Miselu dha Omwene N.° 37

Muselu Onlaleyia Elabo Yotene

Ogoma Wa Relijiau Ehili Yebaribari Oli Vakukuvi!

▪ Relijiau ehili yebaribari txini?

▪ Enfuna ogoma dhavi?

▪ Weyo onfuna okala dhavi?

Relijiau Ehili Yebaribari Txini?

Weyo ononyonyeya na dhopanga dhinkosiwa mu nzina na relijiau? Koddo, dhotabala, vina dhovirigana dhinkosiwetxa na abale anloga wila anomulaba Mulugu dhinowusilidha? Enkalela eni ninga relijiau jili totela ya makathamiho menjene? Muladduya ona kayo marelijiau otene, mbwenye ena muladdu ji relijiau ehili yebaribari. Yezu Kristu, muthu woziwiwetxa wa relijiau, wahitonyihedha wila relijiau ehili yebaribari enokosa mabasa abure, ninga “muri wabure onbala milima dhabure.” (Mateu 7:15-17) Milima gani dhimbaala relijiau ehili yebaribari?

Relijiau Ehili Yebaribari . . .

◼ ENOVOLOWA MU KODDONI VINA MPOLITIKANI: Jornale nintxemerhiwa Asiaweek, ninloga wila “Mu Asia vamodha na mburo dhiina, asogorheli anfunetxa mpaddo wothukuwa anowararelaga oviriganiha esile dhinubuwela vina dhiniwa athu mmirimani wila apurena esile dhinfunani.” Sabwa ya ejene, jornale nthi ninolaga dhahi: “Elabo enkala ninga enfuna eririmele mutaduwani.” Musogorheli dhahi wovuwa wa elabo ya Estados Unidos ohiloga dhahi: “Munofanyeela wapa atabala wila nawimetxe awene wapa athu.” Ogomeli vavi? “Mwape aweneya otene mu nzina na Nabuya.” Mothiyana na ejene, Bibilia onloga dhahi: “Akala muthu oní: ‘Miyo ddinomukwela Mulugu,’ oku amwiddanaga mukwaye, onkala muthambi.” (1 Joau 4:20) Masiki vina Yezu wahiloga dhahi: “Mwakwele anuwiddani.” (Mateu 5:44) Weyo onubuwela marelijiau mangasi ana athu andowa mu koddoni?

◼ ENOMWADHA MASUNZIHO AHILI A EBARIBARI: Marelijiau menjiya ansunziha wila muzimu obe muya ji elobo ya muthu enkoodda wooneya, ejene enkalawovi muthuya agakwa. Modheela nsunziho nene nthi, marelijiau aba menjiya anowapura athuya anasunzihani, bagaapitxiha kobiri, wila alobelelege mizimu esile dhinilani dhihidhowa. Mbwenye nsunziho na Bibilia kayo nthene. “Muzimu onthega—obwene onela okwa.” (Ezekiyel 18:4, Tradução do Novo Mundo) “Athu aliwo anoziwa wila anela okwa; vano aliba okwa kanziwa elo-wene.” (Kohelét 9:5) Kowiliwa athu ahikaana muzimu ohinkwa, nsunziho na Yezu nawila athu anela ovenyihiwa mu okwani kanigafuneyile. (Joau 11:11-25) Relijiau yawo ensunziha wila muzimu kunkwa?

◼ KINKOODDIHA ORARUWA: Mu dhilabo dhinjidhene, relijiau dhiina dhinowathoma alobwana angonihana alobwanavi vina ayana angonihana ayanavi wila akale anamakutha, vina relijiau esi dhinokokomeza malamulelo wila arumeele matelo a athu alobwanavi obe ayanavi. Masiki relijiau esile dhinkona oraruwa, kadhinathamagiha asogorheli abale amalile wagoniha aima. Ki Bibilia onsunziha eni mwaha wa oraruwa? Oddu onologa wene mowooneya: “Kamuvipele malago mwanya! Mumwenenimwá kanvolowamo anjiwa murima na vidhivi-dhivi, anebedha dhebewene, ajeberuwi, anraruwa ayanavi, anraruwa alobwanavi.” (1 Korinto 6:9) Weyo onoziwa marelijiau ahinkooddiha oraruwa?

Marelijiau ambaala milima dhabure anjeedhela eni? Yezu ohilaga: “Muri ohinbala dhapama, onogwaddiwa, onovokeliwa vamothoni.” (Mateu 7:19) Indde, relijiau ehili yebaribari enela ogwaddiwa, egamala bitolotxiwa! Kito ejiya enfuna opadduwa dhavi, nanda mudhidhi gani? Yowakulaya eli mu nivuruni na Ovuhulela, makapitulu 17 na 18, esene dhintonyihedha yowoona ya nivuhulo.

Relijiau Ehili Yebaribari Enfuna Ogoma Dhavi?

Katanaalela eji. Jeberuwa ogilateli enama yowopiha. Enamaya ena misorho mitanu na mili na manyaga kumi (Ovuhulela 17:1-4) Jeberuwaya ontapulela eni? Iyene onowapakela “amwene etene a mwilaboni.” Wabalile guwo dha thima, onomuddumeya lubani, vina ohireela vopitha. Mowenjedha, na makaga aye ‘ohapela malago athu a malogo otene.’ (Ovuhulela 17:18; 18:12, 13, 23) Bibilia ononikamiha woona wila jeberuwa oddu thi nikuru na relijiau na elabo yotene. Oddu kantapulela relijiau modha, mbwenye ontapulela relijiau dhotene dhimbaala milima dhabure.

Enama ejene ewelile jeberuwa entapulela amwene a politika a elabo yotene.a (Ovuhulela 17:10-13) Relijiau ehili yebaribari ewelile va mutanani va enama eji ya politika, atamelaga opakela esile dhinfunani okosa vina wañganelaga okule ondowani.

Noona, mohigoneela enela opadduwa elobo yowumiha milomo. “Enama ejo, vina manyaga kumi onilewe, dhinere owana na jeberuwa oddo, dhinere omurula guwo, dhimuthiye yovi, dhinere omuja, dhinere oddumeya dhin’halavo.” (Ovuhulela 17:16) Na rurumutxa, vina mwirelo wowopiha, amwene a politika a elabo yotene anela obuddugela relijiau ehili yebaribari nanda batolotxa kakamwe! Txini enfuna otatamula nipadduwo nthi? Nivuru na Bibilia na Ovuhulela ninowakula: “Ddi Mulugu wikile mmurimani mwa amwene abale kumi mobuwelo aba owirana dhitadileye.” (Ovuhulela 17:17) Pu mwenemo, Mulugu onela opwatheliha muladdu relijiau ehili yebaribari, sabwa ya merelo ootakala akosilani mu nzina naye. Na olabihedha othonga wowakwana, Mulugu onela walabihedha amweeddi aye a politika wila amutolotxena.

Weyo onfanyeela okosa eni akala kunfuna opadduweliwa esile dhinfuna opadduwela relijiau ehili yebaribari? Munamukathi wa Mulugu onokokomeza dhahi: “Nyuwo athu a nlogo naga, budduwaní mmuthetheni-mpuno.” (Ovuhulela 18:4) Noona, nthi thi nsaka na othawa mu relijiauni ehili yebaribari! Ki othawele wuvi? Kuthawele mu nsunzihoni ninloga wila Mulugu kawo, sabwani nsunziho nthi kanina njeedhelo. (2 Tesalónika 1:6-9) Vothawelava bahi pu mwari mwa relijiau yebaribari. Owodhe dhavi ozinddiyela relijiau yebaribari?

Mukalelo Wa Ozinddiyela Relijiau Yebaribari

Milima gani dhaderetu dhinfanyeela obaala relijiau yebaribari?—Mateu 7:17.

Relijiau Yebaribari . . .

◼ ENOKWELA: Anamebedha a ebaribari ‘kankosa epaddi ya elabo,’ kagawanile na malogo obe meeddelo, vina ‘anokwelana.’ (Joau 13:35; 17:16; Merelo 10:34, 35) Othiya opananaga, awene anoviperheka wila aakwele athu akwawa.—1 Joau 3:16.

◼ ENOKULUVELA NZU NA MULUGU: Othiya osunzihaga ‘gano dha elabo’ vina “meddelo a athu bahi,” relijiau yebaribari ensunziha esile dhili mu Nzu na Mulugu, Bibilia. (Mateu 15:6-9) Sabwa yani? Sabwani “dhetene dhilebiwe mBíbliani, wobuweliha ddi Mulugu; dhilebeliwé osunziha ebaribari, wahélamo anvonya, wawógola anvirigana.”—2 Timóteo 3:16.

◼ ENOLIBIHA MIRALA VINA ENOKOKOMEZA MEEDDELO ADERETU VADDIDDI: Relijiau yebaribari anowasunziha amamuni ‘wakwela awadhawa n’ekalelo envikwelanina anya,’ enowakamiha ateliwi ‘omurihaga mamune,’ vina enowasunziha ana ‘warumeelaga amambaliwa.’ (Éfeso 5:28, 33; 6:1) Mowenjedha, abale athomeliwe mabasa a osogorhela anofanyeela okaana meeddelo ootagiheya.—1 Timóteo 3:1-10.

Ohikala relijiau ensoriha meeddelo aba? Nivuru Holocaust Politics, nilebiwe yaka ya 2001, ninloga dhahi: “Kowiliwa athu enjene anothiddihedha mabasa esile dhinlaleya vina dhinkosa Anamoona a Yehova, Opiwa wa Mithithi dha Athu ogahibareliwa vina opiwa na pudha wa athu kugakalilewo viina mwilaboni motene.”

Txibarene, mu dhilabo 235, Anamoona a Yehova kankalela olaleyavi meeddelo a Bibilia, mbwenye vina anothiddihedha mabasa mwigumini mwawa. Ninowukokomeza wila wakumbirhe Anamoona a Yehova wila ookamihe osunza ejile enufunana Mulugu wila omwebedhege na mukalelo wofanyeela. Onofanyeela okosa ejene ovanene. Kuyeluwe. Ogoma wa relijiau ehili yebaribari oli vakukuvi!—Sofoniya 2:2, 3.

Akala onofuna miselu dhiina mwaha wa miselu dha Bibilia esuwene dhinlaleya Anamoona a Yehova, onokumbirhiwa wila watamele Anamoona a Yehova olabihedhaga nlagiho nili mutxiddo.

□ S’ohikalavo nlagano, ddinokumbirha brochura Kakalanivi Txenjewa!

□ Ddinokumbirha wila mudditamelena nsunzo na Bibilia nihimpitxiwa kobiri.

[Dhowenjedhedha dhili mutxiddo]

[Mutoma wa nikuku 3]

“Nyuwo athu a nlogo naga, budduwaní mmuthetheni- mpuno.”

[Mutoma wa nikuku 3]

Relijiau ehili yebaribari enowapakela “amwene etene a mwilaboni.”