Matikiniho va Nyaza Yofila

Mwiwale Faraó wila akadda Izrayel adhowa, iyene otxinja murimaye. Ohatugumaniha anddimuwa a anyakoddo otene ohawaddela: ‘Mwagumanihe anyakoddo na myuvadhawa, ninfuna nagwaddele akadda Izrayel!’ Kanattiye aweneya odhowa. Iyene na anyakoddo aye ahagwaddela ana Izrayel.

Yehova wela osogorhela nlogo naye, na mattiyu walabihedha motto, na mutana walabihedha murabo. Ohafiyana o Nyaza Yofila, oawaddela wi asame venevo.

Aizrayel muttukulelani mento amona Faraó na anyakoddo aye adhaga. Ana Izrayel afugeleya, osogorho nyaza, munddunimwa, akadda Ejipitu. Awene aroma omunlela Mizé alogaga. ‘Ninokwa! Weyo oniburutxeleni mu Ejipitu?’ Venevo Mizé ohawaddela: ‘Munove, munajeriheye, jedhani moone nvunelo onauvuneni Yehova.’ Mizé wannimuroromela-wene Yehova, kahiyo?

Yehova ohapanga akadda Izrayel wi avenye. Omattiyu obule, Yehova ohimwaliha murabo battiya vari-vari, oku aIzrayel, oku akadda Ejipitu. Epaddi ya akadda Ejipitu wali eddima. Epaddi ya akadda Izrayel woneya txeza.

Yehova omwaddela Mizé wi avadena nlada naye mwinje. Nomala Yehova ohobiha pevo y’owali omattiyu wantero. Mwinjeya ohigaweya dhipaddi bili, variva pavakala dila. Muttitti wotene ohabuwela kobela yina.

Faraó na anyakoddo aye ahafwara aIzrayel mwavirani. N’eji Yehova ohazuzumiha anyakoddo a Faraó. Maroda a myuva dhawa aroma ogujuwa. Anyakoddoya ahikuwa na lizu noliba eraga: ‘Aparhimweni ndoweni nittawe! Yehova onowavunedha akadda Izrayel.’

Yehova omwaddela Mizé: ‘Katapulela nlada nawo mwinje.’ Manjeya ali ninga mukwibi, ahitweya agumana wili, ahazuzumiha anyakoddo a Faraó. Iyene na attu otene aniye ahikwa mukwelo. Mwa anyakoddo a Faraó kavo wavuluwilevo.

Kobela yina ya mwinje, muttitti munddimuwa wa nlogo na Izrayel wahivuluwa, wahitomola jibo yomuttittimihana Nabuya, eba dhahi: “Ddimwibele Nabuya. Vowi ohoniha guru dhaye na matikiniho: owabwiniha munyaza akavalo n’anyakavaloyá.” Oku attu bageba, ayanaya ela otxetta, obaga masekere na yambi. Etene asanzaya sabwa y’oziwa wila ahifuruleya.