Yehova Onomulibiha Eliya

Jezabel mwiwaliye yapadduweli anamavuhulela a Baal, onyonyeya vaddiddi. Omurumela Eliya anamukatti eraga: ‘Mangwana weyo onele okwa, ninga yawireliwe anamavuhulela a Baal.’ Eliya ottiddiwa wova onddimuwa ottawela mutakwani. Iyene olobela: “Nabuya, ovano ddilema. Ddithiyeni ddikwe.” Eliya mulogeliye mazu aba, ogunanti ogona mutxiddo mwa muri.

Eliya mugoneliye, ofiya anju omvenyiha nokurumuwa, ologane: ‘Venyani muje.’ Eliya mvenyeliye, wonile mukatte wovihene na manje oridha. Iyene oja, omwa ogunanti wili. Anju omvenyiha wili ologana: ‘Venyani muje. Vowi muhalana oleddo onddimuwa.’ Eliya ovenya oja wili. Novenya, okosa oleddo wa malabo 40 mattiyu na mutana, ofiya va mwangoni Horeb. Veneno Eliya ovolowa mugurugudhani wi agone. Nomala, Yehova ologana: ‘Eliya, apava onkosavo eni?’ Eliya omwakula: ‘Ana Izrayel alupa nlibelo nenyu. Abwanyula vibuwa dhenyu. Ahapa anamavuhulela enyu. Apo anfuna addipe miyo vina.’

Yehova omwaddela: ‘Dhowa wawele vamwangoni.’ Ahinatti owela vamwangoniva, ehoba pevo enddimuwa. Vasogorhova, elabo ettekenyeya, vina ovira motto. Mmalelani, Eliya ohiwa nzu nadhela vati-vati. Iyene okunela omentoni waye na guwo yabaliye obudduwa mugurugudhani mwaliye. Yehova omvuza dhahi: ‘Eliya onttawa eni?’ Eliya omwakula: ‘Nabuya miyo ddihali meka.’ Yehova omwiyihedha: ‘Weyo kuhali weka. Mwizrayel mukala attu 7.000 anddebedhavi. Dhowá wamuttikittele Elizeu wi akale namavuhulela vamburoni vawo.’ Vomaguva-vene, Eliya odhowa okosa yamurumile Nabuya. Koddi Yehova onele oukamihedha weyo ogavirihamo dhinfuniye? Pumwenemo, onele oukamihedha. Ndoweni nisunze elobo yapadduwile mwakalelaniwo yumwi.