Enowodheya Weyo Ofwanya Wagalala Webaribari

1. Ojombeliwa “mazu a Mulugu” entapulela eni nanda wagalala wehu oniwanana dhavi na ojombeliwa mazu a Mulugu?

WAGALALA webaribari kahiye elobo enkanihu mudhidhi mung’onovi, odha vina odhowa. Enowodheya wagalala egumi yehu yotene. Dhavi? Diskursu ekosile Yezu Vamwangoni wahitapulela wi: “Ahagalale abale anziwa wi anojombeliwa mazu a Mulugu.” (Mt. 5:3) Yezu wanziwa wi attu agahivilibihedha na murima wotene wi amuziwe vina amwebedhe Muttanddi wehu, Yehova Mulugu. Jijuwene entapulela ojombeliwa wehu “mazu a Mulugu.” Vowi Yehova ‘Mulugu wowagalala,’ etene animwebedha anowagalala.—1 Tim. 1:11.

2-3. (a) Ninga mulogile Yezu, bani onwodha okana wagalala? (b) Txini enasunze iyo mwari mwa nsunzo ntti nanda ekaleleni yofuneya?

² Wila nagalale jofuneya wi dhilobo mwigumini mwehu weddaga n’ofwanyelela? Nne. Diskursu ekosile Yezu Vamwangoni wahiloga elobo yowumiha milomo. ‘Abale anunla’—sabwa ya ovivaha muladdu mwaha wa dhottega dhawa na makattamiho angumananina—enowodheya vina awene wagalala. Yezu ohiloga elobo yoligana mwaha wa ‘abale anfwara-fwareliwa wira dholigana’ vina ‘anruwaniwa’ sabwa ya okala anamafwara a Kristu. (Mt. 5:4, 10, 11) Enwodheya dhavi muttu wagalala afwanyiwaga makattamiho ninga aba?

³ Yezu ohinisunziha wi wagalala webaribari, kunda sabwa ya iyo okana egumi yapama obe yofwasa, mbwenye onda sabwa y’ovijiha mpaddi womuyani vina onfiyedha Mulugu. (Tia. 4:8) Eji enwodheya dhavi? Mwari mwa nsunzo ntti, ninele osekeserha ttarho ttaru dhinanikamihedhe okana wagalala webaribari.

WENGESA VINA OMUSUNZA BIBILIA

4. Ttarho yoroma enfwanyelihu ottukula wi nikane wagalala webaribari jivi? (Masalmo 1:1-3)

⁴ TTARHO 1: Wila nikane wagalala webaribari, ninofwanyela ovijiha mpaddi womuyani. Attu vina dhinama anofuna dhoja dhomaningoni wila akalewo. Mbwenye ba attu bahi anvijiha mpaddi womuyani. Nona enofuneya iyo oja. Jijene emuttukuleli Yezu ologa dhahi: “Muttu kankalawo na ojavi bahi, mbwenye onkalawo na mazu anda mwano mwa Yehova.” (Mt. 4:4) Nona, iyo kaninfwanyela okala labo nimodha nihijile dhoja dhomuyani eli wengesa Nzu na Mulugu, Bibilia. Munasalmo ohiloga: ‘Wowagalala ddule onjiwa murima na malamulo a Yehova onfwaseyela mattiyu na mutana.’—Kengesa Masalmo 1:1-3.

5-6. (a) Txini ensunza iyo mBibiliani? (b) Wengesa Bibilia onanikamihedhe dhavi?

⁵ Vowi Yehova ononikwela, iyene ononitonyihedha mBibiliani dhilobo dhinfwanyeelihu okosa wi nagalale. Mbibiliani ninosunza ettanddeliwe iyo. Ninosunza enfwanyela iyo okosa wi ninfiyedhe Mulugu vina anilevelele dhottega dhehu. Ninosunza vina mwaha wa njedhelo nokoddela nina iyo musogorho. (Jer. 29:11) Ebaribari enkaana iyo sabwa ya omusunza Bibilia enowagalaliha murima wehu!

⁶ Iyo niziwa wi mBibiliani, munofwanyeya malago a weddana labo na labo. Nigafwara malago aba, ninokana wagalala. Kintanala akala weyo ohikumuwa sabwa ya makattamiho a mwigumini, ogatamela mudhidhi wa wengesa Nzu na Yehova vina otanalela onele wagalala. Yezu ohiloga: ‘Ahagalala ttabwa-ttabwa abale aniwa nzu na Mulugu avirihagamo!’—Lk. 11:28.

7. Txini enawukamihedhe opurelamo ogengesaga Nzu na Mulugu?

⁷ Ogengesaga Mazu a Mulugu, onofwanyela otamela mudhidhi wa otanalela dhinengesiwe. Motagiha, wahiromaga opadduweliwa yotagiha ninga eji. Muttu opiya yoja enuziveletxa vaddiddi. Mbwenye sabwa yoja momaguva vina wubuwela makattamiho angumaniwena kuhinonelamo muzivelo wa yojaya. Nomala, weyo ozindiyela wi ojile momaguva, kowiliwa wajile vang’ono-vang’ono ogahizinddiyela ozivawa. Jakakene empadduwa nigamwengesaga Bibilia, mudhidhi mwina ninomwengesa momaguva mbwenye kaninnonelamo museluya. Otamele mudhidhi wi opurelemo esile dhinfuna wusunziha Mazu a Mulugu; otanaalele nipadduwona, wubuwele wiwe dhinlogani vina otanaalele dhengesiliwe. Ogakosa dhawene onele wenjedhedha wagalala wawo.

8. “Mudhari wororomeleya vina wamalago” onakwanihedha dhavi mabasa attomeliwiye? (Koona nota.)

⁸ Yezu ohimuttoma “mwimelile wororomeleya vina wamalago” wi anivahe oja womuyani mwari mwa mudhidhiya vina iyo nikana dhoja dhinjene dhomuyani.b (Mt. 24:45) Bibilia yoja yoroma ensasanyedha mwimeleli wororomeleya vina wamalago. (1 Tes. 2:13) Wengesa Mwang’aneli, Kalani Mento! marevista, mitoma dhinfwanyeya mu jw.org, osasanyedha matugumano a vari va sumana, a omagomo wa sumana vina wona porogarama JW Broadcasting^® enonikamihedha oziwa mubuwelo wa Yehova onfwanyeya mBibiliani. Nigagana omusunza vina omwengesa Bibilia ninele owodha ottukula ttarho yanawili wila nifwanye wagalala webaribari.

OKALAWO MOWIWANANA NA MAGANO A YEHOVA

9. Ttarho gani yanawili ennittukulela okana wagalala webaribari?

⁹ TTARHO 2: Wi nikane wagalala webaribari, enofuneya okalawo mowiwanana na magano a Yehova. Munasalmo ohileba: ‘Onagalala ddule onimova Yehova, onedda mudila Mwaye.’ (Masal. 128:1) Omova Yehova entapulela omuriha venjene vina orabela okosa dhilobo dhinimusilidha. (Gano 16:6) Nona, nivilibihedhe ovirihamo magano a Yehova anfwanyeya mBibiliani antonyihedha eli yapama na yabure. (2 Kor. 7:1) Ninele wagalala nigakosa dhilobo dhinkwela Yehova vina nigarabela okosa dhilobo dhinidda iyene.—Masal. 37:27; 97:10; Rom. 12:9.

10. Mowiwanana na Roma 12:2, muttorho wehu buvi?

¹⁰ Kengesa Roma 12:2. Muttu txino onoziwa wi Yehova ddina owodha wa ologa ejile eli yapama vina yabure, mbwenye onrumela malamulo a Mulugu ninga munfuneliye. Motagiha, muttu txino onoziwa wi alamuleli ahikana owodha wa ogwiha nlamulo na velosidade enfwanyela muttu weddana murampani. Mbwenye iyene kanrumela ovirihamo nlamulona ninga munlogela alamuleli. Yodhelavoya, iyene oroma weddana velosidade enkwaranya maddileya. Iyo ninotonyihedha na mweddelo wehu wi weddana magano a Yehova mukalelo wa maka-maka wokalawo. (Gano 12:28) Davidi ohiwamo yakene, mulogeliye na Yehova: “Nyuwo munere odditonyihedha dila yofiyana w’igumini; vamentoni venyu pali othaba wawakwana, vali nyuwo pali ojavo wohimala.”—Masal. 16:11.

11-12. (a) Nigadhugudheya obe nigojeya, txini enfwanyelihu okalela txenjewa? (b) Mazu anfwanyeya va Filipi 4:8 annikamihedha dhavi nigasakulaga mavego?

¹¹ Iyo nigadhugudheya obe nigojeya, dila dhina ninotamelaga mavego wi anipangarhaze. Okosa ejo kahiye yabure, mbwenye ninofwanyela okala txenjewa wi ninadhe othukuleleya okosa elobo enidda Yehova.—Ef. 5:10-12, 15-17.

¹² Karta nalebeli murumiwi Paulo akadda Filipi, ohakokomeza otamela “dhomyala, dhokoddela, dhofuneya [vina] dhoriheya.” (Kengesa Filipi 4:8.) Ebaribari wi Paulo alogaga mazu aba kalogana mavego mbwenye elebiliye enofwanyela wiwanana na mavego ansakulehu. Karoma okosa dhahi: Ohinatti osakula “jibo,” “filimi,” “nivuru,” obe “vidiyu game,” karoma otanalela wi wone akala enowiwanana na mikalelo dhinlogiwa va Filipi 4:8. Okosa eji enele wukamihedha ozindiyela eli yorumeeleya vamentoni va Yehova vina ehili. Iyo ninfuna wi egumi yehu ekale mowiwanana na malamulo oligana a Yehova. (Masal. 119:1-3) Mubuwelo wotxena, onele onittukulela ttarho yina wi nikane wagalala webaribari.—Mer. 23:1.

WIKE OMWEBEDHA YEHOVA VAMBURONI VOROMA

13. Ttarho gani yaneraru ennittukulela okana wagalala webaribari? (Joau 4:23, 24)

¹³ TTARHO 3: Enanittukulele okana wagalala webaribari ku wika omwebedha Yehova vamburoni voroma. Ninga Muttanddi wehu, Yehova ddinfwanyela webedhiwa. (Ovuh. 4:11; 14:6, 7) Nona, enfwanyela okala yamaka-maka mwigumini mwehu omwebedha Yehova na ‘muya vina ebaribari’ dhahene ninga munfuneliye (Kengesa Joau 4:23, 24.) Iyo ninofuna muya wokoddela wa Mulugu wi oneeddiye muwebedhani mwehu dhawene pankala webedha wehu mowiwanana na Nzu na Mulugu. Omwebedha Yehova onofwanyela okala vamburoni voroma masiki akala ninkala mwilaboni munkoddihiwa mabasa ehu obe mfugiwani. Ovanenevi, okwaranya abali na arogora 100 ahifugeliwa mukambura sabwa ya awene okala Anamona a Yehova.c Masiki dhawene, awene anowagalala na ejile enwodhani okosa ninga olobela, osunza, wawaddela attu ena sabwa ya Mulugu wehu vina Omwene waye! Akala ninoruwaniwa obe ninofwara-fwariwa, ninowagalala sabwani ninoziwa wila Yehova oli na iyo vina iyene onele onittuva.—Tia. 1:12; 1 Ped. 4:14.

YOTAGIHA YA NSAKA NTTINO

14. Txini empadduweli mbali wa muzombwe onkala o Tajikistão nanda sabwa jani?

¹⁴ Abali na arogora ena anogumanana makattamiho orutxa mbwenye awene anokaana wagalala watxibarene sabwa ya ovirihamo ttarho esi ttaru dhonilehu. Katanalela empadduwele mbali Jovidon Bobojonov wa vyaka 19 onkala o Tajikistão, wakoddile odhowa okoddoni. Labo 4 na mweri wa Otuburu wa yaka ya 2019, wahidheliwa vani vaye bafugeliwa mukambura mwari mwa myeri vina waheddihiwa ninga timbwini. Opujiwa oku wahivuwihiwa dhilabo dhinjene na dhipano dhinvaviha miselu. Yahivuwihiwa wi iyene wahibubuddiwa na efunelo ya omageleliwa opikirela weddeyana okoddoni vina wabala guwo dha okoddoni. Vasogorhova, muttengoya wahiloga wi iyene wahikana muladdu vina wahittongeliwa mabasa ovadda, mbwenye makaniya ahinatti ogoma mulamuleli wa elaboya wahimulevelela vina wahiruma wi afuruliwe. Mudhidhi obu wetene, Jovidon kattiyile weddeyana waye vina kayeleliwe wagalala. Sabwaya? Sabwa ya odhowavi azuzumelaga dhilobo dhomuyani.

15. Jovidon owodhile dhavi okana oja womuyani bali mukambura?

¹⁵ Oku bali mukambura, Jovidon wanzuzumela oja womuyani masiki vahaniyena Bibilia obe nivuru na nikuru nehu. Ejo ewodheyile dhavi? Abali na arogora ali vakuvi adhowa onvaha dhoja, anleba malebo a siku na siku bageka musakolani mwadhowanina dhoja. Eji yanimukamihedha omwengesa Bibilia vina otanaalela malabo otene. Mumaleliye ofuruliwa mukambura, ohittiya nlago ntti mwa abale ahinagumanagana makattamiho oligana: “Jofuneya olabihedha ofuru oniwe wi wunuwihe omuziwa Yehova modhela wengesa Nzu naye vina manivuru a nikuru nehu.”

16. Txini yazuzumela Jovidon?

¹⁶ Mbalihu ohikalawo mowiwanana na malamulo a Yehova. Ottiya ofwara dhilemelelo dhabure na mweddelo w’ohifwanyelela, iyene wamuzuzumela Yehova vina esile dhili dhattima vamentoni vaye. Jovidon wanziveliwa na dhottandda dhokoddela dha Yehova. Na membesi iyene anvenya bagavuruwana wiba wa balame. Na mattiyu, wanang’ana vineneri na mamweri. Iyene ohiloga dhahi: “Mivaho esi dha Yehova dhanddikamihedha okana wagalala vina oddipangarhaza.” Iyo nigakana elemelelo ya otamalela oja womuyani na womaningoni onivaha Yehova, murima wehu onele wagalala, wagalala oku onele onilibiha wi niwodhe ovilela makattamiho.

17. Mazu a 1 Pedro 1:6, 7 anlaba dhavi mwa muttu agadhile ogumanana makattamiho oladdana na a Jovidon?

¹⁷ Jovidon ohika omwebedha Yehova vamburoni voroma. Iyene wanziwa ttima ya ororomeleya waye na Mulugu. Yezu ologile dhahi: ‘Omwebedhe Yehova Mulugu wawo vina omulabele iyene bahi.’ (Lk. 4:8) Musogorheli wa anyakoddo vina anyakoddoya afuna wi Jovidon attiye omwebedha Yehova. Mbwenye, iyene karumelile, ottiya ejo, anlobela mattiyu na mutana, amukumbirhaga Yehova nikamihedho wi aneyelele mundduni vina anattiye weddeyana waye. Masiki veddihiwiye n’ohifwanyelela, Jovidon txipo kattiyile weddeyana waye. Edhile opadduwa, ovano iyene ohikana wagalala onddimuwa sabwa ya ohittiya weddeyana waye mudhidhi wehiwa nroromelo naye, obubuddiwa na ofugeliwa mukambura.—Kengesa 1 Pedro 1:6, 7.

18. Ninawodhe dhavi odhowavi nikaanaga wagalala?

¹⁸ Yehova onoziwa wi iyo ninofuna okana wagalala webaribari. Ogafwara ttarho esi ttaru dhinnittukulela okana wagalala webaribari, onele okanavi wagalala masiki ogagumanana makattamiho orutxa. Ottiya ejo, onele ologa ninga munasalmo: ‘Nagalale nlogo ninimwakela Yehova akala Mulugu wawa!’—Masal. 144:15.