Elabo Eswa Mowiwanana Na Nlibelo Na Mulugu
BIBILIA, Nzu na Mulugu nilebiwe, ononivaha njeedhelo agalogaga dhahi: “Ohikala odhulu oswa na elabo eswa ejene enjeedhelihu mowiwanana na nlibelo naye, nanda mwenemo munela okala oligana.”—2 Peduru 3:13.
“Odhulu oswa” txini? Bibilia onowiwananiha odhulu na olamula. (Merelo 7:49) “Odhulu oswa” nthi nlamulelo niswa nthene ninalamule elabo. Nthi nintxemerhiwa niswa sabwani ninela ohala vamburoni va mukalelo wa olamulela wa ovanene; nthi vina tharho eswa ya osoriheya wa efunelo ya Mulugu. Obu bu Omwene obulene onisunzihile Yezu olobelela. (Mateus 6:10) Vowila Mulugu ddi niparana vina onkala odhulu, obu onotxemerhiwa “Omwene wa odhulu.”—Mateus 7:21.
“Elabo eswa” txini? Eji kayo elabo ya vati eswa, vowila Bibilia onologa mowooneya yawila elabo enela okaliwa na mukalakala. “Elabo eswa” thi nlogo niswa na athu. Eji enakale eswa sabwani avuti anakale bamalile ogomihiwa. (Vimarya 2:21, 22) Otene abale anfuna okalawo anela omuthithimiha vina omwiwelela Muthanddi vina anela okalawo mowiwanana na magano aye. (Salmo 22:27) Athu a dhilabo dhotene anowobeleliwa osunza magano aba vina wiwananiha egumi yawa na magano aba ovanene. Weyo onokosa ejene?
Mwilaboni eswa ya Mulugu, muthu wotene onela oriha olamula wa Mulugu. Omukwela Mulugu onowuthukulela weyo omwiwelela iyene? (1 Joau 5:3) Eji enowooneya vatakulu vawo? omabasani obe oskola? mmukaleloni onlabihedhiwe egumi yawo?
Mwilaboni ejile eswa, athu anela wiwanana mwa omwebedha Mulugu wa ebaribari. Weyo onomwebedha Muthanddi wa odhulu na elabo? Webedha wawo onowuwiwananiha txibarene na anamebedha akwawo a dhilabo dhotene, malogo otene, dhilogelo dhotene?—Salmo 86:9, 10; Izaia 2:2-4; Sofoniya 3:9.
[Kasha vanikukuni 17]
Mulugu Oddwene Ororomelihile Dhilobo Esi
Iyene ddi Muthanddi wa odhulu onooneya vina elabo ya vati. Ddi iyene bahi wamuromolile Yezu Kristu ninga “Mulugu mmodha wa ebaribari.”—Joau 17:3.
Athu enjiya a nlogo na athu anathithimiha amilugu akosiwe na awene. Athu matxikwi na matxikwi anoworomela maladdaniho ahina egumi. Ena anthithimiha miparha dha omuthu, filozofia dhinvuwiha okaanetxa mazanga, obe ena anthithimiha dhifunelo dhawa. Masiki abale anloga wila anomulabihedha Bibilia kayo wila otene anothithimiha nzina na oddule onimutonya Bibilia ninga “Mulugu wa ebaribari.”—Deuteronomo 4:35.
Mwaha wa iyenene, Muthanddi ohiloga dhahi: “Miyo ddili Yehova. Nthi thi nzina naga.” (Izaia 42:5, 8) Nzina thi ninobudduwa dila 7.000 mBibiliani mu dhilogelo dhilebiwiyena omaromo. Yezu Kristu wahasunziha anamafara aye wila alobelege dhahi: “Babi wehu muli odhulu, nzina nenyu nithithimihiwe.”—Mateus 6:9.
Mulugu wa ebaribari muthu wa mukalelo gani? Iyene onovitapulela mwinyene ninga oddule oli wa “thagaraga vina wa ddiddi, wohiludduwa na omaguva vina wodhaala okwela wororomeleya vina ebaribari” vina ninga oddule ohinvonya wene wasothotha abale anlupa malamulo aye na ofuna. (Obudduwa 34:6, 7) Mapadduwo a merelo aye na nlogo na athu anorumeela ebaribari ya mutapulelo obu.
Nzina vamodha na muthuya ontapulela nzinana onela othithimihiwa, obe weeddihiwa na okoddela. Ninga Muthanddi vina Mulamuleli Munddimuwa wa Elabo Yotene, iyene ddinfanyeelihu omwiwelela vina webedha wehu wotene. Weyo onomwiwelela vina onomwebedha iyene?
[Kasha/Foto vanikukuni 18]
Masadduwo Gani Anfuna Odhana “Odhulu Oswa Na Elabo Eswa”?
Osadduliwa wa elabo bikala Paraizu Lukas 23:43
Nlogo na athu a dhilabo dhotene, Joau 13:35;
malogo otene, dhilogelo dhotene Ovuhulela 7:9, 10
ahiwanana na okwela
Murenddele wa elabo yotene, Salmo 37:10, 11;
muthiddeeleyo wa txibarene wa athu otene Mikeya 4:3, 4
Mabasa ooziva, winjiva wa dhoja Izaia 25:6; 65:17, 21-23
Maredda, okubanya, okwa ohigomihiwa Izaia 25:8;
Elabo yowiwanana mwa omwebedha Ovuhulela 15:3, 4
Mulugu wa ebaribari
[Kasha/Mafoto vanikukuni 19]
Weyo Onela Opuramo?
Mulugu kanloga othambi!—Tito 1:2.
Yehova onloga dhahi: “Nzu naga . . . kaninaddiyelele s’ohipadduwa elobo, mbwenye ninela okosa txibarene ejile eddiziveli, vina ninela weeddeleya deretu mwa ejile erumelimi.”—Izaia 55:11.
Yehova onothandda wene “odhulu oswa na elabo eswa.” Nlamulelo na odhulu ninolaba. Matibeelo a “elabo eswa” ahimala wimetxiwa.
Mumaleliye ovuhula mwaha wa dhilobo dhiina dhotikiniha dhinfuna odhana “odhulu oswa na elabo eswa” wa nlogo na athu, Ovuhulela onomuromola Mulugu mwinyene, Mulamuleli Munddimuwa wa Elabo Yotene, bagaloga dhahi: “Koonani! Ddinokosa dhilobo dhotene dhikale dhiswa.” Vina, iyene ohiloga: “Kaleba, sabwani mazu aba ba ororomeleya vina ba txibarene.”—Ovuhulela 21:1, 5.
Nivuzo na makamaka thi nthi: Ninokosa masadduwo anfuneya wila nooniwe ninga oofanyeela okosa epaddi ya “elabo [ejile] eswa” mutxiddo mwa “odhulu oswa”?