Eskola ya Orumiwi wa Mulugu ya 2015 Enonikamihedha Wunuwiha Masunzo Ehu
1 Munasalmo David wahileba: ‘Yehova, akelaní n’oziveliwa mazu a mwano mwaga; monlelo wa murimaga ofiye vali nyuwo muli vottawela vaga, moboleli waga’. (Masal 19:15) Iyo ninofuna mazu ehu akale omuzivela Yehova, vina nirihege gari yehu ya ologa ebaribari mmulogoni vina mmalaleyoni. Eskola ya Orumiwi wa Omwene bu mukalelo mmodha onlabihedha Yehova wi anishagihe mmalaleyoni. Onishagiha oku onokosiwa kadda sumana mmilogoni dhowakwana 111.000 elabo yotene. Eji enowakamihedhaga abali na arogora ozugunuwa elabo yotene vina mmeddeloni mwawa motene wi akale ofanyeelela vina orumeeliwa wi akale emeleli a miselu dhapama, vina awodhege osunzihaga na ofanyeelela, na ologa s’ohivonya vina na oderetu.—Merelo a Arumiwi 19:8; Kol. 4:6.
2 Porograma ya eskola ya 2015 enelege okosiwa na makani andheela munivuruni ning‘ono Osasanyedhiwa Wa Mazu a Mulugu vina mu nivuruni Ensunziha Bibilia na Okwela Wa Mulugu. Mowenjedhedha vanokalaga masasanyedho ankosiwa mwa mudhidhi wa wengesa wa Bibilia vamodha na diskursu No. 1. Matxinjoya abo vamodha na malago a mukalelo wa weddihiwana eskola anela ologiwa dhipaddi dhiina dha musogorho.
3 Mitoma dha Bibilia: Abali anttomeliwa epaddiya eji anele okaana mitala minli wi aloge mowooneya mutoma mmodha wamakamaka vina wolabihedha mabasa wa Malebo mwari mwa wengesa wa Bibilia wa sumana. Masasanyedho ofanyeelela anele okaana mapakelo aderetu wi anamewa awodhe ologa dhisunzilani alogaga na mudhidhiya. Ottiya ejuwene, anamewa anele okaana mitala mitanu na modha wi avahe dhowakula dhawa dha asegundu 30 alogaga makamaka dhisunzilani modhela omwengesa Bibilia wa sumana. Wi ekoseye ejoya enofanyeela osunzavo mowakwana wi owodhe ovaha dhowakula dhawo mwari mwa asegundu 30 vina okosa ejuwoya yoshagiha yaderetu mwa iyo. Okosa ejuwene enele wakamihedha attu enjene ologa dhisunzilani mwari mwa opepesa wawa.
4 Ottomiwa No. 1: Mudhidhi wottomiwa wa wengesa wa Bibilia ohivuguliwa wi okale wa mitala miraru obe dhohifiya epaddi eng’onovi. Abale anttomeliwa wengesa, anofanyeela ovisasanyedha mudhidhi mwinjene modheela wengesa na lizu nowiweya, atxenjerelaga mukalelo waderetu oniweya mazuya ologaga dhamakamaka wi afiyedhe dhitanaalelo na ononeliwamo waderetu. Nlogo notene na Yehova ninofanyeela ovisasanyedha wi niziwe wengesa mofanyeela, sabwani wengesa onokosa epaddi yamakamaka ya mukalelo wa webedha wehu. Ninowagalala oziwa wi anihu anowengesa deretu, Ababi onofanyeelela otamaaleliwa sabwa ya guru dhawa dhokwela vina anokokomeziwa wi aakamihedhe anawa wi akale anamengesa aderetu.
5 Ottomiwa No. 2: Epaddi eji ya mitala-mitanu enakosiwe na murogora. Musorhoya ottomiwe onofanyeela olabihedhiwa. Diskursuya akala enfanyeya mwari mwa folieto Osasanyedhiwa wa Mazu a Mulugu, onofanyeela olabihedhiwa ninga epaddi ya mabasa a olaleya ali ebaribari vina anoneyetxa mmuruddani. Akala mutomaya oli mwari mwa nivuru Ensunziha Bibilia, onofanyeela olabihedhiwa ninga epaddi ya mabasa a olaleya enoneyetxa mwari mwa muruddaya. Akala mutomaya oli mwari mwa nivuru Okwela wa Mulugu, namasunza onofanyeela otapulela mutomaya ottomiwe, asakule maleboya aniwanana na mutomaya vina alagihe mukalelo onlabihedheya mabasa nigano na Bibilia mwari mwa egumi ya Mukristu. Malebo owenjedhedha aniwanana na mutomaya anofanyeela olabihedhiwa egakala yofuneya. Mwimeleli wa eskola onele omuttoma mukamihedhiya.
6 Ottomiwa No. 3: Onele okosiwa mwari mwa mitala-mitanu na mbali obe murogora. Agattomeliwa murogora enofanyeela okosiwa ninga munkoseliwani diskursu No. 2. Agattomeliwa mbali onofanyeela okosa ninga diskursu ya vattaddo aatanalelaga anamewa. Akala ottomiwawa onfanyeya mu nivuruni Ensunziha Bibilia, enofanyeela okosiwa ninga epaddi ya olaleya elemeliwe vamuruddaniva. Akala ottomiwawa onfanyeya mu nivuruni Okwela wa Mulugu, namasunzaya onofanyeela olabihedha musorho ovahiwiye, asakule malebo anfanyeelela olabihedhiwa, vina atonyihedhe mukalelo onlabihedhiwa mabasa magano a Bibilia mwigumini mwa Mukristu.
7 Mukalelo Muswa wa Ottomiwa No. 3 wa Abali: Epaddiya akala enfanyeya mwari mwa nivuru ning’ono Osasanyedhiwa wa Mazu a Mulugu obe nivuru Okwela wa Mulugu, enofanyeela okosiwa ninga mulagiho wa webedha wa murala obe masasanyedho a mabasa a olaleya. Dila dhinjene mwimeleli wa eskola onele omuttoma mukamihedhi vamodha na epaddiya. Mukamihedhiya onofanyeela okala mmudhi wa namasunzaya obe mbali wa mmulogoni. Malebo owenjedhedha anloga dha malago a Bibilia aniwanana na mutomaya anofanyeela olabihedhiwa mwari mwa epaddiya. Na mudhidhiya munddimuwa wa mulogo vina poddi olabihedhiwa wi akose epaddiya. Munddimuwa wa mulogo poddi omusakula mukamihedhi waye vamodha na epaddiya ya nsunzo. Mohaganyedha enele okala yokamihedha vina yolibiha wawoona anddimuwa a mulogo alagihaga dhipaddi na amudhawa obe abali eena a mmulogoni.
8 Malago: Mwimeleli wa eskola onele olabihedha mitala-minli omamalelo wa kadda epaddi ya namasunza wi avahe dhowenjedhedha, dhahene ninga malago olibiha andela munivuruni Beneficie-se da Escola do Ministério Teocratico. Mwimeleli wa eskola agamala omukuwela namasunza vamodha na epaddiya enakosiye, iyeneya kanaloge epaddi ya malago enakose namasunzaya. Omamalelo wa kadda epaddi mwimeleli wa eskola onele omutamaalela na oderetu namasunza, alogaga epaddi ya malago ekosile namasunzaya, vina alogaga makamaka sabwa ekalelani yaderetu namasunza olabihedha vina wika ttima mutomaya.
9 Malago a kadda namasunza anofanyeya mwari mwa makuku 79 mpaka 81 a nivuru Escola do Ministério. Namasunzaya agamala okosa epaddaye, mwimeleli wa eskola onele oleba mulagiho wowooneya munivuruni na namasunza vina onele onvuza namasunza akala ohikosa masunzo anfanyeya va njangarani nottomiwana. Namasunza onofanyeela okamihedhiwa na dhowenjedhedha dhaderetu omamalelo wa matugumano obe mudhidhi mwina. Malago omwinya anvahiwa namasunzaya mwari mwa eskola poddi wooniwa ninga nikamihedho na wunuwiha efunelo ya omuyani.—1 Tim. 4:15.
10 Namasunzaya agalupa mudhidhiya, mwimeleli wa eskola obe mukamihedhi onofanyeela omulagiha namasunza ninga orumiha epano obe na elogelo ya mada na efunelo ya omulagiha moviteya wi mudhidhi waye ohigona. Namasunzaya onofanyeela ononelamo mulagihoya agomihaga dhologa dhaye vina momaguva abudduwewo opalkuniwa.—Koona nivuru Escola do Ministério, nikuku 282, ddima 4.
11 Abali otene orumeeliwa anokokomeziwa wi avilebihe Eskola ya Orumiwi wa Mulugu. (Koona nivuru Escola do Ministério, nikuku 282, ddima 6.) Nlelo nindana eskolaya eji ninokamihedha nlogo na Yehova olaleya na osunziha miselu dhapama dha Omwene na mukalelo woliba, nokurumuwa vina na okwela. Mohaganyedha Yehova oli wowagalala vaddiddi vina onottittimihiwa na abale ampurelamo nlelo na Mulugu!—Masal. 148:12, 13; Iza. 50:4.
[Foto vanikukuni 5]
Kapurelamo modheela wakela vina olabihedha mabasa malago avahiwe