NIPADDUWO 105
Ojeedha Mu Yeruzalemi
ATHU aba ali apa awene anamafara a Yezu. Awene ahimwiwelela vina ahikala mu Yeruzalemi. Nanda otene bagajeedhela vamodhavi, onyagula ohidhaala numba yotene. Eji enruma ninga pevo ya guru vaddiddi. Nanda mumalelani malumi a motho ahiroma othwanyuwa vamusorho va kadda namasunza. Onowoona mothoya vadhulu va kadda muthu? Esi dhotene dhintapulela eni?
Nthi ntikiniho! Yezu ohiyelela odhulu oli na babi waye, nanda iyene onowakuthulela anamafara aye muya wokoddela. Weyo onoziwa txini enawodhiha muya obu okosa? Awene otene ahiroma ologa dhilogelo dhothiyana thiyana.
Athu enjene mu Yeruzalemi ahiwa onyagula warumile ninga pevo ya guru vaddiddi, nanda awene ahidha woona ejile empadduwa. Athuya ena ba dhilabo dhiina abene adhile veneva va mathangani a Pentekoste a Aizraeli. Aleddo aba ahikaana yorurumutxa enddimuwa! Awene ahawiwa anamasunzaya bagaloga dhilogelo dhawa mwaha wa dhilobo dhotikiniha dhakosile Mulugu.
Aleddoya ahiloga dhahi: ‘Athu aba otene ba mu Galilea. Ki anwodha dhavi ologa dhilogelo esi dhothiyana thiyana dha dhilabo dhidhile iyo?’
Ovanene Peduru ohiimela wila aatapulele awene. Iyene ohiweliha lizu naye nanda ohapanga athuya mukalelo wapiwe Yezu vina yawila Yehova wahinvenyiha mu okwani. Peduru ohiloga dhahi: ‘Ovanene Yezu oli odhulu o mononi woja wa Mulugu. Nanda iyene ohikuthula muya wokoddela waroromelihiwe. Ji sabwa ya ejene enoonelinyu vina eniwelinyu matikiniho aba.’
Dhaene, Peduru mulogeliye dhilobo esi, athu enji ahikaana thagaraga sabwa ya ejile yakoseliwe Yezu. Awene ahivuza dhahi: ‘Txini enfanyeelihu okosa?’ Peduru ohapanga dhahi: ‘Munofanyeela osaddula egumi yenyu nanda mubatiziwe.’ Noona sikunene nthile othamagela athu 3.000 aahibatiziwa nanda bakala anamafara a Yezu.