Matugumano a Odhowana Omabasani a Olaleya, Anowakwanihedha Yogana Yawa
1. Efunelo ya matugumano a odhowana omabasani a olaleya jivi?
1 Mudhidhi dhahi, Yezu wahitugumana na anamafara aye owakwana 70 ahinatti odhowa omabasani olaleya. (Luka 10:1-11) Iyene wahalibiha mwa wawubutxedha yawila awene kali woka, mbwenye eddihiwa na “mwinya wa Munddaya” Yehova. Iyene vina wahavaha mashagiho awodhile wasasanyedha wi alabe mabasaya, vina “oaruma eli-eli.” Ovanene vina matugumano ankosaga iyo vamaromo wi nidhowe omabasani a olaleya ana efunelo yakakene—wi anilibihe, anisasanyedhe, vina anittiye omala na wale.
2. Matugumano a odhowana omabasani a olaleya agagonela midhidhi mingasi?
2 Matugumano a odhowana omabasani a olaleya ankosiwa mwari mwa mitala 10 obe 15, mwari mwa mitala eso pansasanyedhiwa makuru, ottoma murudda vina okosa nlobelo. Ovano enfuna etxinjiwe. Oromana mweri wa Abril, matugumano a odhowana omabasani a olaleya anakosiwege mwari mwa mitala 5 obe 7. Mwadhahene, agakosiwaga omamalelo wa matugumano meena anofanyeela okala ogwaddeleya vaddiddi, vowi anamalaleya amala oshagihiwa na Malebo. Okosa matugumano a odhowana omabasani a olaleya mogwaddela, enoniwodhiha okosa mudhidhi mwinji mmabasani olaleya. Mowenjedhedha, akala pionero obe namalaleya oromile olaleya, matugumano a odhowana omabasani a olaleya ahinatti okosiwa, onofanyeela oroma ottiya wi adhowe omatugumanoni.
3. Matugumano a omabasani a olaleya anfanyeela osasanyedhiwa dhavi wi akamihedhe anamalaleya?
3 Matugumano a odhowana omabasani a olaleya anofanyeela osasanyedhiwa wi akamihedhe vaddiddi anamalaleya. Milogo dhinji dhinokaanaga yopureyamo vaddiddi mwa okosaga masasanyedho wi makuru olaleya atugumanege mimburo dhottiyana-ttiyana, ottiya olaganela mburo mmodha bahi. Eji enowakosiha anamalaleya ohirutxawa odhowa onikuruni na omabasani a olaleya vina murudda onfuna olaleyiwa. Anamalaleya anofanyeela ovisasanyedha momaguva vowi eji enele omukosiha mwimeleli wa nikuru waziwa anamalaleya ali mu nikuruni mwaye. Nikuru na anddimuwa a mulogo ninofanyeela otanaalela mikalelo dha vamuruddaniva agamala bagana okosa eli yofanyeela. Matugumano ohinatti omala na nlobelo nohigoneela, anamalaleya otene anofanyeela oziwa ondowani olaleya vina omuziwa mukwaye wolaleyana.
4. Sabwaya jani matugumano odhowana omabasani olaleya kanfanyeela woniwa ninga ottiyana na meena?
4 Matugumano Aba Bamakamaka Ninga Matugumano Meena a Mmulogoni: Matugumano aba kanooniwa na mulogo wotene sabwani ankoseliwa babale andowa olaleya bahi labonene ntto. Mwadhahene, ejo kintapulela yawila kahiye amakamaka opitta matugumano meena a mulogo. Ninga matugumano ehu otene, matugumano omabasani a olaleya mvaho wa Yehova wi nikaane ewodhelo ya olibihana vina ya okosa mabasa apama. (Aheb. 10:24, 25) Dhahene, nameddiha onofanyeela okala wovisasanyedha deretu wi aloge na mukalelo onimuttittimiha Yehova vina abale aniwa apurelemo. Akala enowodheya okosa ejuwene, namalaleya ondowa mmabasani a olaleya onofanyeela okosa guru ya okalavo.
5. (a) Mwimeleli wa mabasa onfanyeela okosa eni agasasanyedhaga matugumano a mabasa olaleya? (b) Mudhidhi gani oneeddiha murogora matugumano a mabasa a olaleya?
5 Ovisasanyedha wa Nameddiha: Wi muttu awodhe weeddiha deretu mpaddi wa matugumano, onofanyeela ottomiwa mutanene. Ejo vina enoligana na matugumano a mabasa a olaleya. Akala makuru olaleya anotugumana mimburo dhottiyana, emeleli a makuru obe akamihedhi awa anofanyeela okosa matugumano na makuru awa. Noona, akala mulogo onotaganyiha makuru olaleya wi akose matugumano a mabasa a olaleya, mwimeleli wa mabasa onofanyeela omuttoma muttu wi eddihe mutugumanoya. Mwimeleli wa mabasa onofanyeela okosa porograma wi aavahe anameddiha mutugumano wa makuru, agamala eke yina va kwaduruni ya dhovuwiha. Mwimeleli wa mabasa onofanyeela otanalela deretu agaasakulaga anameddiha matugumano a mabasa olaleya. Matugumanoya wi akale olibiha, anameddihaya anofanyeela okaana ttotto ya osunziha vina yosasanyedha. Akala kavo munddimuwa wa mulogo, mudhari wokamihedha obe mbali wobatiziwa mwimeleli wa mabasa onofanyeela omusakula murogora wi eddihe matugumanoya.—Kang’ana mutoma onloga “Murogora Ageddihaga.”
6. Ekaleli eni yamakamaka nameddiha ottomiwe ovisasanyedha deretu?
6 Iyo nigattomeliwa okosa mpaddi w’Eskola ya Orumiwi wa Mulugu obe Mutugumano wa Mabasa, ninowona yawila elobo yamakamaka vina ninosasanyedha deretu. Txino kavo muttu vari vehu agafunile ojeedha labo nodhowa omatugumanoni wi arome wubuwela mudila dhinfuna iyene ologa. Ottomeliwa wa weeddiha matugumano odhowana omabasani a olaleya onofanyeela woniwa na mukalelo wakakene. Ovano vowi matugumano odhowana omabasani olaleya anakale a mudhidhi mung’onovi, ovisasanyedha deretu jamakamaka vaddiddi. Mwa dhawene matugumanoya anele okala ofanyeelela vina anele ogoma na mudhidhiya. Ovisasanyedha waderetu ondela mwa oziwa mutanene murudda ondowinyu olaleya.
7. Elobo gani egafanyeelile otanalela nameddiha nikuru?
7 Txini Enfanyeela Ologiwa: Vowi mikalelo dha mirudda dhinothiyana, ‘mudhari wororomeleya’ kanvaha mashagiho a matugumano otene a mabasa olaleya. Kasha enloga “Vamatugumanoni a Mabasa Olaleya Katanalela Mitoma Esi,” munofanyeya mashagiho ofanyeelela. Mudhidhi wotene, matugumano anelege okosiwa ninga yoriganela. Mudhidhi mwina, enofuneya osasanyedha wa deretu wa nlagiho obe olagihiwa wa vidiyu yofanyeelela eli mu jw.org. Nameddihaya agavisasanyedhaga wi adhowe omatugumanoni a mabasa olaleya, onofanyeela wubuwela txini enalibihe vina enasasanyedhe abale andowa omabasani olaleya labonene ntto.
8. Txini egafanyeelile otanaaleliwa mudhidhi wa matugumano a odhowana omabasani olaleya Sabuddu na Ddimingu?
8 Ninga motagiha, Namasabuddu anamalaleya enjeene anovahaga A Sentinela vamodha na Despertai! Enjeene andowaga omabasani olaleya Namasabuddu kanddowaga vari va sumana, dhahene awene anorutxiwa vaddiddi wubuwela mashagiho asunzilani mudhidhi wa Webedha wa Ntakulu. Dhahene, egahikala yopureleyamo wa nameddiha wiyelela mukalelo wa olagiha oli mundduni mwa Mabasa Ehu a Omwene. Mukalelo mwina bwa otanalela dhofuneya dha venevo dhiswa, mapadduwo, obe mukalelo wa ologa sabwa ya malabo a maferiado vina mukalelo wa ottiya nivuzo noromana makani nigamwiyelela muttuya. Akala vanikuruni vahikala abali alabihedhile marevista ampakiwa mwerene obo, nameddiha onofanyeela wavuza wi aloge momaguva yopurelamo obe dhotagiha dholibiha. Na Maddimingu, nameddiha onofanyeela osakula okosa elobo yakakene modheela ovaha marevista a mweri. Manivuru osunzana, ninga aba Miselu Dhapama na Kanvuruwane Mulugu vina na nivuru Ensunziha Bibilia anofanyeela ovahiwa malabo otene, dhahene nameddiha onofanyeela osekeserha momaguva mukalelo onfanyeela ovahiwa manivuru aba.
9. Txini enfanyeela otanaaleliwa vasumanani ya niwobo navawoka?
9 Akala mulogo onkosa niwobo na vawoka omamalelo wa sumana, nameddiha onofanyeela otanalela mukalelo wovaha marevista maswa vamodha na niwobona obe na foliyetu, vina onofanyeela ologa mukalelo wolagiha oli wamakamaka. Mukalelo mwina bwa ologa dhotagiha dhintonyihedha ttima ya niwobo ntto.
10, 11. Anamalaleya anfanyeelelani ovisasanyedha deretu agadhowaga omatugumano a mabasa a olaleya?
10 Ovisasanyedha wa Anamalaleya: Anamalaleya ana epaddi vamatugumanoni omabasani olaleya anofanyeela ovisasanyedha wi matugumanoya akale ofanyeelela. Ovisasanyedhawa onofanyeela okosiwa mutanene modheela webedha wa vamuralani, dhawene anowodha okaana yologa na anamalaleya eena. Ovisasanyedha waderetu ondela mwa okaana marevista na manivuru omala na wale ohinatti ofiya vamatugumanoni a mabasa olaleya okosa ejuwene enonikamihedha ofiya mmuruddanimwa s’ohigoneela.
11 Jamakamaka ovisasanyedha wi ofiye matugumanoya ahinatti oroma. Mwebaribari, iyo ninokosaga guru wi nihiyeluwe matugumano otene. Mwadhahene, eji enodha okala yodhugudha nigayeluwa omatugumanoni a mabasa olaleya. Enkalela nni yodhugudha? Mbali oneeddiha onotanaalela masasanyedho menji ahinatti ogawa nikuru. Akala alivo anamalaleya ang’onovi, iyene txino onodha osakula wi abali alabe murudda olabiwe vang’onovi. Akala eena anoweedda vaddiddi adhowaga onikuruni na mabasa olaleya vina akala muruddaya oli wolapela, txino iyene onowodha wagawa na abale ankala murudda mmodhavi. Akala muruddaya bwa wopiya, iyene poddi wagawa abali bagalaba vakuvi na arogora. Akala akalawo ana makatamiho a egumi txino anogawiwa wi alabe dila yaderetu vina numba dhihina sikadda. Namalaleya muswa onofanyeela ogawiwa na namalaleya wa ewodhelo. Mbwenye, akala anamalaleya anoyeluwa, enofanyeela okosiwa masasanyedho maswa wi ayeluwile akaane akwawa a olaleyana. Mwebaribari, iyo midhidhi dhina ninokaana sabwa yaderetu yoyeluwa. Otiya ejuwene, akala nihikaana elemeelelo ya oyeluwa, ninofanyeela ovivuza akala eji empadduwela sabwa ya iyo ohirihaga matugumano a mabasa olaleyana obe akala kaninwodha ovisasanyedha mutanene.
12. Akala weyo mudhidhi wotene onokosa masasanyedho weka, txini egafanyeeliliwe wubuwela?
12 Anamalaleya antugumana wi adhowe omabasani olaleya poddi osakula okosa masasanyedho awa matugumano ohinatti oroma obe eena poddi ogawiwa na muttu mwina. Akala weyo okaana elemeelelo y’omusakula, ogahiwodha ‘ofugula murima wawo’ wi olabe na anamalaleya enjeene, ottiya olaba na muttu mmodhene sabwani mukwawo wofiyedheya? (2 Kor. 6:11-13) Ogahiwodha okosa masasanyedho midhidhi dhottiyana wi olabe na namalaleya muswa wi omukamihedhe ovaddihaga mukalelo waye wa osunziha? (1 Kor. 10:24; 1 Tim. 4:13, 15) Ovuruwane deretu malago otene anvahiwa weyo vina okale txenjewa ogattomeliwaga apale vandowa weyo olaleya. Matugumanoya agamala onakose masasanyedho meena vina momaguva mudhowe mmuruddanimwa.
13. Otene agazuzumela matugumano vina muttu-muttu bagakosa mpaddi waye, matugumano a mabasa olaleya ananikamihedhe dhavi?
13 Anamalaleya abale 70 arumiwe na Yezu mmalelani olaleya “ahiyela n’ohagalala.” (Luka 10:17) Matugumano akosile Yezu na awene ahakamihedha vaddiddi olaleya deretu. Ovanene, matugumano odhowana omabasani olaleya ana yopurelamo yakakene. Akala otene onokalela txenjewa vina muttu-muttu bagakosa mpaddi waye, matugumanoya anele okala olibiha, vina ninele ovisasanyedha wi nigomihe mabasa ehu a ‘olaleya malogo otene.’—Mt. 24:14.
[Mutoma wa nikuku 4]
Matugumano a odhowana omabasani olaleya kanfanyeela woniwa ninga ottiyana na meena
[Mutoma wa nikuku 5]
Nameddihaya agavisasanyedhaga wi adhowe omatugumanoni a mabasa olaleya, onofanyeela wubuwela txini enalibihe vina enasasanyedhe abale andowa omabasani olaleya labonene ntto
[Kasha vanikukuni 6]
Murogora Ageddihaga
Murogoraya onofanyeela omaga musorho vina agahifanyeela okala wogilatene ageddihaga matugumanoya. Mudhidhi oneeddiha iyene onofanyeela orabela okosa ninga onalaga abale alivo. Akala iyene onomuttoma murogora mwina wi akose nlobelo, morogoraya oddo vina onofanyeela omaga musorho. Akala mbali wobatiziwa onofiya matugumanoya baromile, murogora onofanyeela omukumbirha iyene yawila amarihe. Mwimeli wa mabasa onofanyeela wavaha mashagiho arogora aneeddiha, wi anakaane manyazo sabwa ya dhilobo dhinapadduwege musogorho. Ninga motagiha, akala anddimuwa a mmulogoni anowoona yawila mbali wobatiziwa mung’ono vaddiddi obe mwina ddowunuwelavo mbwenye kanatti okaana ewodhelo ya weeddiha matugumanoya, awene poddi omuttoma murogora. Na mikalelo ninga esuwene, mwimeleli wa mabasa onofanyeela wawaddela abali otene a nikuru yawila oneeddihe matugumanoya ddi murogora, mbwenye mbaliya poddi okosa nlobelo akala anddimuwa a mulogo anoziwa yawila iyene okaana ewodhelo. Obe eji vina enodha opadduwa akala mwina olivo mbali wowunuwelavo okooddihiwe okosa mpaddi omatugumanoni a mulogo vina okosa nlobelo, na sabwa ya makani anziwiwa na anddimuwa a mulogo. S’ologa sabwaya, anddimuwa a mulogo anofanyeela wawaddela arogora yawila masiki akala mbaliya oli venevo awene anofanyeela weeddiha matugumanoya vina okosa nlobelo. Anddimuwa a mulogo vina onofanyeela omuziwiha mbaliya malabo attomeliwe arogora wi eeddihege matugumano a mabasa olaleya.
[Kasha vanikukuni 6]
Vamatugumanoni a Mabasa Olaleya Katanalela Mitoma Esi:
• Mukalelo wa olagiha oli mu Mabasa Ehu a Omwene.
• Vidiyu yofanyeelela modheela mabasa olaleya eli mu jw.org.
• Dhitagano dhinji dha mukalelo wolagiha, ninga mazu ovolowana, ottiya nivuzo na wiyelela, obe ologa masasanyedho a mvaho manivuruya agarumeliwa.
• Malebo olibiha vina osunziha anloga modheela mabasa olaleya.
• Dhotagiha dha mmabasani olaleya dha vamuruddani obe dhilebiwe mmanivuruni mwehu.
• Muselu wa mutoma ondela mu Mabasa Ehu a Omwene.
• Muselu muswa wa mpaddi wa Mutugumano wa Mabasa.
• Muselu oniwanana na mabasa olaleya olebiwe mu Sentinelani.
• Muselu oniwanana na mabasa olaleya olebiwe mmanivuruni ehu Escola do Ministério na ‘Kadhawuno Okale Namafara Waga.’
• Mpaddi wa jw.org onwodhiwana olabihedhiwa mmabasani olaleya.
• Mpaddi wa Tradução do Novo Mundo [Revisado] onwodhiwana. Olabihedhiwa mmabasani olaleya. Dhilogelo dhina poddi olabihedha miselu dhili mu malivretu Osasanyedhiwa wa Mazu a Mulugu (igw) vina Weeddihiwa wa Nsunzo na Nzu na Mulugu (sgd).
• Onawodhe dhavi oroma makani na muttu oninfanyiwe mmabasani a olaleya ninga: abale ahinrumeela okalawo wa Mulugu, anrumeela yawila elabo epadduwile woka, akadda Hindu na Abudista.
• Mukalelo wa walogana abale annimaliha.
• Mukalelo wa omukamihedha mukwawo mmabasani olaleya wi awodhe olaleya deretu.
• Mukalelo wa ologa na muttu oninfanya iyo onloga elogelo yottiyana na yehu.
• Mukalelo wa ofanya marhe anawodhena weyo wafanya attu enjene mmabasani olaleya, motagiha ninga, waveda attu anloga elogelo yina, ovaha onamoona na muttitto, onamoona wa vattaddo, wawiyelela attu, obe nsunzo na Bibilia.
• Mubutxedho wa ovibarela, okosa elobo momaguva, mikalelo dhaderetu, okaana dhilemelelo dhofanyeelela, obe na dhilobo dhina.