Yezu Opeliwe va Gólgota

Anddimuwa a anamakutta amuttukula Yezu, afiyana vamuttegoni wa guvernadoro. Pilato ohavuza eraga: ‘Mmuttiddilena muladdu gani mulobwana oddu?’ Awene ahakula dhahi: ‘Mwinya oniviloga wi mwene!’ Pilato ohinvuza Yezu eraga: “Weyo oli mwene wa Ayuda?” Yezu omwakula dhahi: “Omwene waga kuli wa mwilaboni mpuno.”

Pilato ohimperhekela Yezu wa Herodi namattonga wa mu Galileya wi one akala odduya agahimuttiddana muladdu. Herodi kanfwanyilena muladdu Yezu, nanda ohimwiyiha wili Yezu wi adhowe wa Pilato. Apa Pilato ahapanga attuya dhahi: ‘Nne miyo, nne Herodi kaninfwanyilena muladdu muttu oddu. Ddinfuna ddimutapule.’ Muttitti ohikuwa dhahi: ‘Apiwe! Apiwe!’ Anyakoddo ahinvada Yezu na miwasu-wasu, ahinvadana silipa, amulata. Awene amwabaliha kara ya minga, nanda ahimbedda eraga: ‘Moyo, mwene wa Ayuda.’ Pilato ologana muttittiya: ‘Baddi miyo kaddimuttiddilena muladdu muttu oddu.’ Awene ahikuwavi eraga: ‘Akomeliwe!’ Nona, Pilato ohimperheka Yezu wi apiwe.

Attuya amuttukula Yezu adhowana mburo wakuweliwa Gólgota, amukomela vapingirhizini, avenyiha muriya. Yezu olobela: ‘Baba, kaleveleleni, sabwa aweneya kanziwa dhinirani.’ Attuya amwaredhana Yezu, alogaga: ‘Akala weyo oli Mwana Mulugu, kakitavo vamurini apo valiwe! Kavivune-to.’

Timbwini mmodha wakomeliwe na Yezu ohiloba dhahi: “Muddubuwele miyo mugafiya mumweneni mwenyu.” Yezu omwakula: “Onokala na miyo [mparaizo.]” Mutxiguwonimwa wahikala yihi yakuneli elabo yotene yamalile wora ttaru. Anamasunza eena na Maria mai wa Yezu, ahimela vakuvi va muriya wakomeliwiye. Yezu omwaddela Joau wi amukoye Maria amoonaga ninga ddi maye-maye.

Omamalelowa Yezu ohiloga dhahi: “Dhetene dhipula!” Oworamiha musorho, omariheya. Mudhidhene obo elabo ettekenyeya na guru. Guwu yolémela yali mumparhani yagawa mburo Wokoddela na Wokoddela-koddela etaya vari. Munddimuwa wa anyakoddo osiba eraga: ‘Txibarene oddu wali mwana Mulugu.’