NSUNZO 6

Amarafula Anjeedhela Eni?

1. Miselu gani dhapama dhiliwo wa amarafula?

Lazaru muvenyihedhiwiye mu okwani wahakeliwa na arogora aye Marta na Maria

Yezu mwafiyeliye o Betaniya waddamela o Jeruzalemi, marho waye Lazaro wahimala okwa bavirile masiku manai. Yezu wahidhowa apale vekiwiye na Marta vina Maria, arogori a marafula oddule. Mudhidhi mung’onovi, vahigumana muttitti wa attu. Onowodha otanaalela ottaba wa Marta na Maria, Yezu mwanvenyihedhiye Lazaro okalawo wili?—Kengesa Joau 11:21-24, 38-44.

Marta wanziwa miselu dhapama mwaha wa amarafula. Iyene wanziwa yawila Yehova onele wavenyiha amarafula akalewo wili velaboni yavati.—Kengesa Job 14:14, 15.

2. Amarafula ali dhavi?

Adamu wilottanddiwa, musogorhomwa bakwa — Mulugu wahimpanga Adamu: “Weyo oli mbwebwe, onowiyelela okala mbwebwe.”—WITA 3:19.

Attu apaddutxiwe omattakani. (Wita 2:7; 3:19) Kanili muya banigakalawo mwari mwa maningo. Nili dhopaddutxiwa dhinooneya na mento, noona nigakwa mmaningoni mwehu kamuli elobo embudduwamo. Nigakwa, ogogo wehu onokwa vina, dhubuwelo dhehu dhinotolowa. Noona Lazaro mwavenyihedhiwiye kalogile elobwene yampadduwela bali wokwene, sabwani amarafula kaniwawo elobwene.—Kengesa Masalmo 146:4; Kohelét 9:5, 6, 10.

Attu agakwa Mulugu onowatabutxa na motto? Vowila Bibilia onloga wila amarafula kaniwa elobwene, nsunziho na omottoni kanikalile-wene, ninomuzivalela Mulugu. Mazuvi bahi anloga dha watabutxa attu na motto, anomusilidha Mulugu.—Kengesa Jeremiya 7:31.

3. Amarafula anologa na iyo?

Amarafula kanloga nne kaniwa. (Masalmo 115:17) Mbwenye angelo ena babure, anologa na attu bagavikosiha ninga attu akwile. (2 Pedro 2:4) Yehova onokooddiha otamelaga ologa na amarafula.—Kengesa Olibiha 18:10, 11.

4. Onfuna ovenyihiwa mu okwani bani?

Abale anavenyihiwe mu okwani anele osunza sabwa ya Mulugu. Musogorhomwa anele wasunziha abale eena anavenyihiwe mu okwani omuziwa Mulugu.

Matxikwi na matxikwi a attu akwile abene anfanyeya mmasiye anele ovenyihedhiwa okalawo velaboni yavati. Attu ahifwanyile gari ya osunza miselu dha Mulugu nanda akosile dhabure anele ovenyihiwa.—Kengesa Luka 23:43; Merelo 24:15.

Aliba ovenyihiwa mu okwani anele owodha osunza ebaribari ya Mulugu vina omuroromela Yezu modheela omwiwelela. (Ovuhulela 20:11-13) Abale anvenyihedhiwa okalawo nanda akosa dhilobo dhaderetu anele owodha ojavo egumi ya mukalakala velaboni yavati.—Kengesa Joau 5:28, 29.

5. Ovenya mu okwani onnipanga eni mwaha wa Yehova?

Mulugu ohavaha amarafula njeedhelo modheela omuruma Mwana waye onikwela. Noona ovenya mu okwani onnipanga yawila Yehova ononikwela vina onnipanga mahala aye. Amarafula agavenyihedhiwa okalawo, onfunetxa weyo omoona bani?—Kengesa Joau 3:16; Roma 6:23.

Ogafuna oziwavi, koona kapitulu 6, 7 vina 10 nivuru Txini Ennisunziha Bibilia?