Mulugu Okaaneli Eni Nikuru na Attu Owiwanana?

1. Mulugu wamusasanyedhile eni Izrayel wa wale?

Mulugu wahisasanyedha odhuli wa nikolo Abramu bakala nlogo nanda wahavaha malamulo. Wahatxemerha abalene nlogo na “Izrayel” nlogo ntti nahikaana gari ya ottiddela webedha watxibarene vina nzu naye. (Masalmo 147:19, 20) Noona attu a mahimo otene ahakela mareliho sabwa ya Izrayel.—Kengesa Wita 22:18.

Mulugu wahasakula a’Izrayel wila akale anamoona aye. Esile dhapadduweli awene wale dhinolagiha mukalelo ompuramo attu agewelelaga malamulo a Mulugu. (Olibiha 4:6) Dhaene, modheela Aizrayel attu ena ela owodha omuziwa Mulugu watxibarene.—Kengesa Izaiya 43:10, 12.

2. Akristu atxibarene akaleli eni oovisasanyedha?

Mudhidhi dhahi, a’Izrayel ahiyelela omarho na Mulugu venevale Yehova batxinja nlogo nttile na mulogo wa Okristu. (Mateu 21:43; 23:37, 38) Nsaka na ovanene, vamburoni va a’Izrayel, Akristu atxibarene anolaba ninga anamoona a Yehova.—Kengesa Merelo 15:14, 17.

Yezu wahasasanyedha anamafara aye wila alaleyege vina aakosege anamasunza a malogo otene. (Mateu 10:7, 11; 24:14; 28:19, 20) Mabasa aba anofiyedha mpaddi munddimuwaya ovanene, omagomo wa elabo ejino. Dila yoroma ovenyana okalawo wa nlogo na attu, Yehova ohawiwananiha matxikwi na matxikwi a attu a dhilabo dhotene mu webedhani mwatxibarene. (Ovuhulela 7:9, 10) Akristu atxibarene ahivisasanyedha wila apangarhazena vina akamihena. Mmatugumanoni mwawa ozugunuwa elabo yotene, awene ansunza ddima yakakene ya Bibilia.—Kengesa Ahebreu 10:24, 25.

3. Nikuru na Anamoona a Yehova na nsaka na ovanene niromile dhavi?

Mu vyakani dha 1870, gatta eng’ono ya anamasunza Bibilia ahiroma ozinddiyela dhibaribari dha Bibilia dhakoodda olabihedhiwa. Anziwa yawila Yezu wahisasanyedha mulogo wa Okristu wila olaleyege, noona baroma mabasa a olaleya Omwene dhilabo dhotene. Yaka ya 1931 ahittukula nzina na Anamoona a Yehova.—Kengesa Merelo 1:8; 2:1, 4; 5:42.

4. Anamoona a Yehova avisasanyedhi dhavi?

Mu vyaka zana dhoroma, mulogo wa Okristu mu dhilabo dhinjidhene dhansogorheliwa na nikuru nolamulela namwiwelela Yezu ninga Musorho wa mulogo. (Merelo 6:4, 5) Ninga mumpadduwela nsaka na ovanene, Anamoona a Yehova ozugunuwa elabo yotene anosogorheliwa na Nningo Nolamulela na anddimuwa a mmulogoni a zelu. Nningo ntti ninowang’anela katti dha Anamoona a Yehova esene dhintapulela, dhimpida vina dhimpaka manivuru a omusunzana Bibilia okwaranya dhilogelo 600. Dhaene Nningo Nolamulela ninovaha nlibiho na Mmaleboni vina musogorhelo okwaranya milogo 100.000 ozugunuwa elabo yotene. Kadda mulogo muhikala alobwana oofanyeela anlaba ninga anddimuwa a mulogo, obe ang’aneli. Alobwana aba anosapiha mabila a Mulugu na okwela.—Kengesa 1 Pedro 5:2, 3.

Anamoona a Yehova ahivisasanyedha wila alaleyege miselu dhapama vina aakosege anamasunza. Ninga mwakosela arumiwi, ninolaleya numba na numba. (Merelo 20:20) Ninoviperheka vina omusunza Bibilia na attu abale ankwela-wene ebaribari. Mbwenye Anamoona a Yehova kayo nikuruvi bahi. Nili murala mmodha ona Babi onkwela. Nili abali na arogori anzuzumelana muttu na mukwaye. (2 Tesalónika 1:3) Vowila nlogo na Yehova ttowiwanana wila nimuhagalalihe Mulugu vina nakamihe attu akwawa, bu murala onsanzayetxa velaboni yavati.—Kengesa Masalmo 33:12; Merelo 20:35.