Makalelo Otikiniha a Matratado Maswa!
1. Elobo gani eji ya mmabasani a olaleya ena makalelo maswa okoddela vina ottiyana?
1 Matratado matanu maswa ahiburutxiwa Vamatugumanoni a Kwatti ‘Mazu a Mulugu Ebaribari!’ Vyaka ya 2013. Mowenjedhedhavo, Miselu dha Omwene No. 38, nina musorho “Abale Akwile Anele Okalawo Wili?” nihekiwa mmuttengoni mwa matratado aba. Matratado aba otene matanu na nimodha akaana makalelo otikiniha. Sabwaya jani ya musasanyedho obu muswa wottiyana? Omapakelo wa numba-numba, ninakose dhavi malabihedho aderetu modheela makaleloya?
2. Yofuneyayavo ya mukalelo muswa jivi?
2 Ekoseliweni na Makalelo Maswa?: Malabihedho aderetu a numba-numba dila dhinjene dhinodhana ttarho nai: (1) Kakosa nivuzo na moonelo wa oroma makani. (2) Kavaha yubuwelo ya Malebo. (3) Kanvahe nivuru mwanamurala wi engese. (4) Ottiye nivuzo wi wakula dila yina, vina okose masasanyedho wi omwiyelele. Makalelo maswa a matratado anonikamihedha ofara mohirutxa tharho esi nai.
3. Iyo nigapakile dhavi matratado maswa mmabasani a olaleya?
3 Nilabihedhe Dhavi: (1) Ogamala olejela, kamulagihe mwanamurala mavuzo menji a osakula wa omwinya ali omentoni wa tratado, vina kanvuze wi onoonamo dhavi. (2) Kafugula tratadoya, vina otanaalele “Txini Enloga Bibilia.” Kengesa nlebona mbibiliani kakamwe egakala yowodheya. Akala mwanamuralaya okaana mudhidhi, katanaalela na iyene “Ejo Entapulela Eni wa Weyo.” (3) Kaperheka tratadoya, vina kamulibihe wi mwinyene engese dhinjidha dhilimo. (4) Ohinatti opaganya, kamulagihe nivuzo nili okoddewa mutxiddo mwa “Wi Nitanaalele Sabwaya” vina kakosa masasanyedho wi mutanaalele mavuzo a Bibilia dila yina.
4. Iyo ninalabihedhe dhavi tratado dhiswa nigakosa oleddo wa wiyelela?
4 Okosa oleddo wa wiyelelawo kunrutxa. Mohirutxa kalabihedha nlebo nili okodde wa tratado wi wakule nivuzo nikosiliwe oleddo ovirile. Ohinatti opaganya, otonyihedhe foto ya brochura Miselu Dhapama!, kamulagihe mwanamuralaya brochurana vina nsunzo nina miselu dhowinjiva dhilogilenyu, nanda ovahedhe brochurana. Iyeneya agarumeela, kakosa masasanyedho wi musunze brochurana. Weyo ohiroma nsunzo na Bibilia! Ottiya ovaha brochurana, egahikala yofanyeela ovaha tratado yina vina bukosa masasanyedho wi otanaalele na mwanamurala.
5. Thimaya jivi ena matratado mmabasani ehu a olaleya?
5 Matratado anlabihedhiwa mmabasani a olaleya andowa afiyedhaga vyaka 130. Masiki ottiyana wa munuweloya na makaleloya, awene epano yofanyeelela vaddiddi ya ovahana onamoona. Nikose malabihedho aderetu a makalelo maswa wi nidhowevi banigavuwiha eziwelo ya Bibilia elabo yotene.—Gano 15:7a.