Weyo Onovisasanyedha Modheela Muttupo wa Wubuwela Okwa wa Yezu?
Nali labo 13 mweri wa Nisani yaka ya 33 E.C. Yezu wanziwa yawila okule wali omattiyu womariha na akwaye ofiyedheya iyene ahinatti opiwa. Iyene agahikosa mattanga a paskwa omamalelowa agahiroma muttupo mwina onkuweliwa, Siarhi ya Nabuya. Muttupoya obo wamakamaka wanfanyeela osasanyedhiwa. Mwadhahene, Iyene omuruma Pedro na Joau wi asasanyedhe. (Luka 22:7-13) Mpaka mudhidhene obule vyaka dhotedhene muttupoya obu onokosiwavi, dhahene mukristu onfuna wona mattanga aba a okwa wa Yezu onofanyeela ovisasanyedha. (Luka 22:19) Dhilobo gani dhinfanyeela iyo osasanyedha mwa Mattanga a Okwa wa Yezu anakosiwe labo 3 mweri wa Abril?
Ovisasanyedha wa Anddimuwa a Mulogo:
• Okosa masasanyedho a Numba ya Omwene obe mburo mwina waderetu. Ona mpaddo dhowakwanela, maliju obe yomoneya yina. Vina masasanyedho ookoddeliha mburoya mutanene.
• Omusakula namakosa diskursu wa ttotto, mwimeleli, abali anakose nlobelo na vinyu vina na mukatte.
• Akala milogo minli dhintugumana mburo mmodhene enofanyeela okosa masasanyedho, a mudhidhi ovolowa, wobudduwa vamburoniva vina mudhidhi wa oburutxavo mikukutta, masikaleta vamodha na myota.
• Wasakule vina wasasanyedhe anamatonyihedha mburo na anameddiha vinyu vamodha na mukatte.
• Jamakamaka okaana vinyu na mukatte wofanyeelela, marhuwa, kopo dha vinyu, meza vamodha na guwo ya vameza.
Ovisasanyedha wa anamalaleya:
• Ovisasanyedhe deretu wi wawobe attu enjeene.
• Walebele anamasunza awo a Bibilia, anamudhi, akwawo oskola, omabasani vina abale anaziwewi wi wawobe.
• Wengese vina otanaalele malebo a mBibiliani modheela Mattanga a Okwa wa Yezu.
• Odhe mutanene omattanganiwa wi wamoyele abale andeela wona.