Nsunzo 14

Anamona A Yehova Ali Owasikana Dhavi

Aromile mudhidhi gani Anamona a Yehova mabasa awa mudhidhi obuno? (1)

Matugumano a Anamona a Yehova ali dhavi? (2)

Koddi dhimpitxiwa dhavi dhofuneya na dhokosiwa dhotene? (3)

Onsongorhela kadda mulogo bani? (4)

Matugumano gani manddimuwa ankosiwa yaka eli yotene? (5)

Mabasa gani ankosiwa vakathi na rhuwani dhina? (6)

1. Anamona a Yehova aromile mabasa awa mudhidhi obuno mwa yaka dha 1870. Omaromelo, atxemeriwa Anamasunza a Bibilia. Mbwenye mu 1931 athukula nzina na Mbibiliani na Anamona a Yehova. (Izaia 43:10) Na omaromelo oñgono, nikuru nihunuwa ofiyedha matxikwi a Anamona, odhala mabasa olaleya okwaranya dhilabo 230.

2. Milogo dhinjene dha Anamona a Yehova dhinokosa matugumano awa midhidhi miraru vasumanani. Ninoukukusa weyo wila odhe wone nimodha. (Aebreo 10:24, 25) Bibilia ddinkala nthuku mwa dhinsunzihiwa. Matugumanoya anromiwa vina ofugiwa na nlobelo. Vina munowibiwa na murima “jibo dhomuzimuni” mmatugumanoni menjene. (Efeso 5:18, 19) Ovolowawa kwa ebewe kamunkosiwa sokela.—Mateus 10:8.

3. Milogo dhinjene dhinokosa matugumano awa mu Nyumba ya Omwene. Eji enkalaga nyumba ya perediu yothiyana, yomagiwa na athu ovivelela a Anamona. Kamunoneiya Munyumba ya Omwene dhosema, ne dha mwigimanyo obe dhilobo dhaene. Mabasa ali otene ampitxiwa na mivaho dha athu ofuna ovaha. Wa oddule ofunile okosa mvaho, muhikala caixa ya mvaho.—2 Korinto 9:7.

4. Kadda mulogo mukala anddimuwa, obe anamañganela. Awene anosongorhela masunziho mmulogoni. (1 Timoteo 3:1-7; 5:17) Anokamiyedhiwa na adhari orumelela. (1 Timoteo 3:8-10, 12, 13) Alobwana aba kanoniwa ninga anddimuwa vaddiddi okwaranya athu ena mmulogoni. (2 Korinto 1:24) Kanthambira mazina othukuwa. (Mateus 23:8-10) Kanabala nothiana athu ena. Ne wene vañgono othambira sabwa ya mabasa ankosani. Anddimuwa anokamiyedha nofuna wawa dhofuna dhomuzimuni dha mulogo. Awene anowodha ovaha nipangarazo na dila mudhidhi wa masegedheyo.—Tiago 5:14-16; 1 Peduru 5:2, 3.

5. Anamona a Yehova anokosa vina matugumano manddimuwa yaka eli yotene. Masaka aba, milogo dhinjene dhinogumanela ddima enddimuwa ya masunziho a Bibilia. Obatizo wa anamasunza aswa ji epaddi yohivonya ya ddima dhotene dha matugumano aba manddimuwa.—Mateus 3:13-17; 28:19, 20.

6. Kathi ya elabo yotene ya Anamona a Yehova eli yofanyeiya o Nova York, EUA. Venevale vanofanyeiya N’ningo Nolamulela, nikuru nofuneiya na anddimuwa a eziwelo anañganela mulogo wa elabo yotene. Ohikala vina kathi vamodha na rhuwani dhokwaranya 100 elabo yotene. Mumburoni mpu, muhikala anamalaba ovivahedhela ankamyedha opida na ogawa manivuru a Bibilia. Vanobudduwa vina mpaganyo wowasikana olaleya. Ninoukukusa weyo wila wone kathi obe rhuwani yavakukuvi.