Onowodha Oroma Makani na Folhetu

Oromana mweri wa Janero 2018, nikuku noroma na Nivuru na Mabasa Ehu a Matugumano ninodhana mazu oromana makani mmalaleyoni. Enfuniwanihu ja ologa na athu othiya wavahavi manivuru. Dhinosasanyedhiwa vidiyu dhinlagiha marhe a oromana makani mmalaleyoni wi akamihedhiwena anamalaleya. Kuloga ninokoddihiwa olaleyana manivuru numba na numba? Nne, kahiye mwenemo! Ninga motagiha, folhetu epano yaderetu vaddiddi ya oromana makani. Malagoya a oromana makani na folhetu baba:

1. Orome onvuza muthuya mavuzo anda va folhetuniva.

2. Omulagihe yowakulaya ya mBibiliani enda vadhulu va nikuku na nawili. Akala onowona wi muthuya ohikana mudhidhi kengesa vina otapulelemo mazu anda mwari mwa folhetuya.

3. Onvahe mwanamurala folhetuya ogamala omwaddele wi engese epaddi ehifiyedhilenyu.

4. Ohinathi odhowa omulagihe mpaddi onloga “Wi Nubuwele Sabwaya” ya nivuzona, vina mulaganele mudhidhi wa odha omwaddela makulo mena a mBibiliani.

Ogeyela wakule nivuzo nathilewi, ogamala othiye nina wi wakule mudhidhi mwina. Ogawodha osakule nivuzo-nivuzovi ninda mwari mwa website wehu obe ninda vamakukuni oroma a manivuru ehu. Oganona wi muthuya ohikana efunelo ya oziwavi dhina, kamulagihe brochura Miselu Dhapama dha Mulugu nili Muthumbini Mwehu mwa Vipano Dhosunzihana.