NIPADDUWO 33
Wabuwa Nyaza Yofila
KAÑGANA eji empadduwa! Oddule ddi Moize na mukongozo waye bugwagwanyeile mu Nyaza Yofila. Abale ali na iyene kobela ejile bavuneyile ba Aizraeli. Mbwenye Farao na nikuru naye notene na anyakoddo anobwina mu nyaza. Ndoweni noone mukalelo wadhile opadduwa eji.
Ninga musunzelihu, mumaleli Mulugu wadheelana akudda Ejipito mulili wanekumi Farao wahapanga Aizraeli wila abudduwe mu Ejipito. Othamagela alobwana a Aizraeli 600.000 aahibudduwa, vina ayana enjene vamodha na ana. Vina, muthengo munddimuwa wa athu ena, abene aadhile omuroromela Yehova, aahibudduwa na Aizraeli. Awene otene aahithukula mabila awa vina mbuzi na ñgombe dhawa badhowana.
Ahinathi obudduwa, Aizraeli aahakumbirha akudda Ejipito dhabalo vina dhilobo dha nddarhama vina parata. Akudda Ejipito aahova vaddiddi, sabwa ya mulili obule womariha wadheeli awene. Noona awene aahavaha Aizraeli dhilobo dhotene dhakumbirhilani.
Muvireli masiku mañgonovi Aizraeli aahifiya va Nyaza Yofila. Venevale awene aahivuma. Mudhidhi obule, Farao na alobwana aye aahiroma okubanya sabwa ya waruma Aizraeli odhowa. Awene aahiloga: ‘Nihathiya adhari ehu odhowa!’
Noona Farao wahisaddula wili mubuwelo waye. Na omaguva iyene wahisasanyedha gareta yaye ya koddo vina nikuru naye na anyakoddo. Mumaleliye iyene wahiroma wafara Aizraeli na magareta 600 a va woka, vina magareta mena otene a Ejipito.
Aizraeli mwamoonelani Farao vamodha na nikuru naye na anyakoddo bagadheela awene, awene aahova vaddiddi. Kavaali dila yothawela. Nyaza Yofila yali mpaddi walani, nanda akudda Ejipito ela odha veneva modheela mpaddi mwina. Mbwenye Yehova wahika murabo vari va nlogo naye na akudda Ejipito. Noona akudda Ejipito kaawodha wawoona Aizraeli wila aabuddugele.
Mumalelani Yehova wahimpanga Moize wila agwagwanyedhe mukongozo waye mu Nyaza Yofila. Mwakoseliye eji, Yehova wahitota pevo ya guru yadheela omadheelo wa nzuwa. Manje a nyaza aahigaweya, nanda manjeya bakala dhirugu noku noku.
Venevale Aizraeli aahiroma weedda mu Nyaza vamathakani owuma. Yahithukula mudhidhi mwinjene wila matxikwi na matxikwi a athu vamodha na dhinama dhawa dhotene ovuneya modheela nyaza mpaka kobela yina. Omagomelowa akudda Ejipito aahiwodha wawoona wili Aizraeli. Adhari awa ela othawa! Noona mumaleli wabuwa Aizraeli akudda Ejipito aahithamagela mu nyaza.
Mwakoselani eji, Mulugu wahikosiha maroda a magareta awa okutxeya. Akudda Ejipito aahidha wova vaddiddi nanda baroma okuwa. ‘Yehova onowana mwa oderetu wa Aizraeli monisadduwela iyo. Ndoweni nibudduwemo mpu!’ Mbwenye kawali mudhidhi.
Pa veneva Yehova vampangiliye Moize wila agwagwanyedhe mukongozo waye mu Nyaza Yofila, ninga mooneliwe va nladdanihoni. Nanda Moize mwakoseliye eji, dhirugudha dha manje dhahiroma wiyela vina wakuneela akudda Ejipito vamodha na magareta awa. Nikuru notene na anyakoddo nahafara Aizraeli mu Nyaza. Nanda kavo nne ngafuna mukudda Ejipito mmodha waviluwilemo!
Muhagalelo gani wana nlogo notene na Mulugu sabwa ya ovuneya! Alobwana aahiba jibo ya omutamaalela Yehova, bagaloga dhahi: ‘Yehova ohikwaranya na opemberha wa nthithimiho. Iyene ohavokedha mu nyaza akavalo vina anameddihaya.’ Murogori wa Moize Miriamu wahimuthukula mwana ñgoma waye, vina ayana otene aahimwakulela iyene na ana ñgoma awa. Nanda bagatxetha na othaba, awene ela wiba jibo yakakene yeba alobwana abene eeba dhahi: ‘Yehova ohikwaranya na opemberha wa nthithimiho. Iyene ohavokedha mu nyaza akavalo vina anameddihaya.’
Obudduwa makapitulu 12 mpaka 15.