Milili Miraru Dhoroma

Akadda Izrayel anttidda mabasa otabutxa bali adhari. Yehova omuruma Mizé na Aroni wi anfwanyena Faraó muselu obu: “Thiyá nlogo nidhowe, naddirele mwiddeddereni mathanga oddithithimihana.” Faraó ohakula n’ovittukulela waye: ‘Kaddinfuna otanala dhinloga Yehova, kaddinattiye akadda Izrayel odhowa.’ Ovenya venevo, Faraó ohattiddiha aIzrayel mabasa ovadda. Yehova ohifuna wi Faraó asunzevo elobo. Weyo onoziwa ekosiliye? Iyene ohidhana Milili Kumi mw’Ijipitu. Yehova omwaddela Mizé: ‘Faraó kafunile oddivuruwana. Membesi iyene onodhowa nikome na Mwinje Nilo. Dhowa wagumanena omwaddele wi vowi kafunile ottiya nlogo naga, mwinje wa Nilo onokala nikami.’ Mizé ovuruwana, odhowa ogumana na Faraó. Faraó ohimona Aroni bagavadda mwinje wa Nilo na mukongozo waye nanda manjeya otene akala nikami. Manjeya oroma onuka, oba dhihikwa, oku akadda Izrayel bana manje ottorhorha adhela mu Nilo. Masiki dhawene, Faraó ohikodda wattiya aIzrayel odhowa.

Mvireli sumana yantero, Yehova omuruma wili Mizé wi agumane na Faraó amwaddelaga muselu obu: ‘Ogakodda ottiya nlogo naga odhowa, ddinowadhaliha anandwe mpuno mw’Ijipitu.’ Aroni ovenyihedha mukongozo waye odhulu, anandwe aroma odhala elabo yotene. Attu anowafwanya anandwe mmawani-mwawa, vakuguluni, vina mmuziyoni. Epaddi yotene yahidhala anandwe! Faraó omuloba Mizé wi aloge na Mulugu amalihe anandweya. Ohilibela wattiya akadda Izrayel odhowa. Yehova ohimaaliha muliliya, akadda Ejipitu baroma wagubela anandwe okwaya dila na dila. Elabo eroma onuka. Masiki dhawene, Faraó kattiyile nlogo wi nidhowe.

Nomala Yehova omwaddela Mizé: ‘Kamukose Aroni avade vati na mukongozo waye, ddinfuna mattaka asadduwe akale dhibu.’ Mmalelani, dhibudha dhimwadheyela dhipaddi dhotene. Akadda Faraó aroma ologa dhahi: ‘Malavi aba andela wa Mulugu.’ Faraó kafunilevi ovuruwana.