Ninagomihe Dhavi Makani

Mudhidhi onroma weyo okala vamodha na mwadhiyo obe mamunawo, ojeedhe wi vanodha makattamiho menjene. Ejoya podi opadduwa mwaha wa dhubuwelo dhottiyana dha muttu-muttu wa nyuwo, otanaalela, obe woona dhilobo dha mwigumini. Obe makattamihoya podi odha modheela nipara niina obe dhopadduwa dhahajeedhela nyuwo.

Ejo podi owukwekwettela ottiya okosa eli yonyaala, mbwenye iyo ninolagiwa na Bibilia wi ninofanyeela opemberha makattamiho ehu. (Mateu 5:23, 24) Weyo onele ofanya mukalelo wa ogomiha makattamiho awo ogalabihedha magano a Bibilia.

1 KATXOKOTXELANI MAKANIYA

TXINI ENLOGA BIBILIA: ‘Nihikalawo . . . nsaka nologa.’ (Kohelét 3:1, 7) Kakaana ekuluvelo wi osasanyedhele mudhidhi wa ologela makani. Monyaala kattiya wi mwadhiyo obe mamunawo aziwe enusosa vina mwa ejile enubuwela weyo modheela makaniya. Mudhidhi oli wotene ‘mulogege ebaribari’ na mwadhiyo obe mamunawo. (Akadda Éfeso 4:25) Masiki akala dhubuwelo dhohikala dhili muyubuweloni mwawo, kattawa efunelo ya owana. Nakulo nokurumuwa podi okosiha makaniya okala ofwaseya.​—Gano dh’olelana 15:4; 26:20.

Masiki akala weyo kunrumeela, txipo kudduwale olagiha okwela na mwadhiyo obe na mamunawo. (Akadda Kolosi 4:6) Katamela ogomiha makaniya mutanene, kuttiye ologana.​—Akadda Éfeso 4:26.

TXINI ENFANYEELA WEYO OKOSA:

• Katamela mudhidhi wi muloge makaniya

• Akala bu mudhidhi wawo wa ovuruwana, karabela efunelo ya ogwaddela mazu. Weyo onele okaana mudhidhi wawo wi ologe

2 OVURUWANE NANDA ONONELEMO

TXINI ENLOGA BIBILIA: ‘Mukwelanege n’ekalelo y’obali. Muzuzumelege ottittimihana.’ (Akadda Roma 12:10) Mukalelo onvuruwana weyo bwamakamaka. Katamela ononelamo moonelo wa mwadhiyo obe mamunawo, “mweddelagane thagaraga . . .na oviyeviha.” (1 Pedro 3:8; Tiago 1:19) Kuzivale okalaga ninga oninvuruwana. Egawodheya, kattiya okosa enlabiwe vina kanvuruwane na ofwaseya mwadhiyo obe mamunawo, obe kamukumbirhe otxokotxela makaniya mudhidhi mwina. Akala weyo onomoona mwadhiyo obe mamunawo ninga mukwawo ottiya omoona ninga mwiddani wawo, venevo kunakale muttu ‘womaguvela osilidhiwa.’​—Kohelét 7:9.

TXINI ENFANYEELA WEYO OKOSA:

• Kadhowavi bugavuruwana na zelu, masiki akala esile dhinvuruwaniwe kadhinuzivela

• Kaveda ononelamo entapulela mazuya anlogiwa. Kag’ana mukalelo onkala mwadhiyo obe mamunawo agalogaga vina oruma wa lizuna

3 KATTIDDIHEDHA MABASA

TXINI ENLOGA BIBILIA: ‘Ottidda mabasa onomuttukuwiha muttu, oddabwareya onotota osegedheya.’ (Gano dh’olelana 14:23) Orumeela na mazuvi bahi kinakwana. Nyuwo munofanyeela ottiddihedha mabasa ejile eganile nyuwo moheeli. Ejo txino poddi wukosihani ottidda mabasa ovadda vaddiddi vina okosa guru, mbwenye ejoya enele okala yopureleyamo vaddiddi. (Gano dh’olelana 10:4) Akala nyuwo munottidda mabasa vamodha ninga nikuru nowiwanana, nyuwo munele woona wi “mabasa origanela anopuriha vopitta” modheela guru dhenyu.​—Kohelét 4:9.

TXINI ENFANYEELA WEYO OKOSA:

• Kasakula ttarho gani dholabihedheya dhinvediwe wi ogomihe makani

• Mudhidhi bu mudhidhi, katanaalela odhowa wawo vasogorho