakwa na koddo, ngovi, maredda, obe opanga, numba dhawa dhigatwiwa, obe na mukalelo mwina agafanyiwa goi yohilogeya. Awene anfuna aziwe sabwaya efanyeliwani ntowa ninga nttene.

² Mulugu onttiyela eni goi okalagawovi? Akala Yehova Mulugu ddwa guru dhotene, ddokwela, ddwa zelu, vina ddoligana, ki elabo edhaaleli eni na owogo vina ohiligana? Weyo wahiromaga otikina mwaha wa dhilobo esi?

3, 4. (a) Txini enlagiha wila kayo yabure ovuza sabwa enttiyela Mulugu goi okalagawovi? (b) Yehova oniwamo dhavi mwaha wa obure vamodha na goi?

³ Koddi jabure ovuza sabwa enttiyela Mulugu goi okalagawovi? Attu eena anokubanya yawila okosaga mavuzo ninga abene ontapulela wila awene kana nroromelo nowakwana obe yawila awene kanimuriha Mulugu. Txibarene ogamwengesa Bibilia, weyo onela woona wila attu oororomeleya, aamova Mulugu aahikaana mavuzo ooligana na aba. Motagiha, namavuhula Habakuk wahinvuza Yehova: “Munddonihedhetxa nni dhabure, oku nyuwo mukalelaga wang’anavi”? ‘Vina ki okaleli eni waka vina otimbwini vamentoni vaga, vina ki vakaleli eni wakulana, ki magudulano antitedheliwa eni?’​—Habakuk 1:3.

⁴ Koddi Yehova wahimunyanyuwela namavuhula oddu wororomeleya Habakuk sabwa ya okosa mavuzo aba? Nne. Ottiya eji, Mulugu wahitaganyiha mBibiliani wovudheeleliwa mazu a Habakuk. Vina Mulugu wahimukamiha ononelamo deretu dhilobodha vina ogumela nroromelo nddimuwa. Yehova onfuna akose yakakene na weyo. Kobuwela, Bibilia onsunziha wila: ‘iyene onowutanaala.’ (1 Pedro 5:7) Mulugu onowidda obure vina goi entotani opitta muttu muttuvi. (Izaiya 55:8, 9) Ki sabwa yani mwilaboni mukala goi vaddiddi?

OKALELI ENI GOI VADDIDDI DHAHENE?

5. Midhidhi dhiina sabwa gani dhinvahiwa wila dhitapulele goi ya attu, mbwenye Bibilia onsunziha eni?

⁵ Attu a relijiau dhottiyana ttiyana ahidhowa wa asogorheli awa a relijiau vina wa anamasunziha awa wila avuze sabwa ekaleliwo goi vaddiddi. Wili wili, yowakulaya jawila goi eji efunelo ya Mulugu nanda yawila wale vaddiddi iyene wahittonga dhilobo dhotene esene dhigapadduwile, vamodha na mapadduwo a ntowa. Attu enji ampangiwa wila dila dha Mulugu esi singaningo obe wila iyene onowatotela attu okwa​—masiki vina aima​—wila akale na iyene odhulu. Ninga musunzeliwe, txibarene, Yehova Mulugu, txipo kantota ejile eli yabure. Bibilia onloga wila: “Mulugu kanira-wene dhohifwanyelela, Namawodha-wodha kanira dhokoromana.”​—Job 34:10.

6. Attu enji ankosela eni yovirigana ya ompwatteliha Mulugu muladdu sabwa ya goi ya mwilaboni?

⁶ Weyo onoziwa sabwa enkosela attu yovirigana ya ompwatteliha Mulugu muladdu sabwa ya goi yotene ya mwilaboni? Dila dhinji, awene anompwatteliha muladdu Mulugu Wa Guru Dhotene sabwani awene anoona ninga iyene ddili mulamuleli wa txibarene wa elabo eji. Awene kanziwa ebaribari eji yohirutxa mbwenye ya makamaka ejene ensunziha Bibilia. Weyo ohisunza ebaribari eji mu Kapitulu 3 ya nivuru ntti. Mulamuleli wa txibarene wa elabo eji ddi Satana Ddiabo.

7, 8. (a) Elabo enlagiha dhavi omuttu wa mulamuleliya? (b) Ohakwana wa attu vamodha na ‘mudhidhi na rurumutxa’ ontota dhavi goi?

⁷ Bibilia onologa mowiweya: ‘Elabo yotene eli mmadani mwa wabure.’ (1 Joau 5:19) Weyo ogatanaalela eji, kina ntapulelo? Elabo eji enlagiha omuttu wa yottanddiwa ya omuyani yohooneya, ejene ‘empupurutxa elabo yotene ya vati enkaliwa.’ (Ovuhulela 12:9) Satana iyene muwogo, munyengetti, vina mutabala. Noona elabo, eli mutxiddo mwa nipakelo naye, ehidhaala na owogo, onyengetta vina otabala. Eji ji sabwa yoroma ekaleliwo goi vaddiddi.

⁸ Sabwa yanawili ekaleliwo goi vaddiddi jawila, ninga mulogeliwani mu Kapitulu 3, nlogo na attu ttohakwana vina ttottega oromana osadduwela wa mmunddani wa Edeni. Attu oottega anotamela okosa kani wila alamule, nanda eji enotota koddo, makattamiho, na goi. (Kohelét 4:1; 8:9) Sabwa yanoraru enkalelawo goi ja ‘mudhidhi na rurumutxa.’ (Kengesa Kohelét 9:11.) Mwilaboni s’ohikaana Yehova ninga Mulamuleli wobarela, txino attu anowoona goi sabwani anokala va mburhoni vohifanyeela vina mudhidhi wohifanyeela.

9. Ninfanyeelela eni okaana ebaribari yawila Yehova ohikaana sabwa yaderetu ya ottiya goi okalagawovi?

⁹ Enonipangarhaza oziwa wila Mulugu kantota goi. Iyene kana muladdu sabwa ya koddo, opanga, makattamiho, obe vina ngovi dha mwilaboni esene dhinatotela attu goi. Masiki dhahenevi ninfuna niziwe, Yehova onttiyela eni goi eji yotene okalagawovi? Akala iyene ddwa Guru Dhotene, iyene ohikaana ewodhelo ya ogomiha goi eji. Sabwa yani enkooddeliye olabihedha ewodhelo eji? Mulugu wokwela oddwene omuziwile iyo ohikaana sabwa yaderetu vaddiddi.​—1 Joau 4:8.

MWAHA WADERETU OHITATAMULIWA

10. Satana watoteli waganyedha eni, nanda na mukalelo gani?

¹⁰ Wila nizinddiyele sabwa enttiyela Mulugu goi okalagawovi, ninofanyeela wubuwela mundduni mudhidhi waromile goi. Satana mwaatotihedhiye Adamu na Eva omusadduwela Yehova, nivuzo na makamaka nahitatamuliwa. Satana kaatotile waganyedha mwaha wa ewodhelo ya Yehova. Vina Satana ohiziwa yawila ewodhelo ya Yehova kina maddile. Ottiya eji, Satana watoteli waganyedha ofanyeela wa olamula wa Yehova. Modheela omuloga Mulugu okala muttambi oddwene onakooddiha dhilobo dhaderetu alamuliwi aye, Satana wahimmagedha Yehova wila iyene mulamuleli wabure. (Kengesa Wita 3:2-5.) Satana walogile wila nlogo na attu nigahikala deretu s’ohikalawo nlamulelo na Mulugu. Oku wali obuddugela ottonga onddimuwa wa Yehova, ofanyeelela waye wa olamula.

11. Sabwa yani Yehova kaatolotxile asadduweli abale mu Edeni?

¹¹ Adamu na Eva aahimusadduwela Yehova. Txibarene, awene aalogile dhahi: ‘Iyo kanninfuna Yehova ninga Mulamuleli wehu. Iyo poddi ogana nanyene ejile eli yaderetu vina ejile eli yabure.’ Yehova agasasanyedhi dhavi mwaha obu? Iyene agaasunzihile dhavi dhottanddiwa dhotene dha zelu yawila asadduweli abale aahivirigana nanda yawila txibarene mukalelo waye wa olamula bukalile? Muttu txino onologa wila Mulugu kowatolotxa wene asadduweli abale nanda bakosa maromo maswa. Mbwenye Yehova wahiroma efunelo yaye ya odhaaliha elabo ya vati na ódhuli wa Adamu na Eva, nanda iyene wafuna wila awene akalege mparaizu wa velaboni ya vati. (Wita 1:28) Dila dhotene Yehova onosoriha dhifunelo dhaye. (Izaiya 55:10, 11) Eji egalivi, wattamagiha asadduweli abale mu Edeni kugaakulile mavuzo abale aatatamuliwe mwaha wa ofanyeela wa olamula wa Yehova.

12, 13. Kaladdaniha sabwa enimuttiyelaga Yehova Satana okala mulamuleli wa elabo eji nanda Mulugu waarumeeleli eni attu ovilamulaga.

¹² Ndoweni noone nladdaniho. Kobuwela wila namasunziha onowapanga anamasunza aye mukalelo wa okosa konta yorutxa. Namasunza wotxenjerha mbwenye wosadduwela ologa wila mukalelo wa namasunziha okosa kontaya bwabure. Wila alagihe, namasadduwela oddu onodidela wila iyene ohiziwa mukalelo waderetu wa okosa kontaya. Anamasunza eena anoona ninga iyene onoziwa, venevo awene vina okala asadduweli. Txini enfanyeela okosa namasunziha? Akala iyene onowattamagihedha otakulu anamasunza abale, anamasunza eena anoone dhavi eji? Awene kanarumeele wila namasunza oddule mukwawa vamodha na abale avitaganyihile na iyene baziwile? Anamasunza otene a gatta eji poddi otuwiwa nriho na namasunziha, bagatanaalela wila iyene onowova wila anooniwege ninga kanziwa. Ovano kobuwela wila namasunzihaya ohimuttiya namasadduwela oddule olagiha gatta ya anamasunza mukalelo ogaakosiliye kontaya.

¹³ Yehova onokosaga elobo yoladdana na ejene ekosile namasunziha. Kobuwela wila anamasadduwela mu Edeni kaali woka. Angelo matxikwi na matxikwi ela wang’ana. (Job 38:7; Daniyel 7:10) Mukalelo ogakosilena Yehova osadduwela okule ogahapatta vaddiddi angelo abale nanda musogorhomwa dhottanddiwa dhotene dha zelu. Ki Yehova okosile eni? Iyene onomuttiyaga Satana olagiha mukalelo ogalamuliye nlogo na attu. Vina Mulugu onowattiyaga attu ovilamulaga mutxiddo mwa mweddihedho wa Satana.

14. Opuramo gani onadhe sabwa ya ogana wa Yehova wa wattiya attu ovilamulaga woka?

¹⁴ Namasunziha mu nladdanihoni nehu ohiziwa yawila namasadduwela vamodha na anamasunza ali mpaddi waye kanziwa elobo. Mbwenye vina iyene onoziwa wila wattiyedha mudhidhi wila atagihe olagiha ejile eziwilani, gatta yotene enela opuramo. Anamasadduwela agapa, anamasunza otene oororomeleya anela woona yawila ddi namasunziha bahi onfanyeelela osogorhela gatta. Eji egamala, awene anela ononelamo sabwa enttamagihedhiwa kadda namasadduwela mu kambirhinya ya masunzo. Mwakakene, Yehova onoziwa wila attu otene oororomeleya vamodha na angelo anela opuramo modheela woona wila Satana vamodha na anamafara aye oosadduwela ahiviriganiha nanda yawila attu kanwodha ovilamula woka. Ninga Jeremiya wa wale, awene anela osunza ebaribari eji ya makamaka: ‘O, Yehova, ddiziwa wi muttu kahiye mwinya w’okalawo waye, kanwodha opima yeka ttarho dhaye.’​—Jeremiya 10:23.

SABWA YANI YEHOVA ATTIYA GOI OKALAGAWOVI NA MUDHIDHI WOLAPA DHAHENE?

15, 16. (a) Sabwa yani Yehova attiya goi okalagawovi na mudhidhi wolapa dhahene? (b) Sabwa yani Yehova kabareli dhilobo esi ninga opanga wowopiya?

¹⁵ Kito, sabwa yani Yehova attiya goi ogoneela dhahene? Nanda sabwa yani iyene kangomiha dhilobo dhabure wila dhihipadduwegevi? Indde, koona dhilobo biili dhigaakooddile okosa namasunziha wa nladdaniho nehu. Yoroma, iyene kagamukoddihile namasunza oddule wosadduwela ottwanyutxa ejile yaalogiye. Yanawili, namasunziha kagamukamihile namasadduwela ologa ejile eziwiliye. Na mukalelo wakakene, koona dhilobo biili esile dhaganile Yehova okoodda okosa. Yoroma, iyene kamukoddihile Satana vamodha na abale ali na iyene mwa otamela olagiha yawila awene ahiziwa. Ottiya mudhidhi ovira txibarene yali yofuneya. Mwa vyaka matxikwi na matxikwi a mapadduwo a attu, nlogo na attu nihitagiha mukalelo wotene wa ovilamula woka, obe nlamulelo na omuttu. Nlogo na attu nihidhowa vasogorho vang’onovi mpaddi wa siensia vamodha na dhipaddi dhiina, mbwenye ohiligana, oyelega, opanga, vamodha na koddo dhinottabwavi. Ovanene olamula wa omuttu ohooneya okala wovirigana.

¹⁶ Yanawili, Yehova kamukamihile Satana olamula elabo eji. Ninga motagiha Mulugu koobarela, opanga wotakala, kagele ovaha onamoona wawila anamasadduwela aahiziwa deretu? Mulugu kagaakosihile attu wubuwela wila txino attu poddi ovilamula woka s’ohikalavo ngovi? Yehova kokosa na mukalelo obu, agahikosa mpaddi wa ottambi. Txibarene, ‘kinwodheya Mulugu ologa ottambi.’​—Ahebreu 6:18.

17, 18. Txini enakose Yehova na dhabure dhotene esene dhipadduwile sabwa ya olamula wa attu vamodha na nipakelo na Satana?

¹⁷ Kito dhabure dhotene dhikosiwe mwari mwa osadduwela wogoneela womusadduwela Mulugu? Ninokosa deretu wubuwela wila Yehova ddwa guru dhotene. Vina, iyene poddi, vina onela ogomiha esile dhitotiwe na goi ya nlogo na attu. Ninga mumalelihu osunza, onongeya wa elabo yehu onela osasanyedhiwa modheela osadduliwa wa elabo ya vati bikala Paraizu. Esile dhitotiwe na ottega dhinela oburutxiwavo modheela ororomela mukutto wa yobolo wa Yezu, vina esile dhitotiwe na okwa dhinela osasanyedhiwa modheela ovenya mu okwani. Dhahene Mulugu onela omulabihedha Yezu ‘wila anonge mabasa a Ddiabo.’ (1 Joau 3:8) Yezu onela osoriha dhotene esi mmudhidhinimwa mofanyeelela. Iyo poddi ohagalala yawila iyene kakosile eji wale, sabwani ovilela waye ohinivaha gari ya osunza ebaribari vina ya omulaba iyene. (Kengesa 2 Pedro 3:9, 10.) Mudhidhi wakakene, Yehova onowatamela anamebedha a ebaribari vina onowakamiha ovilelana goi goivi ejene txino enapadduwela mwilaboni mpu mwa makattamiho.​—Joau 4:23; 1 Korinto 10:13.

¹⁸ Txino eena anotikina, ‘goi eji kigabareliwe kowiliwa Yehova Mulugu ohattandda Adamu na Eva na mukalelo wa awene okoodda osadduwela?’ Wila wakule nivuzo ntti, onofanyeela wubuwela mvaho wa makamaka obwene wuvahile Yehova.

WEYO ONALABIHEDHE DHAVI MVAHO OBU ODHILE WA MULUGU?

19. Mvaho gani wong’animela onivahile Yehova, nanda ninfanyeelela eni ovaha ttima?

¹⁹ Ninga moonelihu mu Kapitulu 5, attu aahittanddiwa na ofuru wa osakula. Weyo onoziwa yawila obu mvaho wa ttima vaddiddi? Mulugu wahikosa dhinama dhohengeseya, nanda esi dhineeddihiwetxa na eziwelo yobaaliwana. (Gano 30:24) Muttu ohisasanya makina abene asasanyedhiwe oloddaga mweeddihedho-mweddihedhovi. Kowiliwa Mulugu onittanddile dhahene nigahiziveliwa? Nne, nihiziveliwa okaana ofuru wa osakula okala mukalelo wa muttu onfunihu okala, mukalelo wa egumi onfanyeelihu ofara, vina omarho gani onfunihu wita, na dhilobo dhiina. Ninohagalala okaana muna ofuru ninga obwene, nanda ji ejene enfuna Mulugu wila iyo nijegevo.

20, 21. Na mukalelo gani onlabihedhihu deretu ofuru wa osakula, nanda ninfunela eni okosa ejene?

²⁰ Yehova kantanaala mabasa ankosiwa sabwa ya odideliwa. (2 Korinto 9:7) Wila niladdanihe: Txini egaamuhagalalihile vaddiddi mambali​—ku ologa wa mwana wawila “ddinowukwela” sabwa ya opangiwa ologa eji, obe ku ologa waye wofuna ondela mmirimani? Noona, nivuzo na makamaka tti ntti: Weyo onalabihedhe dhavi ofuru wa osakula obwene wuvahile Yehova? Satana, Adamu, na Eva ahilabihedha mwabure ofuru wa osakula. Awene aahimukoodda Yehova Mulugu. Ki weyo onakose eni?

²¹ Weyo ohikaana gari ya olabihedha deretu mvaho obu wotikiniha wa ofuru wa osakula. Weyo poddi ogumana na attu matxikwi na matxikwi abene eemelile mpaddi wa Yehova. Awene anomuhagalaliha Mulugu sabwani awene ahittukula mpaddi mwa olagiha wila Satana muttambi vina mulamuleli wabure wojomba. (Gano 27:11) Weyo vina poddi okosa ejene modheela osakula dila yaderetu ya egumi. Eji enela otapuleliwa mu kapitulu endawo.