Okale womala na Wale wi Olabe Momaguva

Oromana nsaka niburutxiwe web site wehu, masunzo a Bibilia ankumbirhiwa mu online anowunuwavi momaguva. Mowenjedhedhavo dhokumbirhiwa dhiina dhinowunuwa momaguva modheela marhe meena a masunziho a Bibilia. Kambirhinya ya Katti ehiloga wi dhokumbirha esi dhinofanyeela wakuliwa momaguva. Motagiha, akala yokumbirhiwaya ekosiwe modheela jw.org, anddimuwa a mulogo ankala mmuruddani muli namakumbirhaya dila dhiina malabo meeli musogorhomwa anottambirha njangarha na katti. Miselu dha mmuruddani dhinowooniha wi attu eena akosile yokumbirha ya nsunzo na Bibilia dhahivira sumana dhinjene ahinatti ofiyedhiwa. Ninakaane dhavi ebaribari wi nikamihedho nihivahiwa muttuya efunelo yaye ehinatti wobana?​—Marko 4:14, 15.

Akala muttuya olagihile efuneloya kankala muruddani mwenyu, olebe njangarha, Queira visitar (S-43) nanda onvahedhe mulebi wa mulogo labo na otugumana wenyu nihinatti ofiya. Mwari mwa labo nimodha obe meeli, venevo mulebi wa mulogo onofanyeela waddela mulogo omwaddamele muttuya obe avahedhe kambirhinya ya katti alabihedhaga jw.org. Anddimuwa a mulogo anofanyeela woona Web site wehu mudhidhi wotene. Akala awene anofanya nlagiho ninloga wi alogena muttuya anofanyeela olaba momaguva. Namalaleya okumbirhiwe wi alogena muttuya onofanyeela weka vamburoni woroma. Akala muttuya kanfanyeya vatakulu weyo onofanyeela ottiya muttitto wawo.