NIPADDUWO 106
Oburutxiwa Mu Kambura
KAMWAÑGANE mungelo oddu apa bathiddeeli musuwo obu wa kambura ofuguwile. Alobwana aba anaburutxiye ba arumiwi a Yezu. Ndoweni noone txini yakosihile awene ofugeliwa mu kambura.
Ovirile mudhidhi muñgonovi ovenya mudhidhi wakuthuleliwe anamasunza a Yezu muya wokoddela. Nanda epadduwile ji eji: Omutana dhahi Peduru na Joau anovolowa mu mparhani mu Yeruzalemi. Venevale, waddamela musuwoya, vahikala mulobwana oragali ovenya obaaliwa waye. Athu anomuthukulela veneva masiku otene wila aakumbirhege kobiri abale anvolowa mu mparhani. Mumooneliye Peduru na Joau, iyene ohakumbirha wila anvahe elobo. Arumiwiya anakose eni?
Awene ahiimela bamwañgana mulobwana oddu mutabuwi. Peduru ohiloga dhahi: ‘Kaddina kobiri, mbwenye ddinela wuvaha ejile ena miyo. Mu nzina na Yezu, kavenya weedde!’ Mumaleliye Peduru ohimuthidda mulobwanaya nlada na oja, nanda venevale ohilupa vina ohiroma weedda. Athu moonelani eji, awene ahuma milomo vina ahiziveliwa vaddiddi sabwa ya ntikiniho nthi na wumiha milomo.
Peduru ohiloga dhahi: ‘Nikosile ntikiniho nthi na ewodhelo ya Mulugu, oddwene onvenyihile Yezu mu okwani.’ Iyene na Joau bagaloga, asogorheli dhahi a relijiau ahifiya. Awene ahiludduwa sabwani Peduru na Joau anowapanga athu mwaha wa ovenyihiwa wa Yezu mu okwani. Noona awene ahathidda arumiwiya nanda ahavolotxa mu kambura.
Mmangwananimwa asogorheli a relijiau ahikosa banja enddimuwa. Peduru na Joau, vamodha na mulobwana oddule wanvulumutxilani ahivolotxiwa. Asogorheli a relijiau ahavuza dhahi: ‘Na ewodhelo gani ekosilinyuna ntikiniho nthi?’
Peduru ohapanga wila ntikiniho nthi nikoseyile na ewodhelo ya Mulugu, oddwene wanvenyihile Yezu mu okwani. Anamakuthaya kanziwa yokosaya, sabwani awene kanwodha okoodda yawila ntikiniho nthi na wumiha milomo nahipadduwa wene txibarene. Noona awene ahalaga arumiwiya wila ahilogege viina mwaha wa Yezu, mumalelani ahathiya awene odhowa.
Na ovira wa masiku arumiwi ela olaleyavi mwaha wa Yezu vina bagaavulumutxavi aredda. Muselu mwaha wa matikiniho aba ohivuwa. Masiki mithithi dha athu a sidadi omuzugunuwa Yeruzalemi ahidhana aredda wila arumiwi aavulumutxe. Eji ehakosiha asogorheli a relijiau okaana aje, noona awene ahathidda arumiwiya baavolotxa mu kambura. Mbwenye aweneya kagoneelimo.
Na omathiyu mungelo wa Mulugu ohifugula musuwo wa kamburaya, ninga munooneliwe apa. Mungeloya ohiloga dhahi: ‘Kadhowani mwemele mu mparhani, vina mwapangegevi athu.’ Mmangwananimwa na membesi, asogorheli a relijiau mwarumelani alobwana mu kambura wila aathukule arumiwi, aweneya kamo. Vasogorhova alobwana abale aafanyile arumiwiya bagasunziha mu mparhani nanda ahathukulela o numba ya Sinedriyu.
Asogorheli a relijiau ahiloga dhahi: ‘Iyo nahurumani wene wila muhisunzihe viina mwaha wa Yezu. Mbwenye nyuwo muhimudhaaliha Yeruzalemi na nsunziho nenyu.’ Mumalelani arumiwi ahakula: ‘Ninofanyeela omwiwelela Mulugu ninga mulamuleli othiya wawiwelela athu.’ Noona venevo s’ohigoneela ahidhowavi bagasunziha “bili yaderetu.” Eji kayo yotagiha yaderetu wila nifarege?