“Okaanevi Mweddelo Wofanyeelela Vari va Amalabo”
1. Ekaleleni yamakamaka okaanavi mweddelo wofanyeelela mudhidhi wa matugumano andawo?
1 Vyaka dhotene ninowakwekwetta attu mudhidhi wa matugumano a kwatti, mwadhahene jamakamaka wi mweddelo wehu olagihe nriho na Mulugu onimwebedhihu. (Anam 20:26) Mikalelo dhehu dhaderetu ninga ovisasanyedha egawodheya wooniwa ninga anamafara a ebaribari a Kristu. Mudhidhi onoona iyo matugumano a kwatti obe matugumano a kwatti na attu a dhilabo dhina andawo, iyo ninakaane ‘mweddelo wofanyeelela vari va amalabo’ dhahene ninele onvaha nttittimiho Babi wehu wa wirimu?—1 Ped 2:12.
2. Gari gani ya olagiha mweddelo wa Okristu enakaane iyo mudhidhi wa mutugumano wa kwatti?
2 Kalagiha Ekalelo ya Mukristu: Okwela onlagiha iyo muttu na mukwaye vina na mukalelo onatamaalelihu attu eena “vari va attu ahili Akristu” ninolagiha ottiyana na mukalelo onivittukulela a mwilaboni. (Kol 3:10; 4:5; 2 Tim 3:1-5) Jamakamaka wi nikale attu aderetu vina ovilela mudhidhi ologana iyo abale anlaba mu hoteli vina anamalaba anvahedha dhoja, masiki agakalawo makattamiho. Mikalelo dha oleleya dhinolagiha wi iyo ninofanyeela omuttiyedha mukamihedhi wa mburoya korowa.
3. Nubutxedho gani ninvahiwa ababi, vina sabwaya jani?
3 Ababi agafanyeela wawag’anela anawa na mukalelo wofanyeela vamburoni wa matugumano a kwatti, munumbani mungulihiwa oja, vina mwego mungoniwa. (Gano 29:15) Muyana mmodha wali mwag’aneli wa numba munjiwa vina mungoniwa wahawaddela atelani dhahi: “Miyo mwebaribari ddinokwela nlogo nenyu. Anamudhi enyu na anenyu attu ooleleya deretu vina ahikaana mikalelo dhofanyeela. Nikuru notene na mabasa ninowulogani nyuwo vina iyo nanfuna wi nyuwo mukalege veneva sumana dhotedhene.”
4. Nigakala vasidadi ya matugumano a kwatti, na mukalelo gani jofanyeelela wag’anela okoddela wa mwabalo wehu?
4 Guwo Dhofanyeelela: Guwodhehu mudhidhi wa matugumano a kwatti dhinofanyeelela okala dhaderetu, wi nilagihe ottiyana na mukalelo wa elabo. (1 Tim 2:9) Masiki nigafiyaga obe nigabudduwaga vina mwari mwa mudhidhi wovuma mutugumanoya ohinatti vina ogamala, iyo ninofanyeela orabela dhabalo ninga attu amwilaboni. Dhahene iyo ninele wagalala na crachá dhinabalihu dha mutugumano vina kaninakaane manyazo nigakaana gari ya ovaha onamoona. Mwabalelo wehu wokoddela vina mukalelo wofanyeelela mudhidhi onoona iyo matugumano andawo onela wakwekwetta attu amurima wofiyedheya na muselu wa Bibilia onvuna egumi mbwenye vina enele omwagalaliha Yehova.—Sof 3:17.