Kasha Ya Mavuzo

◼ Enowodheya anamalaleya olabihedha Interneti mowakwana wi avahe onamoona obe akose nsunzo na attu a elabo yina?

Anamalaleya eena anolabihedhaga epano eji ya interneti wi akose nsunzo na attu a elabo yina mwenemwale munkoddihiwa mabasa ehu obe mpule muli ojombeliwa wa anamalaleya. Dila dhiina anofanyaga dhopurelamo dhaderetu. Noona ehikalavo elobo yowopiha akala anamalaleya anolabihedha epano eji ya interneti alogaga moviteyani na attu a dhilabo dhiina. (Koona mu Mabasa Ehu a Omwene Julho 2007, nikuku 3.) Yofuneyaya jawafiyedhana attu a murima wokurumuwa miselu dha Omwene, dila yina ninologaga na abaali vina arogora a dhilabo dhiina obe ninomaga mandano abure, na asadduweli. (1 Kor. 1:19-25; Kol. 2:8) Ottiya ejuwene, mumburoni munkoddihiwa mabasa olaleya mudhidhi mwinji wi attu arumeele anojedhelaga nlamulo na alamuleli a venevo. Noona wa kadda muttu onloga na awene ejo enozuzumiha egumi vina enowawika vangovini abalihu na arogora ankala muruddaya obule. Mwa dhahene, anamalaleya kanfanyeela waveda attu a dhilabo dhiina mu online wila alaleye miselu dhapama.

Akala kanittomiwe na kambirhinya ya filiyali ya venevo, niganvaha onamoona wa gari muttu wa elabo yina, ottiya ojedha wi nilogena agafiya vanuve obe mburo mwina, ninofanyeela omukamihedha wi amulabihedhe jw.org wi afanye miselu dhiina obe omukamihedha owodha ologa na filiali ya elabo yaye. Iyo vina podi omulibiha wi awodhe odhowa o Numbani ya Omwene yawaddamela. Joziweya wi mirudda dhiina kadhina Numba dha Omwene. Akala iyene onofuna ogumana na munamoona wa mmuruddani mwaye, kattikitta njangarha Queira Visitar (S-43) nanda onvahedhe mulebi, iyene onele omulabihedha jw. org. Musogoreli wa mabasa wa filiali onele omulogana muttu onfanyeya elabo enkaliye odduwene onanvahe nikamihedho na omuyani.​—Koona mu Mabasa Ehu a Omwene Junho 2014 nikuku 7, vina Mabasa Ehu a Omwene wa Novembro 2011 nikuku 2.

Akala muttuya ondowaga iyo omoona dila dhinjene onomwalela murudda mwina obe akala muttuya wa elabo yina onsunza na iyo nimuziwile mu internetini ninofanyeela ofarihedha mulagiho oli munjagarhani nilogiwe vadhulu. Iyo podi odhowavi banigatonyihedha efunelo na muttuya mpaka owodha ogumana na anamalaleya a elabo enkaliye. Mwa ejuwene akala muttuya onkala elabo enkooddihiwa mabasa ehu, ninofanyeela okala txenjewa na masunzo a Bibilia modheela majangarha, muttitto obe dhipano dhiina dhovavihana mazu dhiliwo.​—Mt. 10:16.