Mukale Wororomelana Muttu na Mukwaye

Yehova onfuna wi iyo ‘nikwele nroromelo.’ (Mikeya 6:8) Ejo jamakamaka vaddiddi vamateloni vawo sabwani vantowa ororomelana, kavankala okuluvelana. Vina nikuluvelo elobo yamakamaka enunuwiha okwelana.

Ovano, nroromelo mmateloni nili mutxiddo mwa magudulano. Wi obarele matelo awo, weyo onofanyeelela ogana dhilobo bili.

1 WIKE MATELO AWO VAMBURONI VOROMA

TXINI ENLOGA BIBILIA: ‘Ottiddeelevi dhilobo dhamakamaka.’ (Akadda Filipi 1:10) Matelo ali mwari mwa dhilobo dhotene dhamakamaka dha mwigumini mwawo. Enofanyeela weka vamburoni voroma.

Yehova onfuna wi weyo omuzuzumele mwadhiyo obe mamunawo wi ‘mujevo egumi’ motene. (Kohelét 9:9) Iyene onoziwiha wi weyo txipo kunfanyeela ompwaza mamunawo obe mwadhiyo, mbwenye ottiya ejuwene, nyuwo moheeli munofanyeela oveda mikalelo dha wagalalihana muttu na mukwaye. (1 Akadda Korinto 10:24) Kamukose mamunawo obe mwadhiyo okala wofuneya vina wozivela.

TXINI ENFANYEELA WEYO OKOSA:

• Bamuli motene, mukaane ebaribari wi mudhidhi wotene munokosa guru ya onvuruwanaga mwadhiyo obe mamunawo mudhidhi wotene

• Wubuwelege dhahi “iyo” ottiya wubuwela dhahi “miyo”

2 KAKOYA MURIMA WAWO

TXINI ENLOGA BIBILIA: ‘Ole onimwag’ana muyana amunlelaga, omala oraruwana mmirimani mwaye.’ (Mateu 5:28) Akala muttu onokalavi bagobuwela dhilobo dhonyakuwa, mwa venevo, iyene onoroma okala muttu wotowa nroromelo na mamunaye obe mwadhiye.

Yehova ohiloga wi weyo onofanyeela “okoya murima wawo.” (Gano dh’olelana 4:23; Jeremiya 17:9) Wi okose ejene, weyo onofanyeela obarela mento awo. (Mateu 5:29, 30) Kafara nladdaniho na nikolo Job, okosile nipagano na mento aye txipo ahimwag’anaga muyana na efunelo yabure. (Job 31:1) Kuwawone txipo attu bali yovi. Karabela ogayelana na muttu mwina ohili mwadhiyo obe mamunawo.

TXINI ENFANYEELA WEYO OKOSA:

• Kaaziwihe attu eena wi weyo ohitela obe ohiteliwa

• Katanalela dhubuwelo dha mamunawo obe dha mwadhiyo, vina momaguva kattiya mandano otene agawodhile omudhugudha mwadhiyo obe mamunawo