NIPADDUWO 101
Yezu Ohipiwa
KÃNGANA elobo eji yowopiya empadduwa! Yezu onopiwa! Awene ahimwika va pingirizini. Mithotho dhihivolowa mmadani vina mmanyaloni mwaye. Muthu muthuvi agafunelini omukosela eji Yezu?
Sabwani athu ena anomwidda Yezu. Weyo onowaziwa animwiddaya? Mmodha mwa awene ddi mungelo oddule wabure Satana Ddiabo. Ddi oddule wawodhile omukosiha Adamu na Eva onvanya Yehova. Nanda Satana ddi oddwene wakosihile amwiddani a Yezu okosa opanga obu wowopiya.
Masiki Yezu ahinathi okomeliwa va pingirizini apa, amwiddani aye ahimukosela dhilobo dhabure. Onowubuwela mukalelo wadhilani mmunddani mwa Jetsemani nanda bamuthukula badhowana? Amwiddani abale aali aani? Indde, awene aali asogorheli a relijiau. Ndoweni noone txini epadduwile vasogorhova.
Yezu muthukuleliwiye na asogorheli a relijiau, arumiwi aye ahithawa. Awene ahimuthiya Yezu yeka na amwiddani aye, sabwani awene ahidha wova. Mbwenye murumiwi Peduru na Joau kadhowiletxe wolapela. Awene anowafara wila oone txini enimpadduwela Yezu.
Anamakutha ahimuthukulela Yezu wa kalaba ontxemerhiwa Anaji, oddwene waligi namakutha munddimuwa. Veneva muthithiya kugoneelivo. Vasogorhova awene ahimuthukula Yezu badhowana vatakulu va Kaifa, oddwene oli namakutha munddimuwa ovanene. Asogorheli enjene a relijiau aahimala ogumana vatakulu vaye.
Veneva vatakulu va kaifa awene anothonga. Aahidhiwana athu wila aloge dha othambi mwaha wa Yezu. Asogorheli otene a relijiau ahiloga dhahi: ‘Yezu onofanyeela opiwa.’ Mumalelani ahimuturela mara okoveni waye, vina ahimbubudda na dhivwedde.
Esi dhotene badhigapadduwa, Peduru oli otakulu va tamuni. Obu omathiyu wa oridha, noona athu ahigasa motho. Oku bagotha ozugunuwa mothoya, mwimeleli wa mwanamuyana ohimwañgana Peduru, nanda ohiloga dhahi: ‘Mulobwana oddu vina wali na Yezu.’
Peduru ohakula dhahi: ‘Nne, miyo kaddali na iyene!’
Athu ahimpanga Peduru dila tharu wila iyene wali na Yezu. Mbwenye kadda dila Peduru ohiloga wila eji kayo ebaribari. Dila yanoraru elogile Peduru eji, Yezu ohizugunuwa bamwañgana iyene. Peduru ohiriba murima vaddiddi sabwa ya ologa dha othambi esi, nanda ohidhowa olila.
Nzuwa muromelani opathuwa siku na Txisanu membesi, anamakutha ahimuthukulela Yezu omburoni wawa munddimuwa wa banja, o numba ya Sinedriyu. Veneva awene ahilogela ejile enfunani omukosana iyene. Awene ahimuthukulela wa Ponsio Pilato, mulamuleli wa kwathi ya Yudea.
Anamakuthaya ahimpanga Pilato dhahi: ‘Mulobwana oddu ddwabure. Iyene onofanyeela opiwa.’ Mumaleliye omukosa Yezu mavuzo, Pilato ohiloga dhahi: ‘Kaddinoona eloboya yabure ekosiliye.’ Mumaleliye Pilato ohimuruma Yezu wa Erodi Antipa. Erodi ddi mulamuleli wa Galilea, mbwenye iyene onkala o Yeruzalemi. Erodi vina koonile wene elobo yabure yakosile Yezu, noona iyene ohimwiyihedha wa Pilato.
Pilato onfuna amuthiye Yezu adhowe. Mbwenye amwiddani a Yezu anfuna wila mfugeliwi mwina athiyiwe odhowa vamburoni va Yezu. Mulobwana oddu ddi mbava ontxemerhiwa Baraba. Pilato mumburutxeliye Yezu otakulu yali mutana. Iyene ohapanga athu dhahi: ‘Kamooneni! Mwene wenyu!’ Mbwenye anamakutha anddimuwaya ahikuwa: ‘Kadhowanina! Kampeni! Kampeni!’ Noona Pilato ohinfurula Baraba, nanda awene ahimuthukula Yezu badhowana wila apiwe.
Omutana bugaroma wene siku na Txisanu Yezu ohikomeliwa va pingirizini. Mbwenye kadda epaddi ya Yezu wahikala panga oddwene onkooddiwe omoona wathongeliwe okwa va pingirizini. Mudhidhi muñgonovi Yezu ahinathi okwa, pangaya mmodha ohiloga dhahi na Yezu: ‘Kaddubuweleni mugavolowa mu omweneni mwenyu.’ Nanda Yezu ohakula dhahi: ‘Ddinowulibelela wila weyo onela okala mParaizu.’
Kayo nlibelo notikiniha? Weyo onoziwa paraizu gani onimwaddana Yezu? Paraizu wamukosile Mulugu omaromo wali wuvi? Indde, wali velaboni ya vati. Nanda Yezu agalamulelaga odhulu ninga mwene, iyene onela onvenyiha mulobwana oddu wila akalewo wili yawila amujevo Paraizu muswa velaboni ya vati. Kaninfanyeela ohagalala sabwa ya ejene?
Mateus 26:57-75; 27:1-50; Lukas 22:54-71; 23:1-49; Joau 18:12-40; 19:1-30.