Mikalelo Ovisasanyedha Nigadhowaga Mmatugumanoni a Mabasa Olaleya

Ninga matugumano a mulogo, matugumano a mabasa a olaleya, mivaho dha Yehova wi nikwelanege vina nilibihanege muttu na mukwaye. (Aheb 10:24, 25) Matugumano a mabasa olaleya anofwanyela okala mwari mwa mitala 5 obe 7, mwari mwa mitala esi enofwanyela wagawa attuyá, murudda onfuna olaleiwa vina okosa nlobelo. (Agafwarelaga matugumano mena anofwanyela ogwadeliwa.) Nameddiyaya mutugumano onofwanyela osasanyedha deretu makaniyá wi akamihedhe anamalaleya olabihedha mmabasani olaleya. Motagiha, akala siku na Sabudu aikalavo anamalaleya ahibuduwile vari va sumana egaikala olabihedha makani mmodhene alabihedhiwe vari va sumana. Dhikalawo miselu dhina dhinfanyela ologiwa dhikamihedhile anamalaleyá?

• Mazu oromana makani anfwanyeya mwari mwa Mabasa na Yeddelo Yehu ya Okristu—Nivuru na Mabasa a Matugumano

• Ninawodhe dhavi olabihedha mapadduwo obe miselu dha masaka abano wi niromena makani

• Onawodhe dhavi wakulela makani anlogiwetxa mmuruddani munlaleyiwe

• Onawodhe dhavi omwakula muttu oyinrumela okalowo wa Mulugu onrumela wi dhilobo dhilopadduwa, muttu onloga elogelo yina obe muttu ona religiau yaye ehivuweyiletxe mmuruddani mwawo

• Onawodhe dhavi olabihedha dhipano dha mu jw.org, JW Library^® obe Bibilia

• Ninawodhe dhavi olabihedha dhipano dhili Mutumbini Mwehu Dhosunzihana

• Ninawodhe dhavi olaleya na mikalelo dhottiyana-ttiyana ninga olaleya na telefoni, na karta, olaleya vattaddo, wiyelalawo woroma vina weddiha nsunzo na Bibilia

• Dhowubutxedha mwaha wa ovibarela, omaguva, mikalelo dhaderetu, ntanalelo na pama obe elobo yina enladdana

• Nsunzo obe vidiyu enfwanyeha mwari mwa brochura Ovilibihedhe Wengesa na Osunziha

• Onawodhe dhavi ovilibiha vina omukamihedha mukwawo wo mabasani olaleya

• Omulibihe olabihedhaga nlebo niniwanana na mabasa olaleya obe yotagiha ya mmalaleyoleni