Arumiwi Anowakela Muya Wokoddela

Mvireli malabo kumi, Yezu beyeleli wirimu, anamafwaraye ahakela muya wokoddela. Yali yaka ya 33 E.C., attu a dhilabo dhinjene ahidha o Jeruzalemi wi amuje Paskwa. Wahikala anamasunza 120 a Yezu aali mukambirhinyani ya odhulu. Saddu opadduwa elobo yorurumutxa. Vamusorho va kadda namasunza vahoneya elobo yakala ninga nigalume na motto. Mbamwa mwahidhala pevo yaruma ninga pevo ya mutokora.

Attu a dhilabo dhottiyana-ttiyana aahiwa orumawa nona ahittamagela mbamwa wi one yapadduwile. Vawiwalani anamafwara alogaga dhilogelo dhawa, ahitikina vaddiddi. Aloga anya-anya eraga: ‘Attu aba kahiyo akadda Galileya? Enwodheya dhavi ologa vilogelo dhehu?’

Pedro na anamafwara ena ahimela osogorho wa muttittiya. Pedro ohawaddela attu mukwelo wakwile Yezu, nanda Yehova onvenyiha mu okwani. Iyene ohenjedha: ‘Ovano Yezu oli wirimu omononi woja wa Mulugu nanda iyeneya ovahiwa muya wokoddela. Jijene enonelinyu matikiniho aba.’

Dhalogile Pedro dhahattidda vaddiddi attu murima ofiyedha omvuza dhahi: “Nikose eni?” Iyene ohawakula: ‘Mutxinuwe muttiye dhottega dhenyu, mbatiziwe mwa nzina na Yezu. Mugera dhawene munere wakela mvaho wa muya wa Mulugu.’ Mujeruzalemi anamasunza ela wenjedhedheya siku-siku. Na nikamihedho na muya wokoddela, arumiwi anwodha wita milogo dhinji, dhakosiha wakwaniha mazu a Yezu a ovirihamo dhetene dhalogiliye.