Weyo Wahiromaga Okala Weka vina Bugoova?

Kamwag’ane muzombwe oddu mug’ono vafotoni. Iyene onkala ninga oli yeka vina na wova, kali? Wahiromaga okala dhahene?— Mudhidhi mwina attu otene anokalaga dhahene. Bibilia onowaloga amarho a Yehova aakalile woka vina na wova. Mmodha wa awene wali Eliya. Ndowe nisunze modheela iyene.

Eliya ohikala mu Izrayel nsaka na wale, Yezu ahinatti obaaliwa. Akab, mwene wa Izrayel, kamulabela Mulugu webaribari, Yehova. Akab na mwadhiye Jezabel, amulabela mulugu onyengetta Baal. Mwa venevo attu enji mu Izrayel vina ahiroma omulabela Baal. Musano Jezabel wali wabure vaddiddi vina wahiveda wapa attu amwebedha Yehova, vamodha na Eliya! Weyo onoziwa ekosile Eliya?—

Eliya wahittawa! Iyene wahidhowa wolapela mwiddeddereni bapitala mugurugudhani. Weyo onubuwela wi iyene okosile ejo sabwa yani?— Indde, iyene wela wova. Mbwenye Eliya kafanyeela wova. Sabwaya jani? Sabwani iyene wahiziwa wi Yehova agawodha omukamihedha. Yehova wahimutonyihedha Eliya nawalene guru yaye. Mudhidhi dhahi, Yehova wahakula nlobelo na Eliya mwa omuttiya motto wadheela wirimu. Mwebaribari Yehova agawodha omukamiha Eliya mwa nikattamiho ntti!

Vaali Eliya mugurugudhani, Yehova wahiloga na iyene anvuzaga: ‘Weyo onkosamo eni mwenemo?’ Eliya wahakula: ‘Ddimiyo meka onulabelani nyuwo. Miyo ddili meka, vina ddinowova wi ddinapiwe.’ Eliya wobuwela wi abale otene amwebedha Yehova ahipiwa. Mbwenye Yehova omwaddela Eliya: ‘Nne, ejo kahiyo ebaribari. Ahikalawo attu muttengo wa 7.000 anddilabela. Kakala woliba murima. Miyo ddihikaana mabasa menji wi okose!’ Weyo onubuwela wi Eliya wahagalala wiwa ejuwene?—

Weyo onsunza eni mwa ejile epadduwile na Eliya?— Weyo txipo kunakale weka vina na wova. Weyo ohikaana akwawo animukwela Yehova vina anukwela weyo. Nanda, Yehova ohikaana guru enddimuwa, iyene onele wukamihedha! Weyo mwebaribari onohagalala mwa oziwa wi txipo kuli weka?—