NIPADDUWO 27
Mwene Wabure Onolamulela Mu Ejipito
ALOBWANA aba ali apa anowamagelela athu olaba. Kamoone mulobwana oddu onimuwasula namalaba mmodha na muwasulo! Anamalabaya ba murala wa Yakobi, nanda antxemerhiwa Aizraeli. Nanda alobwana anamagelela awene olaba aba akudda Ejipito. Aizraeli ahidha okala adhari a akudda Ejipito. Eji yadhile opadduwa dhavi?
Mwari mwa vyaka dhinjidhene murala munddimuwa wa Yakobi wahikalawo na murenddele mu Ejipito. Zuze, oddulene wali muthu wa mpaddo munddimuwa vaddiddi mu Ejipito wanfarela mwene Farao, wahakoya awene. Mbwenye mumalelani Zuze wahikwa. Nanda Farao muswa, oddulene wakooda wafuna Aizraeli, wahidha okala mwene mu Ejipito.
Noona Farao oddu wabure wahakosa Aizraeli okala adhari. Nanda iyene wahathoma alobwana abure vina atabala wila awañganelege awene. Awene ela wamagelela Aizraeli olaba vaddiddi bagammagela Farao sidadi. Mbwenye muthengo wa Aizraeli wela winjivavi. Muvireli mudhidhi muñgonovi akudda Ejipito ahidha wova wila Aizraeli agahidha winjivana vaddiddi vina oliba vaddiddi.
Weyo onoziwa txini yakosile Farao? Iyene wahiloga na ayana abale aakamiha amambali a Izraeli agabaalaga anyenye awa, nanda wahiloga dhahi: ‘Munofanyeela ompa nyenye wotene wa mulobwana ombaaliwa.’ Mbwenye abaleya aali ayana aderetu, nanda awene kaapile anyenye abale.
Noona Farao wahigwihedha nlogo naye notene nlamulo nthi: ‘Kaathukuleni anyenye a alobwana a Aizraeli nanda mwaape. Mwathiye okalawo anyenye a ayana bahi.’ Kayali elobo yowopiya yohifanyeela oruma? Ndoweni noone mukalelo wavuniwe nyenye mmodha wa mulobwana.
Obudduwa 1:6-22.