Kakodda Relijiau Ehili Ya Ebaribari!

Satana na adomonyo aye kanfuna wila weyo omulabege Mulugu. Awene anfuna apupurutxe wa Mulugu athu otene mpaka apale vanwodhani. Awene antamela okosa eji dhavi? Mukaleloya mmodha bodhela relijiau ehili ya ebaribari. (2 Korinto 11:13-15) Relijiau ehili ya ebaribari jijile enkodda osunziha ebaribari ya Bibilia. Relijiau ehili ya ebaribari eli ninga kobiri yopandda—enkala ninga jebaribari, mbwenye eji kayo elobwene. Eji enowutotela miladdu dhinjidhene.

Othambi wa relijiau txipo kunadhe omuzivelaga Yehova, Mulugu wa ebaribari. Yezu agali Velaboni ya vati, wahikala nikuru na relijiau nafuna ompa. Athu a nikuru nthile ona ninga mukalelo wawa wa webedha wali waderetu. Ahiloga dhahi: “Nina Babi mmodha bahi, Mulugu.” Koddi Yezu wahirumela eji? Ne! Iyene wahapanga dhahi: “Nyuwo muli a babinyu, Ddiabo.” (Joau 8:41, 44) Ovanene apa, athu enjene anona ninga animwebedha Mulugu, mbwenye mwebaribari awene animulaba Ddiabo na adomonyo aye.—1 Korinto 10:20.

Dhaene ninga muri wabure onobala misapo dhabure, relijiau ehili ya ebaribari enowabala athu ankosa dhilobo dhabure. Elabo ehidhala makathamiho sabwa ya dhilobo dhabure dhinkosa athu. Muhikala ogonihana wotakala, owana, wiya, otabutxiwa, opanga na ogonihiwa womageleliwa. Athu enjiya ankosa dhilobodhenesi ahikana relijiau, mbwenye relijiau eji kinathukulela athu aba okosa ejile eli yaderetu. Agahitxelele okosa dhilobo dhabure, awene kanakale wene amarho a Mulugu.—Mateus 7:17, 18.

Relijiau ehili ya ebaribari enowasunziha athu walobelela amilugu osemiwa. Mulugu onoruma wila amilugu osemiwa ahilobeleliwe. Eji jofanyela. Koddi weyo ogonile dhavi kowiliwa muthu kanloga vina na weyo, mbwenye onloga na foto dhawo bahi? Koddi muthu oddu agahikala marho wawo watxibarene? Ne, kagakalile. Yehova onfuna wila athu alogege na iyene, othiya ologela evigo obe nladdaniho nihina egumi.—Obudduwa 20:4, 5.

Relijiau ehili ya ebaribari enosunziha wila wapa athu mudhidhi wa koddo jofanyela. Yezu ohiloga wila amarho a Mulugu agahikwelana. Iyo kaninapa abale anakwelihu. (Joau 13:35) Egahikala yabure masiki vina wapa athu abure. Amwiddani a Yezu mwadhowelani ommaga, iyene kathiyile arumiwi aye owana wila anvunele.—Mateus 26:51, 52.

Relijiau ehili ya ebaribari enosunziha wila avuti anela otabuwa mu inferno ya motho. Mbwenye Bibilia onsunziha wila othega onodhiha okwa. (Roma 6:23) Yehova ddi Mulugu wa okwela. Ngani Mulugu wa okwela agahasosa athu na mukalakala? Ne! Mparaizu munakale relijiau modha bahi, ejile enrumela Yehova. (Ovuhulela 15:4) Relijiau dhotene dhindela mu othambini wa Satana dhinela orimela.