Epaddi 7
Onlabihedha Relijiau Yebaribari Bani?
1. Ninfanyeela okosa eni wila nimuhagalalihe Mulugu?
WILA nikaane omarho woviha vina wa nzivelo na Mulugu, ninofanyeela okoodda okaana wandana wandanavi na relijiau ehili yebaribari. Ninofanyeela olabihedha relijiau yebaribari. Ovanene apa athu matxikwi na matxikwi Velaboni yotene ya vati ankosa ejene.
2. Anamona a Yehova anfanyeya wuvi, nanda mabasa gani ankosani?
2 Ninga mwaathageliwani ologiwa mBibiliani, anamebedha a ebaribari ba “muthithi munddimuwa” ondela mu “dhilabo dhotene, vina mahimo otene, vina malogo otene, vina dhilogelo dhotene.” (Ovuhulela 7:9) Matxikwi na matxikwi a Anamona a Yehova bolibene mu dhilabo 235, mwa wakamiha athu ena osunza mwaha wa dila dhokwela dha Yehova vina magano aye.
Wazinddiyela Anamebedha a Ebaribari
3. Anamona animwebedha ani, nanda makalelo gani a webedha anrabelani?
3 Anamona anoziwa wila Yehova yeka ddinfanyeela webedhiwa. Anokoodda wakokorela amilugu osemiwa obe maladdaniho a relijiau. (1 Joau 5:21) Awene kanaarhemeza abale akwile modhela okamihedha mithupo dha wasedhelaga athu okwa obe mithupo dhina esene dhintitedha dhorumeela dhothambi dha relijiau vina “masunziho a adomonyo.” (1 Timoteo 4:1) Mwa dhaene, anowapangarhaza mwatxibarene abale akweliwe, bagatapulela ejile elibeli Mulugu wila onela okala ovenya wa athu mukwani mparaizu Velaboni ya vati.—Joau 5:28, 29; Merelo 24:15.
4. Yimelelo ya adhari a Mulugu mwaha wa masalapitho jivi?
4 Anamona kanoonana wene na masalapitho, meera obe okwiri, sabwani ahiziwa wila dhilobo esi sa Ddiabo. Awene kankuluvela masalapitho wila aabarele—nikuluvelo nawa nili mwa Yehova.—Vimarya 18:10.
5. Mukalelo gani onkoodda Anamona a Yehova ‘okosa epaddi ya elabo’?
5 Yezu wahiloga wila anamasunza aye ‘kagaakosile epaddi ya elabo.’ (Joau 17:16) Yezu mwinyeene wahikoodda okosa epaddi ya politika ya masiku aye. (Joau 6:15) Na mukalelo wakakene, Anamona kankamihedha politika, onyanlogo vina makuru a owanela ethomo a elabo eji. Mbwenye anopitxa misoko vina anowiwelela malamulo a elabo ejuwene enkalani.—Joau 15:19; Roma 13:1, 7.
6. Malamulo gani ansoriha adhari a Mulugu mwaha wa matelo na omwalana?
6 Sabwa ya wiwelela esile dhinruma malamulelo, Anamona anozuzumela olebiha matelo awa. (Tito 3:1) Anowiwelela malamulo a Mulugu nona awene anorabela ovalanya. (1 Timoteo 3:2) Eji egaalivi, vowila anothiddihedha mabasa magano a Bibilia mwigumini yawa, matelo a adhari a Mulugu kakaaniletxe njedhelo na omwalana.
7. Anamona anlagiha dhavi okwelana mukalelani?
7 Anamona anokwelana mukalelani. Okwela oku, vamodha na omukwela Mulugu, onowawiwananiha mubaalini watxibarene, masiki vakalilani a maziza vina dhilabo dhinjidhene. Ntowa nigapadduwa obe mmidhidhini dha osegedheya, nomaguva Anamona anokamihana muthu na mukwaye. Anamona anolagiha okwela na mukalelo onkalani.—Joau 13:35.
Anamoona a Yehova ali owiwanana orugunuwa elabo yotene
8. Merelo gani abure anrabela adhari a Mulugu?
8 Adhari a Yehova anokosela guru ororomeleya vina okalawo deretu. Anorabela wiya, ologa othambi, ogonihana wotakala, olezela na merelo ooshagela mumpindduni. Amamuni kanabubudda awaadhiwa. Enagu ahinathi okala Anamona, ankosa dhilobo esi, mbwenye na nikamiho na Yehova awene ahitxeleela. Awene “ahisuwiwa” vamentoni va Mulugu.—1 Korinto 6:9-11.
Anokosa Efunelo ya Mulugu
9. Nivuru dhahi ninloga eni mwaha wa kapela dhomuyani dha mu Afrika?
9 Txibarene, relijiau dhinjidhene dhinologa wila dhihikaana ebaribari. Txino dhinolagiha merelo ootikiniha wila avuneele dhologa dhawa. Motagiha, nivuru dhahi ninologa dhahi mwaha wa esile dhintxemerhiwa kapela dhomuyani dha mu Afrika: “Mabasa a muliba masalapitho obe namungu mpaddi mwinjiya anotxinjiwaga na [makuru maswa a Akristu]. . . . Anologa wila anothaga ologa dha musogorho vina anokosa matikiniho. Anamavuhulaya vari vawa ahikaana dhowona vina anotapulela dhoroha. Anolabihedha manje a mbento, makura ookoddela, munddura, vela na lubani wila avulumutxe vina aweze maredda.”
10, 11. Sabwa yani abale antxemerhiwa ovanene ninga matikiniho kanlagiha wila relijiau ja Mulugu?
10 Athu a relijiau esi anologa wila matikiniho anovaha onamona wawila relijiau yawa enorurihiwa na Mulugu. Mbwenye esile dhintxemerhiwa ninga matikiniho kayo esene dhintonya wila relijiau enorumeeliwa na Yehova. Satana onowavaha ewodhelo anamebedha ena ahili a ebaribari wila akosege ‘mabasa a owodha.’ (2 Tesalónika 2:9) Eji egaalivi, Bibilia wahithaga ologa wila mvaho wa okosa matikiniho odhela wa Mulugu, ninga ovuhulela, ologa na dhilogelo dhothiyana thiyana vina okaana eziwelo yohiladdanihiwa, ‘dhigaagomihiwa.’—1 Korinto 13:8.
11 Yezu ohilaga dhahi: “Kayo wila oddule onddiilela: ‘Nabuya, Nabuya,’ onela ovolowa mumweneni wa odhulu, agahikale oddule onkosa efunelo ya Babaga, oli odhulu. Siku ntho enjene anela oddilogela: ‘Nabuya, Nabuya, kanivuhuleli mu nzina nenyu vina kanathamagihile adomonyo mu nzina nenyu, vina kanikosile mabasa menjene a owodha mu nzina nenyu?’ Venevo, miyo ddinela wabwekela dhahi: Txipo miyo kaddinooziwegeni! Kaddivenyelenivo, nyuwo munkosetxa dhilobo dhosadduwela nlamulo.”—Mateus 7:21-23.
12. Onavolowe Mumweneni wa odhulu bani?
12 Kito onavolowe muMweneni wa odhulu bani? Baabale ankosa efunelo ya Yehova.
Anamalaleya a Omwene wa Mulugu
13. Mabasa gani anfuna Mulugu wila adhari aye akose ovanene apa, nanda onkosa mabasa aba bani?
13 Efunelo enafunana Mulugu adhari aye a ovanene jivi? Yezu ohiloga dhahi: “Muthaka obu wapama wa omwene onela olaleyiwa velaboni yotene ya vati enkaliwa, mwa onamona wa dhilabo dhotene.” (Mateus 24:14) Aba ba mabasa ankosa Anamona a Yehova na guru.
14. Omwene wa Mulugu txini, nanda bani onalamulele Mumweneni?
14 “Velaboni yotene ya vati enkaliwa,” Anamona a Yehova anolaleya Omwene wa Mulugu ninga nlamulelo na odhulu nthene ninalamulele Elabo ya vati yotene na oligana. Anosunziha wila Yehova ohimuthoma Kristu Yezu ninga Mwene wa Omwene obu vamodha na alamuleli 144.000 asakuliwe mwari mwa nlogo na athu.—Danieli 7:14, 18; Ovuhulela 14:1, 4.
15. Omwene onatolotxe eni?
15 Na omulabihedha Bibilia, Anamona anowalagiha athu wila Omwene wa Mulugu onela otolotxa elabo yotene ya Satana. Relijiau ehili yebaribari na masunzihoya abene animutakaliha Mulugu vina animuthithimiha Ddiabo bagomile! (Ovuhulela 18:8) Bagomile vina malamulelo a omuthu abene animpambiha Mulugu!—Danieli 2:44.
16. Alamuleliwi a Kristu Yezu anakale ani, nanda aweneya anakalegewo wuvi?
16 Eji egaalivi, Anamona a Yehova anoziwiha wila Kristu Yezu onela wadhelana maruryo aderetu otene abale ankosa esile dhinfuna Mulugu. Awene anakale alamuleliwi aye Velaboni ya vati. Bibilia onlibela dhahi: “Onela omobola muyelegi onlilela nikamihedho, vina mutabuwi vamodha na oddule ohina mukamihedhi. Onela omukaanela thagaraga muhaawi vina muyelegi, nanda onela ovuna egumi ya ayelegi.”—Salmo 72:12, 13.
17. Anlaleya woka Omwene wa Mulugu bani?
17 Kuli nikuru nina na athu ninkosa efunelo ya Mulugu modhela olaleya muthaka wapama wa Omwene. Anamona a Yehova bahi banziwiha Omwene wa Mulugu ozugunuwa Velaboni yotene ya vati.