Kiyalivo Elobo Yattihile Olaleya

Malabo otene mulobwana dhahi wahawodha wedda wangilati vamulago wa mparha. Omutana dhahi iyene ohimoona Pedro na Joau bagavolowa mumparhani. Iyene ohaloba eraga: ‘Ngani, kaddivaheni elobo yoja.’ Pedro omwakula: ‘Ddihikaana elobo yaderetu enfunemi ouvaha opitta kobiri. Mwa nzina na Yezu kavenya wedde!’ Pedro mulogeliye dhawene, omuttidda mulobwanaya onvenyiha, nanda iyeneya ohiroma wedda. Muttitti walivo ohiziveliwana matikiniho aba mpaka attu enjiya okala anamafwara.

Anamakutta na Asaduseyi kaziveliwe. Ahattidda anamafwaraya, ahattebela omuttegoni, ahavuza: ‘Bani ouvahileni guru dhonvulumutxana muttu oddu?’ Pedro ohakula: ‘Onivahile gurudha ddi Yezu Kristu ole ompilenyu.’ Anamakuttaya ahikuwa eraga: ‘Apa kammulogevo Yezu!’ Apo arumiwi ahakula: ‘Iyo kaninattiye omuloga Yezu. Ninomulogavi.’

Pedro na Joau mutapuleliwani, ohidhowa wafwanya arumiwi ena bapanga dhapadduweli. Awene ahilobela otene amukumbirhaga Yehova eraga: ‘Nabuya nikamihedheni oliba murima wi nikosevi mabasa enyu.’ Yehova ohavaha muya waye wokoddela, awene adidelavi olaleya na wavulumutxa attu. Apo muttitti mwinjene wa attu ohikala anamafwara. N’eji Asaduseyi ahisilidhiwa vaddiddi nanda ahattidda anamafwara ahafugeliha mukambura. Yehova ohimuruma mungelo namattiyu-namattiyu, odhowa ofugula misuwo dha kamburaya, ohawaddela eraga: ‘Eyelelaní mumparhani mwasunzihemo attu.’

Mumenbesinimwa, anddimuwa a muttego wa Sinedriyu ahaddeliwa wila: ‘Attu afugelinyu mukambura avenyamo, oku kamburaya jili yofugiwene. Aweneya ali mumparhani, anasunziha attu ali mwenemo.’ Asaduseyi ahattiddiha anamafwara dila yanawili ahakukusela o Sinedriyu. Namakutta munddimuwa ohawaddela eraga: ‘Kanuwaddelini wi munaloge vina nzina na Yezu?’ Pedro ohakula: “Enfuneya kumuroromela Mulugu opitta athu.”

Asogorheli a relijiau ahisilidhiwa vaddiddi afunaga wapa anamafwaraya. Mbwenye Mfarizi dhahi wakuweliwa Gamaliyel ovenya ologa dhahi: ‘Porhe-porhe! Mundhaga owana na Mulugu. Sabwa Mulugu oli na attu aba.’ Awene ahiwelela malago aye. Ahattidda arumiwi ahatxupurha na wasuwasu, ahawaddela wili wi atxelele olaleya, ahattiya odhowa. Masiki dhawene, awene katxeleli olaleya. Awene ansabela olaleya noliba murima, mumparhani vina numba-numba.