Kasakula Okamihedha Omwene wa Mulugu Ovanene!
Karoma wubuwela dhahi, weyo oziwa wi muneri onowaddamela mmuruddani mwawo. Vasongorhova wiwa muselu wa alamuleli, muradiyoni peno mutelevizawuni ologaga wi: “MUTTAWE! MUTAMELE VOTTAWELA OVANENE!” Elobo gani yamalago egakosile weyo wila ovuneye? Txibarene, ogahitamela mburho wottawela.
Na mukalelo wakakene, iyo notene ninkala mudhidhi wa “ezini” yawopiha, Yezu ohittuva ezini eji nzina na ‘goyi enddimuwa.’ (Mateu 24:21) Kinakwana iyo okalela ottawavi goi eji enddimuwa. Mbwenye enowodheya otamela vottawela wi nivuneye. Ninattawelo wuvi?
Yezu akosaga Diskursu yaye ya Vamwangoni, ohiloga mazu anwodha onittawiha; iyene ohinikokomeza dhahi: “Tamelaní voroma Omwene wa Mulugu na wira enfuna iyene; dhinagu dhetene munowenjedhedhiwa.” (Mateu 6:33) Omwene wa Mulugu ontameliwa dhavi?
Tamela voroma Omwene wa Mulugu. Kuloga ninofwanyela ozuzumela voroma Omwene wa Mulugu. (Mateu 6:25, 32, 33) Sabwaya jani? Sabwa yawi alamuleli a mwilaboni kanwodha ogomiha masoso ampadduwa. Omwene wa Mulugu bahi bunawodhe okosa mabasa aba orutxa.
Wira enfuna iyene. Iyo ninofwanyela okosa guru ofiyedha vanwodhihu, wi neddegena malamulo a Mulugu. Sabwa yani? Sabwani opwaza malago a Mulugu obe ogana mmirimani mwehu okosa enonihu wi eji japama eji jabure, enonittukulela wuputtuwani. (Gano 16:25) Eji enottiyana na wiwelela malamulo a Mulugu, vowi oniwelela malamulo aye kankalela omuhagalalihavi, nne, onopurelamo vina.—Izaiya 48:17, 18.
Tamela voroma Omwene wa Mulugu na wira enfuna iyene. Yezu ohatutela attu wi akale mento, anadhe ozuzuma afiyedhaga okuluvela kobiri na yubuwelo yawi enela wabarela. Ena anozuzumelaga dha musogorho ofiyedha ohikana mudhidhi wa otamela voroma Omwene wa Mulugu.—Mateu 6:19-21, 25-32.
Mbwenye Yezu ohikuluveliha wi ole onedda mumodhani na Omwene wa Mulugu onela ovahiwa dhinimujombela ovanene vina onela wakela mareliho okala nokala-wene musogorho munddowihu.—Mateu 6:33.
Masiki eziweyaga wi anamafwara a Yezu a masaka zana oroma anzuzumela voroma Omwene wa Mulugu na wira enfunani, awene koni ogoma wa goyi dhatabutxa. Mbwenye ahibareliwa venjene. Abareliwe dhavi?
Awene eddihiwa na malamulo a Mulugu, nona anwodha orabela masoso afwanya abale akodda weddana malamulo a Mulugu. Ororomela wi Omwene wa Mulugu ogahidha, wanakamihedha okwaranya masoso menjene. Mulugu wahavaha vina ‘owodha onddimuwa’ wa owanana dhorutxa dhafwanya.—2 Korinto 4:7-9.
ONELA OTAMELA VOROMA OMWENE WA MULUGU?
Akristu a masaka zana oroma ahiwelela dhoruma dha Yezu dhawi jofuneya otamela voroma Omwene. (Kolosi 1:23) Awene ahilaleya muselu wa Omwene wa Mulugu mwilaboni mwetemwene. (Kolosi 1:23) Akalawo anira yakakene masaka abano?
Ndde! Anamona a Yehova anoziwa wi ovanene Omwene wa Mulugu onela oroma olamulela elabo ya vati. Nona awene anokosa guru wi akwanihedhe mazu a Yezu awi: ‘Muthaka obu wapama wa Omwene wa Mulugu onela olaleyiwa elabo yotene wi malogo etene ewe, ngamala panafiye ogoma w’elabo.’—Mateu 24:14.
Txini enakosiwe ogewa muselu wapama wa Omwene wa Mulugu? Malago anuwaddelihu bawi, onofwanyela watagiha akristu a masaka zana oroma akala o Masedónia n’o Bereya. Mmwiwalani murumiwi Paulo alaleyaga muselu wapama wa Omwene wa Mulugu, awene “ahakela nzu na Mulugu na mada omeli.” “Malabo etene antugumanela ononelamo Malebo okoddela” wi one akala mazuya anniwanana na esile dhamwiwanina Paulo; vasongorhova “enjeneyamo arumela nzu.”—Merelo 17:11, 12.
Enowodheya weyo okosa yakakene. Ogatamela voroma Omwene wa Mulugu na okosa ofuna waye, onela ofwanya nibarelo masaka abano vina onela ojavo murenddele wohigoma na nibarelona musongoro mpo.