Mubutxedho wa Mutugumano wa Ttattamwa
◼ Mudhidhi: Misuwo dha mburo wa mutugumano wa ttattamwa dhinafuguliwe 7:00 wa membesi. Jibo yofugulana enarome 8:20 wa membesi malabo o’mararu. Mwa mudhidhene obo, notene ninofanyeela wi nigilati vamburoni vehu wi porograma erome na mukalelo wofanyeelela. Ishano na Sabuddu jibo na nlobelo nomariha ninakosiwe mudhidhi wa 15:55 wa txuguwo. Mbwenye Ddimingu enakale 14:45 wa txuguwo.
◼ ‘Omuttittimihe Yehova Na Jibo’: Oroma masaka a wale attu a nlogo na Mulugu annimuttittimiha Yehova modhela jibo, masaka abano vina jibo enodhowavi bigakosa epaddi yamakamaka mwari mwa webedha webaribari. (Masal. 28:7) Dhipaddi dhotene dha mutugumano wehu wa ttattamwa dhinroma na jibo entonyihedha wi mutugumano onfuna orome. Esodha kahiyo jibo-jibovi mbwenye dhisasanyedhiwe wi dhinisunzihe vina dhikose epaddi ya omwebedha Yehova. Akala mwimeleli wa epaddi onologa wi muzika onfuna orome, oboya mudhidhi wa ogilati wi nivuruwane na ntamaalelo. Nigakosa ejuwene ninolagiha wi ninowika ttima guru dhinkosa nikuru ntti na Watchtower ninsasanyedha jibo. Dila bili wa kadda yaka abali aba na arogora anokosa oleddo alabihedhaga kobiri dhawa adhowaga o Patterson, New York, wi asasanyedhele vina agaravari jibo dhonagalaliha. Nigamala ovuruwana porograma yotene ya jibo, notene ninofanyeela ovitaganyiha wi nimuttittimihe Yehova nivenyaga vina niibaga jibo dhehu dha Omwene.
◼ Mburo Wokoya Mikukutta (myota na sikaleta): Mimburo dhotene munkosiwa mutugumano wa ttattamwa mwenemo munang’anela iyo muhikala mimburo dhottiyamo mikukutta, nanda mburoya kumpitxeliwa kobiri. Vowi mburoya mung’ono abale ana mikukutta nanda anziwa wila ankala murudda mmodhene anofanyeela okosa masasanyedho wi adhowe na mukukutta mmodha wi eena akaane mburo.
◼ Okoya mburo: Misuwo dha vamburoni wa mutugumano wa ttattamwa dhigafuguliwa na membesi, munokumbirhiwa wi kamuttamagele osakula mburoya wofuna wenyu ninga mavurhano na anamewa eena. Munokumburhiwa wi mwatanaalele attu eena, muttiye wi dhofuna dha abalihu dhikale dhamakamaka opitta dhehu. Muya wa ovivelela onittukulela okosa oderetu wa attu eena ononivaha ezinddiyelo ninga Akristu ebaribari vina onowakosiha abale annoona ofiyedha omuttittimiha Mulugu. (Joau 13:34, 35; 1 Kor. 13:5; 1 Ped. 2:12) Mimburo dhikoyeliwe bahi abale ankala murala mmodhene obe ankosa oleddo mukukutta mmodhene obe akala namasunza wawo wa Bibilia. Onokumbirhiwa wi onattiye elobo mburo ohinfuna weyo okoya, weyo ogakosa ejuwene eena anele oziwa wila mburoya kuna mwinya. Mburo dha vawoka dhikoyeliwe akalaba na aredda. Vowi mimburo esi kadhinakwanela, mbwenye muttu mmodha obe eli animukamihedha mureddaya obe kalaba anofanyeela ogilati na iyene.
◼ Mukalelo Wowabala: Mudhidhi wa mutugumano wa ttattamwa ninofanyeela okaana mukalelo waderetu wa wabala, ottiya wabala ninga munkoselani attu a malogo. (1 Tim. 2:9) Masiki akala mudhidhi wovuma obe porogarama ya mutugumano ehinatti oroma ninofanyeela orabela wabala na ekalelo yovipwaza. Mwa venevo ninofanyeela okaana karasha yehu vina kaninakaane manyazo a ovaha onamona egakalawo gariya. Ekalelo yehu ya wabala vamodha na dhokosa dhehu nigoonaga mutugumano wa ttattamwa enowavavutxa attu a murima wofwasa ovuruwana miselu dhinvuna egumi dhindela Mbibiliani vina enomwagalaliha Yehova.—Sof. 3:17.
◼ Mikalelo Dhapama Dholabihedha Dhipano Dhehu Dhoruma: Ninolagiha mikalelo dhapama mudhidhi onoonihu porograma modheela osasanyedha mittitto dhehu obe dhipano dhoruma wi dhinadhe dhazuzumihe attu eena. Akala ninolabihedha epano yopidana mafoto obe vidiyu obe dhipano dhiina dhoruma egahikala yaderetu olabihedha nihazuzumihaga attu eena obe wapibela omentoni wawa. Ninolagiha mikalelo dhapama vina modheela okoodda ovahedha miselu na muttitto obe dhipano dhiina dhoruma mudhidhi onoonihu porograma.
◼ Arhimoso: Munokumbirhiwa wi mudhena dhoja dhenyu ottiya ovenyavo vamburoni wa mutugumano wa ttattamwa muttamagelaga oja na mutana mudhidhi wovuma. Kolmeni enakwanela ohela mutxiddo mwa mpaddo jimfanyeela olabihedhiwa. Kolmeni dhinddimuwa obe dhobo dha viduru kadhinrumeeliwa odhiwana vamutugumanoni a ttattamwa.
◼ Nvaho: Iyo poddi olagiha matamaalelo ehu na masasanyedho a mutugumano a ttattamwa mwa okosa nvaho wovivelela wa mabasa a elabo yotene vamatugumanoni. Cheki nili notene ninofanyeela opitxeliwa wa “Associação das Testemunhas de Jeová de Moçambique.”
◼ Mirobwe: Akala weyo onoja mirobwe dha osipitale, onokumbirhiwa wi odhena dhinufanyeelela, sabwa yawi kadhinakalevo vamburoniva vankosiwa mutugumano wa ttattamwa.
◼ Sapatto: Jamakamaka osakula sapatto dhofanyeelela, dhihimpiha manyalo dhinuttiya weedda na nibarelo.”
◼ Jangarha na Queira Visitar (S-43): Jangarha na Queira Visitar ninofanyeela olabihedhiwa wi nivahe miselu dha dhowakula dhittiddiwe modhela onamoona wa gari mudhidhi wa mutugumano wa ttattamwa. Majangarhaya attikittiwe vina nivahedheliwe mparha wa manivuru obe nivahiwe mulebi wa mulogo wawo ogeyelela vatakulu.
◼ Numba Mungulihiwa Dhoja: Ottittimihe nzina na Yehova na mweeddelo wawo wofanyeelela munumbani mungulihiwa dhoja. Wabale na mukalelo wofanyeelela ninga murumiwi wa Kristu. Kamutamaalele mukamihedhi wa mburoya na kobiri egakala elemeelelo.
◼ Masasanyedho a Wattambirha Aleddo: Labo na mutugumano wa ttattamwa nihinatti ofiya, nikuru na wattambirha aleddo ninoroma olaba nikosaga masasanyedho wi aakamihedhe abale otene ankumbirha vokala. Masasanyedho aba anowenjedhedha wagalala wehile iyo mwa okala vamodha ninga Akristu. Mwa dhahene nigatanaalelaga wi ‘dhilobo dhotene dhineedda mofanyeelela na masasanyedho’, vina wakaanela oderetu attu eena alivo, mubutxedho meena bofuneya. Abale ali aleddo vatakulu va abali anofanyeela wagalala na ejile envahiwani vina ewelele na esile dhili dhofuneya. Awene anofanyeela okoddeliha mburo ovahiwani malabo otene ahinatti odhowa omutugumanoni wa ttattamwa vina ahinatti opaganya wi eyelele mmawani. Okala wa muleddo vatakulu va mbali, kahiyo onvaha muttorho mwanamuralaya wi awusapele. Ekalaga dhahene, muttu-muttu onofanyeela okosa masasanyedho mwa mpaddi obu. Wiwanana wehu na ononelamo makaniya aba anonittiya wi anamattambirha aleddo wi awakele aleddoya na ofuru ottiya okala ninga elobo yomageleliwa. Na mukalelo wakakene, abale anahale vamburoni va mutugumano wa ttattamwa anofanyeela wawiwelela abale anlaba ninga anamatonyihedha mburo wi awodhe okoddeliha mburoya wa mutugumano wa ttattamwa malabo otene.—1 Kor. 14:40.