NIPADDUWO 31
Moize Na Arau Ahigumana Na Farao
MOIZE mweyeleliye wiJipito, iyene wahimpanga mbali waye Arau dhilobo dhotene mwaha wa matikiniho. Nanda Moize na Arau mwatonyihedhani Aizraeli matikiniho aba, nlogo notene nahirumeela wila Yehova wali na awene.
Mumalelani Moize na Arau aahidhowa ogumana na Farao. Awene aahimpanga iyene dhahi: ‘Yehova Mulugu wa Izraeli ohiloga: “Kathiya nlogo naga nidhowe masiku mararu, wila naddeebedhe mwiddeddereni.”’ Mbwenye Farao wahakula dhahi: ‘Kaddinimuroromela Yehova. Vina kaddinamuthiye Izraeli odhowa.’
Farao wahiludduwa, sabwani nlogo nafuna mudhidhi wa ovumela mabasa wila amwebedhe Yehova. Noona iyene wahamagelela awene olaba mothabwetxa. Aizraeli aahinvaha muladduya Moize sabwa ya mukalelo wabure weddihiwani, nanda Moize wahikubanya. Mbwenye Yehova wahimpanga iyene wila kuzuzume. ‘Ddinela ommagelela Farao othiya nlogo naga nidhowe,’ Yehova wahiloga.
Moize na Arau aahidhowa ogumana na Farao wili. Dila eji awene aahikosa ntikiniho. Arau wahivokedha vati mukongozo waye, nanda obu wahisadduwa bukala nowa enddimuwa. Mbwenye aziwi a Farao aahivokedha vina vati mikongozo dhawa, nanda vahibudduwa nowa. Mbwenye, kañgana! Nowa ya Arau enomedha nowa dha aziwi. Masiki dhaenevi, Farao kaathiyile Aizraeli odhowa.
Wahifiya mudhidhi wila Yehova amusunzihe Farao nsunzo. Weyo onoziwa mukalelo wakosiliye? Wali modheela odhana milili 10, obe makathamiho manddimuwa, mu Ejipito.
Muvireli milili dhinjidhene, Farao wahimutxemerha Moize, nanda wahiloga dhahi: ‘Kamaaliha mulili obu, nanda miyo ddinela omuthiya Izraeli odhowa.’ Mbwenye muliliya vamaalilani, Farao wahisaddula mubuwelo waye. Iyene kaathiyile nlogo nthile odhowa. Mbwenye, omagomelowa, muvireli mulili wanekumi, Farao waharuma Aizraeli odhowa.
Weyo onoziwa kadda mulili mwa milili esi kumi? Kafugula nikuku nindawo nanda ndoweni nisunze mwaha wa esene.
Obudduwa 4:27-31; 5:1-23; 6:1-13, 26-30; 7:1-13.