Joau Namakasa Dila

Joau mwana Zakariya na Elizabeti munuweliye okala namavuhulela. Yehova wamwaddela Joau wi asunzihe attu wila Mesiya wali vakuvi. Mbwenye, Joau kalaleya mmasinagoga obe musidadi, iyene walaleya mutakwani. Attu abudduwa o Jeruzalemi na mittette dha o Judeya, anninvuruwana. Joau wasunziha wila yali yaderetu attu onyanyala merelo abure, wi Mulugu akurumuwele. Ewale dhaloga Joau, atxinuwa, vina adha obatiziwa o Mwinje wa Jordau.

Joau kafunile dhorela. Iyene wabala ttebe ya kamelo vina waja midhobe (mabalaga) omwa, wamwa wiyi. Attu anninfuna vaddiddi ninga amoone. Masiki Afarizi na Asaduseyi anninveda Joau wi amwiwe alogaga dhahi: ‘Ttiyani meeddelo enyu abure, mutxinuwe. Kamuvinyengette wi nili ana Abramu kanina yottega. Nyuwoya kamuli ana Mulugu.’

Attu enjene anninvuza Joau eraga: ‘Nikose eni wi Mulugu anikurumuwele?’ Iyene ohawakula Ayuda dhahi: ‘Onna guwo bili, modha anvahe ohina.’ Onoziwa yalogele iyene dhawene? Iyene wafuna wila anamafwara aye aziwe wila akala anofuna omuhagalaliha Mulugu, jaderetu voroma wakwela attu.

Joau wahawaddela dhahi anamalogosa musoko: ‘Porhe-porhe wajela attu dhawa.’ Ohawaddela vina anyakoddo: ‘Kamurumele mabeho obe kamuloge ottambi.’

Aleviti na anyamukutto anfiyedha Joau, amvuza: ‘Weyo oli ani? Attu otene anfuna aziwe ejuwene.’ Joau ohakula: ‘Miyo ddili evolo ya ole onkuwa mwiddeddereni onakukusela attu wi anfware Yehova ninga yakosa Izaiya.’

Attu anziveliwa dhasunziha Joau. Enjiya obuwela wi iyene wali Muttikitteliwi. N’eji iyene ohapanga: ‘Munddimuwa-munddimuwaya onodha. Kaddinawodhe nne omurula sandaliya dhaye. Miyo ddinubatizani na manje, iyene onfuna obatizeni na muya wokoddela.’