Onawodhe Dhavi Olabihedha Mazu Oromana Makani?

Oromana mweri wa Janero 2018, va nikukuni noroma ya Mabasa na Yeddelo Yehu ya Okristu—Nivuru na Matugumano. Munofanyeya mazu a oromana makani. Epaddiya eji ninalabihedhe dhavi?

Ogattomeliwa Epaddi ya Anyaskola: Onofanyela olabihedha nivuzo ninfanyeya nikuku nttile noroma, nlebona vina nivuzo ninfuna omwiyelelana mwanamuralaya. Mbwenyi eji kintapulela wila onofanyela ofwara dhahene ninga munlagihiwa nvidiyuni. Enowodheya olabihedha mare mena, otapulela nlebona na mukalelo mwina. Ottiya olabihedhavi manivuru anromoliwamo enowodheya olabihedha manivuru mena anfanyeya Muttumbini Mwehu mwa Vipano Dhosunzihana.

Ogakala Mmabasani Olaleya: Epaddi ya mazu oromana makani enonivaha malago a deretu ananikamihedhe mmabasani a olaleya. Akala mwanamuralaya onolagiha efunelo ya ofuna oziwavi, enowodheya odhowanavi makani vasogorho txino olabihedhaga malago a omwiyelelana. Enorumelihiwa oroma makani na mazu mena ottiya abale ali va nikuku noroma. Koddi mazu oromana makani na nlebona a mweri o virile banddiginyetxa murima wa anamuralaya? Anamuralaya aganivuruwaniletxe kologa mwaha wa muselu ompadduwa mmuruddani? Enowodheya osakula makani agaddiginyiletxe mirima dha anamuralaya. Mbwenyi masiki nilabihedhaga mare ottiyana-ttiyana efunelo yehu ekale ya ‘wirela muttaka wapama.’—1Kor 9:22, 23.