NIPADDUWO 32
Milili 10
KAÑGANA maladdaniho aba. Kadda nladdaniho ninolagiha mulili wadhilena Yehova mu Ejipito. Va nladdanihoni noroma weyo podi omoona Arau bagavada Mwinje Nilu na mukongozo waye. Mwakoseliye ejene, manje a mmwinjeni aahisadduwa bakala nikami. Oba dhahikwa, nanda mwinjeya wahiroma onuka.
Vasogorhova, Yehova wahatota ananddwe obudduwa mMwinjeni Nilu. Aba aali mpaddi wotene—mu jugumani dha motho, mbiyani munotxiwa mikathe, vagorini dha athu—mpaddi wotene. Mwakweli ananddweya akudda Ejipito ahaapigela mpingo dhinddimuwa, nanda elaboya yannuka abene.
Mumalelani Arau wahivada vati na mukongozo waye, nanda mbwebwe wahisadduwa bukala dhibu. Esi dhilobolobo dhiñgono dhinvava vina dhinluma. Dhibu esi dhali mulili wanoraru mwilaboni ya Ejipito.
Milili dhiina dhidhilewo dhaavoreyile akudda Ejipito bahi, wathiya Aizraeli. Mulili wanonai wali wa mabulula abene aavolowa na zanddo mmanumba a akudda Ejipito otene. Mulili wanotanu wadheeli dhinama. Ñgombe na mabila menjene vina mbuzi dha akudda Ejipito dhahikwa.
Vasogorhova, Moize na Arau aahithukula munddura nanda bawazela opevoni. Obu wahatotela maputhe athu vina dhinama. Obu wali mulili wanotanu na mmodha.
Mumaleli eji Moize wahivenyihedha nlada naye odhulu, nanda Yehova wahiruma jai na maralala. Aba aali maralala owopiya akaanile Ejipito.
Mulili wanotanu na tharu wali wa nazombe munddimuwa. Mulili obu ohinathi masiki muvirelani txipo kunakalege nazombe mwinjene ninga oddulene. Nazombe oddu wahija dhilobo dhotene dhakooddile otolotxa maralala.
Mulili wanotanu na nai wali wa epipi. Mwari mwa masiku mararu epipi enddimuwa yahikuneela elaboya, mbwenye mpule mwakala Aizraeli mwahikala txeza.
Omagomelowa, Mulugu wahipanga nlogo naye wila niwazele dhipaddi dha odhulu dha milago dhawa nikami na mwana mbuzi obe mwana nibila. Mumalelani mungelo wa Mulugu wahivira mu Ejipito. Mungelo mooneliye nikami, iyene kampilevo muthu mu numba mpule. Mbwenye mmanumba motene mwahali nikami mu dhipaddi dha odhulu dha milago, mungelo wa Mulugu wahimpamo mwana wa muthaji wa muthu vina dhinama. Obu wali mulili wanekumi.
Muvireli mulili obu womariha, Farao wahapanga Aizraeli wila adhowe. Nlogo na Mulugu nahimala ovisasanyedha wila nidhowe, nanda omathiyu wene obule awene aahiroma oleddo wawa wa obudduwa mu Ejipito.
Obudduwa makapitulu 7 mpaka 12.