Mulili wa Nekumi

Mizé ohilibela wila kageyeleli omona Faraó wili. Mizé ahinatti ovenyavo vamentoni va Faraó, omwaddela dhahi: ‘Mattiyu abano analobwana otene oromaya a akadda Ejipitu, anele okwa, oromana mwana wa Faraó mpaka ana a anamalaba otene.’

Yehova oawaddela ana Izrayel wi aje mattanga. Ohiloga dhahi: ‘Mwape ana attaji a mabila obe mbuzi aana yaka modha, nikamina musigihe dhipaddi dha odhulu wa misuwo dhenyu. Namaya motxe mujena mukatte wotowa emela. Mwabale sandalia dhenyu vowi munfuna mudhowe.’ Miyo ddinoufurulani mattiyabano. Apa ana Izrayel aahitikina vaddiddi kahiyo?

Vari vamattiyu mungelo wa Yehova ohivira mmatakulu mwa akadda Ejipitu. Vatakulu vahasigihiwe na nikami odhulu wa musuwo, mwanawa woromaya wankwa. Mmatakulu mwetemwene mwasigihiwe nikami mungelo kampilemo muttu. Mirala dhotene dha ayelegi na areeliya, ahikweliwa aniwa. Kavo mwana wa akadda Izrayel wakwile.

Masiki mwana wa Faraó wahikwa. N’eji Faraó kawodhile ovilela. Ohiloga na Mizé vina Aroni: ‘Kavenyani.’ Venyanimo mwilabonimwa mpu. Dhowaní mwamwebedhe Mulugu wenyu ninga mulogelinyu. Ttukulani dhifuwo dhenyu, mudhowege!’

Vowi wali mamweri, akadda Izrayel avenya ahedda na mattiyu-na-mattiyu. Otene ali attu 600.000. Muleddonimwa, attu a vilabo dhottiyana-ttiyana ahidhowa na awene. Apa ntti nifuruleyo na akadda Izrayel!

Awene ankana mattanga yaka-yaka, obuwelaga ovuniwa wawa. Mattangaya aba ettaniwa Paskwa.