Epaddi 11
Matibeelo A Elabo Eswa Anowimetxiwa Ovanene
1, 2. Mwa osoriheya nivuhulo na Bibilia, txini empadduwa vamentoni vehu kakamwe?
ELI vina yotikiniha jawila matibeelo a elabo eswa ya Mulugu anotibeeliwa ovanene kakamwe, masiki elabo eji yowuluvala ya Satana vammomorowani. Vamentoni vehu kakamwene, Mulugu onowasakulela athu mwari mwa dhilabo dhotene bagaakosa matibeelo a nlogo niswa ninfuna okala velaboni ya vati, nthene ninfuna ohala vamburoni va elabo eji yogawana ya ovanene. Mbibiliani, va 2 Pedru 3:13, nlogo nthi niswa nintxemerhiwa “elabo eswa.”
2 Nivuhulo na Bibilia ninloga vina dhahi: “Omagomelo wa masaka [nsaka nthi ninkalihuwo ovanene] . . . , malogo menjene anofiyawo eraga: ‘Ndhoweni niwele vamwangoni wa Nabuya [webedha waye webaribari], . . . iyene onere onisunziha dila dhaye, neddege mmikwasoni mwaye.’”—Izaiya 2:2-3.
3. (a) Nivuhulo na Izaiya ninsoriheya mwari mwa aani? (b) Nivuru nomariha na Bibilia ninloga eni mwaha wa ejene?
3 Nivuhulo nthi ninosoriheya nsaka na ovanene mwari mwa abale aniwelela ‘dila dha Mulugu vina aneedda mmikwasoni mwaye.’ Nivuru nomariha na Bibilia ninologa mwaha wa nlogo nthi na athu a dhilabo dhotene nthene ninkwela murenddele ninga “muthithi munddimuwa wa athu . . . àli a vilabo dhetene, mahimo etene, malogo etene, a vilogelo dhetene,” obali watxibarene wa elabo yotene abene animulaba Mulugu mowiwanana. Vina Bibilia onloga dhahi: “Aba, babale avirile mmasosoni manddimuwa.” Kuloga wi, anela oviluwa omagomo wa elabo eji yabure.—Ovuhulela 7:9, 14; Mateu 24:3.
Obali Watxibarene Wa Dhilabo Dhotene
4, 5. Obali wa elabo yotene wa Anamoona a Yehova onwodheyela eni?
4 Matxikwi a Anamoona a Yehova anotamela na murima wotene okalagawo mowiwanana na masunziho vina dila dha Mulugu. Njeedhelo nawa na egumi yohimala thawila akale mwilaboni eswa ya Mulugu. Sabwa ya okalagawo masiku otene ewelelaga malamulo a Mulugu, anomulagiha oviperheka wawa wa wiwelela mukalelo waye wa olamulela ovanene ninga vina mwilaboni eswa. Mpaddi wotene, peno akale a elabo gani obe a nlogo gani, aniwelela magano akakene—abale alamulile Mulugu mu Nzuni naye. Ji sabwa ya ejene ekalelani obali watxibarene wa dhilabo dhotene, nlogo niswa nithanddiwe na Mulugu.—Izaiya 54:13; Mateu 22:37, 38; Joau 15:9, 14.
5 Kayo Anamoona a Yehova antamaaleliwa sabwa ya okala nikuru nimodha bahi niliwo na obali wa elabo yotene. Awene anoziwa wila eji empadduwela sabwa ya muya wa guru wa Mulugu obwene onlaba vadhulu va athu aniwelela malamulo aye. (Merelo 5:29, 32; Galásia 5:22, 23) Aba mabasa a Mulugu. Ninga mwalogeli Yezu, “ehinwodha athu, onwodha ddi Mulugu bahi.” (Luka 18:27) Noona Mulugu oddwene othanddile erimu ejene enkalawovi ovenya nsaka na wale ddi oddwene onwodhiha nlogo nthi niswa na athu okalagawovi.
6. Obali wa Anamoona a Yehova onwodhela eni otxemerhiwa ntikiniho na nsaka na ovanene?
6 Dhaene, mukalelo wa Yehova olamulela mwilaboni eswa onowodha wooneya ovanene mwa esile dhinkosiye mmatibeeloni a elabo eswa, abene animetxiwa ovanene. Nanda ejile ekosiliye na Anamoona aye, mwa txibarene, nthi ntikiniho na nsaka na ovanene. Sabwa yani? Sabwani ohasasanyedha Anamoona a Yehova bakala obali watxibarene ozugunuwa elabo yotene, obali okwene ohinwodheya txipo ofudhiwa na dhimanya dha magawano a dhilabo, nlogo, obe relijiau. Oku Anamoona bagenjiva matxikwi vina bagakala mu dhilabo 235, awene anogumana ninga nifunddo nimodha nthene nihinfurumuleya. Obali obu wa elabo yotene, omodha bahi mwari mwa okalawo wotene wa nlogo na athu, txibarene nthi ntikiniho na nsaka na ovanene—nithanddiwe na Mulugu.—Izaiya 43:10, 11, 21; Merelo 10:34, 35; Galásia 3:28.
Mukalelo Wa Ozinddiyela Nlogo Na Mulugu
7. Yezu walogile wila anamafara aye agazinddiyeliwe dhavi?
7 Mowenjedha, niwodhiwe dhavi ozinddiyeliwa nlogo ninlabihedha Mulugu ninga matibeelo a elabo yaye eswa? Mbo, bani ansoriha mazu a Yezu ali va Joau 13:34, 35? Iyene ologile dhahi: “Ddinouvahani nlamulo niswa: mukwelanege. N’ekalelo yukwelilenina miyo, nyuwo vina mukwelanege. Mugakwelanaga, athu etene anoziwa wi muli anamasunza aga.” Anamoona a Yehova anorumeela mazu a Yezu vina aneedda mowiwanana na mazu aba. Ninga munsunzihedha Nzu na Mulugu, awene ‘aneedda na okwelana.’ (1 Pedru 4:8) Awene ‘anowabala okwela, sabwani okwela nifunddo nowakwana na wiwanana.’ (Kolosi 3:14, NM) Noona, okwela wa obali bu “mugumaniho” obwene onagumaniha ozugunuwa elabo yotene.
8. Mowenjedha, 1 Joau 3:10-12 onloga eni mwaha wa ozinddiyela nlogo na Mulugu?
8 1 Joau 3:10-12 vina onloga dhahi: “Enathiyaniha ana a Mulugu na ana a satana, jiji: akala muthu kanvirihamo ofuna wa Mulugu, kanimukwela mbalaye, kabaliwe na Mulugu. Mpaganyo wiwalenyu ovenyana omaromelo, bubu: enofuneya nikwelanege. Kaneddege n’ekalelo ya Kaini: iyene wali mukadda satana, nona ampa mbale.” Dhaene, nlogo na Mulugu obali wa elabo yotene obwene ohina otimbwini.
Etagano Yina Ya Wazinddiyelana
9, 10. (a) Mabasa gani agazinddiyeliwena adhari a Mulugu mmasakani aba omariha? (b) Anamoona a Yehova ansorihaga dhavi nlebo na Mateu 24:14?
9 Ohikala etagano yina ya wazinddiyelana adhari a Mulugu. Mu nivuhuloni naye na ogoma wa elabo, Yezu wahiloga dhilobo dhinjidhene esene dhigatonyihedhi nsaka nthi ninga masaka omariha. (Koona Epaddi 9.) Etagano ya makamaka ya nivuhulo nthi enromoliwa mmazuni aye ali va Mateu 24:14: “Muthaka wapama onere olaleyiwa mwilaboni mwetemwene, wi malogo otene ewe. Ngamalá panafiye ogoma wa elabo.”
10 Ninowoonaga osoriheya wa nivuhulo nthi? Indde. Vowi masaka omariha aromile yaka ya 1914, Anamoona a Yehova anolaleyaga muthaka wapama wa Omwene wa Mulugu mwilaboni motene na mukalelo orumile Yezu, onolaleyiwaga mmatakulu mwa athu. (Mateu 10:7, 12; Merelo 20:20) Matxikwi a Anamoona anowafiyedha athu mu dhilabo dhotene wila aloge na awene mwaha wa elabo eswa. Ji sabwa ya ejene yakeleliwe brochura nthi, sabwani mabasa a Anamoona a Yehova anotaganyiheya na opida mabiliau a manivuru anloga dha Omwene wa Mulugu. Onowaziwa athu ena anlaleya Omwene wa Mulugu numba na numba mwilaboni motene? Nanda Marko 13:10 onowooniha wila mabasa aba a olaleya vina osunziha anofanyeela ‘oroma,’ okosiwa omagomo ohinathi ofiya.
Wakuliwa Wa Mwaha Munddimuwa Wanawili
11. Elobo gani yina ensoriha Anamoona a Yehova sabwa ya wiwelelaga olamulela wa Mulugu?
11 Sabwa ya wiwelelaga malamulo vina magano a Mulugu, Anamoona a Yehova anosoriha elobo yina. Anowooniha wila Satana walogile othambi mwalogeliye wila athu kagamuroromeli Mulugu agehiwaga, dhaene mwaha munddimuwa wanawili onowakuliwa, obwene ontaganyiheya na ororomeleya wa athu. (Job 2:1-5) Sabwa ya okala nikuru nddimuwa na matxikwi a athu a mu dhilabo dhotene, Anamoona anororomeleyela olamulela wa Mulugu ninga nningo nimodha. Masiki vakalilani athu oohakwana, awene aninvuneela Mulugu va mwahani obu wa olamulela onddimuwa wa elabo yotene, masiki na odideliwa wa Satana.
12. Modheela nroromelo nawa, Anamoona animutagiha aani?
12 Nsaka na ovanene, matxikwi aba a Anamoona a Yehova anogumaniha onamoona wawa na obule wa ddima enddimuwa ya anamoona ena a nsaka na wale abalene aamuroromeli Mulugu. Wila naromole añognovi mwa abalene, mwahikala Abeli, Nowé, Job, Abramu, Sara, Izaki, Jakobi, Débora, Ruti, David na Daniyel. (Ahebreu, kapitulu 11) Ninga munlogela Bibilia, awene ‘murabo munddimuwa wa anamoona oororomeleya.’ (Ahebreu 12:1) Abene vamodha na anamasunza ena a Yezu aahithiddeela nroromelo nawa namukaanelani Mulugu. Nanda Yezu mwinyene wahivaha yotagiha enddimuwa vaddiddi modheela okaanavi ororomeleya wowakwana.
13. Mazu gani a Yezu mwaha wa Satana abene anooneya wila ebaribari?
13 Eji enlagiha wila esile dhalogile Yezu wa asogorheli a relijiau mwaha wa Satana sa txibarene: “Apa nyuwo munotamela oddipa, sabwa dduwaddelani ebaribari emwiwalemi Mulugu. . . . Nyuwo, babinyu ddi satana; nona mugera enimuzivela. Iyene, panga ovenyana omaromelo; iyene, namota, kanna ebaribari. Agalogaga dhothambi, onowoniha eliye, vowi ddi nipara na wota.”—Joau 8:40, 44.
Weyo Onsakula Eni?
14. Ovanene txini empadduwela matibeelo a elabo eswa?
14 Anowaralavi matibeelo a elabo eswa abene animetxa Mulugu ovanene mu nlogoni na Anamoona a Yehova a dhilabo dhotene. Kadda yaka mazana a matxikwi a athu anolabihedha ofuru wawa wa osakula, modheela eziwelo yonyaala, wila arumeele olamulela wa Mulugu. Awene anokosa epaddi ya nlogo na elabo eswa, baganvuneela Mulugu epaddi ya mwaha wa olamulela onddimuwa wa elabo yotene, vina wooniha wila Satana muthambi.
15. Mabasa gani a omwalaniha abene anfuna osogorhela Yezu mu nsaka nehu?
15 Sabwa ya osakula olamulela wa Mulugu, awene anela ofanyeela wikiwa “omononi woja” wa Kristu agamwalanihaga “mabila” na “mbuzi.” Mu nivuhuloni naye mwaha wa masaka omariha, Yezu wahithaga ologa dhahi: “Malogo otene a vati anere otugumanihiwa vamentoni vaye. Iyene onere wamwalaniha ena oku, ena oku, ninga enira mukumbuzi ommwalaniha mabila na mbuzi; onere weka mabila omononi woja, mbuzi omarani.” Mabila ba athu ooviyeviha abene aali vamodha, vina aakamihile abali a Kristu, bagewelela olamulela wa Mulugu. Mbuzi ba athu oovadda omaruni abene aakooddile abali a Kristu nanda akooddile okosa elobo wene wila akamihena olamulela wa Mulugu. Txini enapadduwevo? Yezu walogile dhahi: ‘Awene [mbuzi] anere otolotxiwa na mukalakala, oku abale eddiwe thagaraga adhowaga wakela egumi yohimala.’—Mateu 25:31-46.
16. Onfanyeela okosa eni akala onofuna okalawo Mparaizu oddo onda?
16 Txibarene, Mulugu ononitanaala! Mohigoneela wene onela okalihawo paraizu woziva velaboni ya vati. Weyo onofuna okalawo Mparaizuni oddo onda? Akala onofuna, kooniha wila onotamaalela mivaho dha Yehova modheela osunza dhilobo dhaye vina othiddihedhaga mabasa esile dhinsunziwe. “Mbaze omutamela Nabuya malabo abano anfwanyeya iyene; mmwithane ovanene valiye vakuvi. Mvuti athiye dila yaye, panga athiye mweddelo waye. Etene eyelele wa Nabuya: iyene onoaweddela thagaraga.”—Izaiya 55:6, 7.
17. Sabwa yani kuli mudhidhi wa ononga mwaha wa omusakula oddule onfanyeela olabiwa?
17 Kuli mudhidhi wa ononga. Omagomo wa elabo eji yowuluvala oli vakukuvi vaddiddi! Nzu na Mulugu ninolaga dhahi: “Kamufilele mento elabo na dhilimo! Onfilela mento elabo, okwela wa Mulugu Baba kulí na iyene . . . Elabo na dhowunlela dhaye dhetene, dhinovira; onira enimfunana Mulugu, onokalawovi.”—1 Joau 2:15-17.
18. Mukalelo gani wa merelo anowodhihe ojeedhela na nikuluvelo okalawo mwilaboni eswa ya Mulugu ejene eli yotikiniha?
18 Ovanene athu a Mulugu anosunzihedhiwa okalawo wa mukalakala mwilaboni eswa. Anosunza thotho dha omuyani na dhiina dhinfuneya wila paraizu oonuwihiwe. Ninowukokomeza wila omusakule Mulugu ninga Mulamuleli vina okamihedhe mabasa anvuna egumi abene ankosiye nsaka na ovanene ozugunuwa elabo yotene ya vati. Kamusunze Bibilia na Anamoona a Yehova, vina ofiyedhe omuziwa Mulugu oddwene onutanaala txibarene vina oddwene onfuna ogomiha goi. Na mukalelo obu weyo vina podi okosa epaddi ya matibeelo a elabo eswa. Venevo panawodhiwe na nikuluvelo okaana njeedhelo na orumeeleliwa na Mulugu vina okalawo na mudhidhi wohimala mwilaboni ejo eswa yotikiniha.
[Foto vanikukuni 31]
Anamoona a Yehova ahikaana obali watxibarene wa dhilabo dhotene
[Foto vanikukuni 32]
Matibeelo a elabo eswa ya Mulugu anowimetxiwa ovanene