Txini Enkosa Yehova wi Awobolele Attu Òttega

1-2. (a) Yottega txini, vina ninawodhe dhavi owanana yottegaya? (Koona vina “Mazu Mena Atapuleliwe.”) (b) Txini enone iyo munsunzoni ntti vina masunzo anfarela? (Koona vina “Nota mwa Anamengesa” mu revista ntti.)

OGAHIZIVELIWA oziwa okwela onna Yehova na weyo? Mukalelo mmodha wa weyo ozinddiyela okwela waye bwa osunza ekosile Yehova vina enkosiye wi awobole attu muttegani vina mukwani. Yottegaa mwiddani wawopiha, mwiddani ohinwodhihu ompemberha nooka. Okwa yodhelavo ya yottega. (Rom. 5:12) Mbwenyi kaniyelelile dhotedhene. Na nikamihedho na Yehova, ninowodha ompemberha mwiddani oddu wawopiha. Mwebaribari, Yehova ononipikirhela wi onele onifurula kakamwe muttegani vina mukwani!

² Mwari mwa vyaka 6.000 Yehova onowakamihedha attu owanana yottega. Iyene onkoselani ejuwene? Sabwa ya onikwela. Oromana mudhidhi onipaddutxiliye, Yehova ononilagiha okwela waye. Iyene ohikosa guru yinjene wi anikamihedhe owanana yottega, wi nikale amarho aye. Yehova onoziwa wi yottega enonittukulela okwa, vina iyene kanfuna wi iyo nikwe. Yehova onfuna wi iyo nikalewo namukalakala. (Rom. 6:23) Iyene vina onfuna vina wi weyo okalewo namukalakala. Munsunzoni ntti, ninele wona dhowakula dha mavuzo mararu: (1) Njedhelo gani navahile Yehova attu ottega? (2) Txini ekosile attu ena a nsaka na Bibilia wi amwagalalihe Yehova? (3) Txini ekosile Yezu wi àvune attu muttegani vina mukwani?

NJEDHELO GANI NAVAHILE YEHOVA ATTU OTTEGA?

3. Atelani oroma adhile dhavi okala attegi?

³ Vamuttanddile Yehova mulobwana woroma vina muyana woroma, iyene wafuna wi awene akane wagalala. Yehova ohavaha mburo wokoddela vaddiddi wila akalemo, ohavaha mvaho wa matelo vina mabasa owagalaliha. Awene agahikana gari ya odhaliha elabo ya vati na anawa vina osaddula elaboya bikala paraizu, ninga mundda wa Edeni. Yehova wahinvaha Adamu na Eva nigano nafwanyelani ofwara. Yali elobo yohirutxa. Yehova ohatapulelamo wi awene kottiya wiwelela nigano nttile vina kosakula ohimwiwelela, agahikwa. Ninoziwa epadduwile. Anju wabure, wahamukwela Mulugu vina attu, omunyengetta Adamu na Eva wi amuttegele Mulugu. Atelani aba oroma ahinvuruwana anju ole wabure. Ottiya omukuluvela Babiwa wokwela awene amuttegela. Iyo ninoziwa epadduwile vasogorhova. Oromana labonene-nttile, Adamu na Eva ahitabuwa egumi yawa yotene: awene ahuluvala, omamalelowa ahikwa.—Wita 1:​28, 29; 2:​8, 9, 16-18; 3:​1-6, 17-19, 24; 5:5.

4. Yehova onidda dhavi yottega vina onnikamihedha dhavi owanana? (Roma 8:​20, 21)

⁴ Ntti nipadduwo nokubanyiha. Mbwenyi Yehova ohikosa muli-mwetemwene wi nipadduwo ntti nilebiwe mBibiliani wila ninonelemo ebaribari yamakamaka vaddiddi. Nipadduwo ntti ninonikamihedha wona sabwaya eniddela Yehova yottega. Yottega enonimwalaniha na Babihu vina enonittukulela okwa. (Iza. 59:2) Nona Anju ole wabure Satana, omuttukuleli Adamu na Eva ottega, onokwela yottega vina onowakwekwettela attu wuttegani mpaka ddabuno. Muttegile Adamu na Eva, txino Satana wahubuwela wi wahiwodha ogomiha efunelo ya Mulugu na nlogo na attu. Mbwenyi iyene kobuwela wi Yehova ddokwela. Yehova txipo kagatxinjile efunelo yaniyena na ana Adamu na Eva. Iyene onowakwela attu, nona mudhidhi wakakene ottegile Adamu na Eva, Yehova wahavaha njedhelo anawa. (Kengesa Roma 8:​20, 21.) Yehova wanziwa wi ana ena a Adamu na Eva agahisakula omukwela vina omwiwelela. Nona Yehova ohiveda marhe wi àvune muttegani vina àvahe gari ya okana mandano ofiyedheya na iyene. Elobo gani ekosile Yehova wi ejo ewodheye?

5. Mudhidhi gani wavahile Yehova njedhelo noroma attu ottega? Katapulela. (Wita 3:15)

⁵ Kengesa Wita 3:15. Yehova ohavaha attu njedhelo noroma, valogiliye na Satana egampadduweli musogorho. Yehova wahibaza ologa wi nigahikalawo “ziza” nigavunile nlogo na attu. Ziza ntti nigahimutolotxa Satana vina nigahigomiha makattamiho atoteyile mmunddani mwa Edeni. (1 Jo. 3:8) Mbwenyi wi niwodhe okosa ejuwene, zizana nigahitabuwa. Satana agahiluma etili yaye, kuloga, agahitota okwa waye. Ejo txibarene egahimutotela Yehova wiwa opa vaddiddi. Mbwenyi Yehova wali womala-nawale wi atabuwe, sabwani mwa eji attu matxikwi na matxikwi agahivuniwa muttegani vina mukwani.

ATTU OTTEGA A MASAKA A BIBILIA AWODHILE DHAVI ORUMELIHIWA VAMENTONI VA YEHOVA?

6. Txini ekosile alobwana ororomeleya ninga Abel na Nowé, wi akale amarho a Yehova?

⁶ Vyaka mazana musogorhomwa, Yehova wahinonihedhamo vang’ono-vang’ono yafwanyela okosa attu ohiligana wi awodhe okala amarho aye. Motagiha, Abel, mwana wanawili wa Adamu na Eva, ddi muttu woroma olagihile nroromelo wa Yehova mmalele ovira yapadduwile mu Edeni. Abel wannimukwela Yehova, wanfuna omwagalaliha vina okala marho waye, nona wanfuna onvaha elobo Yehova. Abel wali mukumbuzi wa mabila, nona wahattuka ana-mabilaye ang’onovi, bamperhekela Yehova ninga mukutto. Yehova wonilemo dhavi? Iyene “oziveliwa na Abel, [vina] mukutho wayeyá.” (Wita 4:4) Yehova vina wahiziveliwa na mikutto dha attu ena amukwela vina amukuluvela iyene—ninga Nowé. (Wita 8:​20, 21) Sabwa ya orumela mikutto esi, Yehova wahilagiha wi attu ottega agahiwodha omwagalaliha vina okala amarho aye.b

7. Txini ensunzihu na yokumbirha emukosele Yehova Abrahamu?

⁷ Mudhidhi mung’onovi musogorho, Yehova wahimukumbirha Abrahamu, mulobwana wana nroromelo noliba, wi akose elobo yorutxa vaddiddi—omperheka mwanaye Izaki ninga mukutto. Kavali waganyedha wi yokumbirha eji yali yorutxa vaddiddi yakelile Abrahamu mwigumini mwaye. Txino kayiwo elobo yina yorutxa emukumbirhile Yehova Abrahamu opitta eji, masiki dhawene Abrahamu wahigana omwiwelela Yehova. Abrahamu afunaga omperheka mwanaye Izaki ninga mukutto, Yehova wahimutximiha. Yokumbirha eji ya Yehova ehinisunziha ebaribari yattima vaddiddi—Yehova agali womala-nawale wi aperheke egumi ya Mwanaye wamukwelitxiye ninga mukutto. Ejo entonyihedha okwela ona Yehova na nlogo na attu.—Wita 22:​1-18.

8. Mikutto dhalogiwa Munlamuloni na Mizé dhalagiha eni? (Onamakutta 4:27-29; 17:11)

⁸ Vyaka dhinjene musogorho, Yehova wahivaha Nlamulo nlogo na Izrayel, Nlamulo ntti naloga wi awene anfwanyela operheka mukutto wa dhinama wi aleveleliwe dhottega dhawa. (Kengesa Onamakutta 4:27-29; 17:11.) Mikutto esile dhatonyihedha mukutto mwina wa ttima vaddiddi, mukutto ogafurulile kakamwe nlogo na attu muttegani. Yehova ohavudhelela anamavuhulela enjene ologa mwaha wa ziza napikirheliwe, odduwene agali Mwana wamakamaka wa Mulugu, wanfwanyela otabuwa vina okwa. Ziza ntti nigahiperhekiwa ninga mwana-nibila. (Iza. 53:​1-12) Kobuwela: Yehova agahikosa masasanyedho wi Mwanaye wokweleya aperheke egumi yaye ninga mukutto wi avune nlogo na attu—vamodha na weyo vina—mukwani vina muttegani!

TXINI EKOSILE YEZU WI ANIVUNE?

9. Txini elogile Joau Batista mwaha wa Yezu? (Ahebreu 9:22; 10:​1-4, 12)

⁹ Yaka ya 29 Kristu babaliwe, Joau Batista wahimoona Yezu w’o Nazareti vina baloga: “Oddu ddi Mwana-Nibila wa Mulugu onthimiha yothega ya elabo!” (Jo. 1:29) Mazu aba anowoniha kakamwe wi Yezu wali ziza napikirhele Yehova. Iyene agahiperheka egumi yaye ninga mukutto mwa nlogo na attu. Mudhidhene obo, njedhelo navahile Yehova wi avune kakamwe nlogo na attu muttegani nahinoneleyamo mowakwana-mwene.—Kengesa Ahebreu 9:22; 10:​1-4, 12.

10. Yezu olagihile dhavi wi odhele “watamela” attegi?

¹⁰ Yezu wanazuzumela makamaka abale akubanya sabwa ya dhotega dhawa, vina wanawoba wi adhe akale anamafwara aye. Yezu wanziwa wi enattukulela attu otabuwa, yottega. Nona iyene wankosa muli-mwetemwene wi akamihedhe alobwana na ayana atabuwa sabwa ya dhottega dhakosilani. Mudhidhi dhahi, iyene wahiloga ejuwene alabihedhaga nladdaniho. Iyene ohiloga: “Attu ali agumi kanimutamela mediku, animutamela babale ali aredda.” Venevo iyene ohigomiha mazuya alogaga: “Miyo kaddidhele wakuwela aligani, ddidhele watamela attegi.” (Mt. 9:​12, 13) Jijuwene-wene ekosile Yezu. Olevelela dhottega dha muyana dhahi osuwile myeddo dhaye na mintori. (Lk. 7:​37-50) Iyene ohimusunziha ebaribari yamakamaka vaddiddi muyana wa Musamaria masiki aziwaga wi iyene wakala na mulobwana s’otelana. (Jo. 4:​7, 17-19, 25, 26) Mulugu vina ohinvaha Yezu, ewodhelo ya ogomihana okwa—entoteya na yottega. Dhavi? Yezu okosile ejuwene modhela wavenyiha mukwani—alobwana, ayana vina aima.—Mt. 11:5.

11. Sabwaya jani attu ottega kova omwaddamela Yezu?

¹¹ Enonoleyamo sabwaya yattukulela attu akosa dhottega dhinddimuwa onfiyedha Yezu. Yezu wanaweddiha attu aba na opama, vina wannonelamo mukalelo waviwamo awene. Nona kavo wova ologa na iyene. (Lk. 15:​1, 2) Yezu wanatamalela vina wanattuva abale atonyihedha nroromelo wa iyene. (Lk. 19:​1-10) Dhahene Yezu ohilagiha mowakwana-mwene wi Yehova, Mulugu wa ttagaraga. (Jo. 14:9) Dhilobo dhilogile Yezu, vina dhikosiliye, dhanlagiha wi Babi waye wa ttagaraga, onowakwela attu vina onofuna omukamihedha muttu-muttu wa iyo opemberha yottega. Ottiya ejo, Yezu ohakamihedha attegi, okana efunelo ya okosa matxinjo vina onfwara iyene.—Lk. 5:​27, 28.

12. Txini esunzihile Yezu mwaha wa okwa waye?

¹² Yezu wanziwa wi agahiperheka egumi yaye. Nona dila dhinjidhene, iyene ohawaddela anamafwara aye wi agahigulihiwa vina agahikomeliwa vapingirhizini. (Mt. 17:22; 20:​18, 19) Iyene vina wanziwa wi mukutto obo ogahiburutxa yotega mwilaboni, dhahene ninga mwalogile Joau na anamavuhulela ena. Yezu vina ohiloga wi agamala okwa agahakukusa attu otene. (Jo. 12:32) Eji entapulela wi, attu ohiligana agahiwodha omuttittimiha Yehova modhela omurumela Yezu ninga Nabuya wawa vina ofwara ttarho dhaye. Kokosa ejuwene agahifuruliwa muttegani. (Rom. 6:​14, 18, 22; Jo. 8:32) Nona Yezu wahiliba murima, vina wali womala-nawale wi avilevele okwa wotabuwa vaddiddi.—Jo. 10:​17, 18.

13. Yezu okwile dhavi, vina okwa waye edhilena yopurelamo gani? (Koona vina foto.)

¹³ Yezu ohigulihiwa na mmodha wa amarho aye ofiyedheya. Osogorhowa, amwiddani aye ahimmaga, ahimuruwana, vina ahimmagedhela dhilobo dhahakosiliye. Vina ohisottottiwa venjene, omamalelowa anyakoddo ahimukomela vapingirhizini. Dhotedhene esi mohaganyedha, dhimutotela goyi yinjene Yezu. Mbwenyi ohikalawo muttu otabuwile vopitta, Yehova Mulugu. Yehova wanfwanyela wang’anela ewodhelo yaye ehingoma wi anagomihe makattamiho a Mwanaye. Sabwaya jani? Txini emuttukulele Yehova orumela wi Mwanaye atabuwe vina akwe? Yowakulaya eli modha bahi, okwela. Yezu ohiloga: “Mulugu oakwela athu vaddiddi ofiyedha walevela Nammodha waye, wi animuroromela ahirimele, athidde egumi yohimala.”—Jo. 3:16.

14. Mukutto wa Yezu, ontonyihedha eni mwa weyo?

¹⁴ Mukutto wa Yezu ntonyihedho na okwela onddimuwa onna Yehova na ziza na Adamu na Eva. Mukutto obu, ontonyihedha wi Yehova onowukwela venjene. Yehova ohimperheka Mwanaye wokweleya vina ohifiyedha wiwa opa vaddiddi wi awuvune weyo muttegani vina mukwani. (1 Jo. 4:​9, 10) Ebaribari, Yehova onofuna omukamihedha muttu-muttu wa iyo owanana yottega—vina opemberha!

15. Txini enfwanyelihu okosa wi dhotega dhehu dhileveleliwe?

¹⁵ Nvaho obu operhekile Yehova, mukutto wa Mwanaye wokweleya, onowodhiha oleveleliwa dhottega dhehu. Mbwenyi wi nileveleliwe na Mulugu, ninofwanyela okosavo elobo. Elobo gani? Joau Batista vina osogorhowa, mwinyene Yezu wahiloga enfwanyelihu okosa: “Karugunutxani murima vowi Omwene wa wirimu oli vakuvi.” (Mt. 3:​1, 2; 4:17) Nona, enfwanyelihu okosa wi niwodhe owanana yottega vina nikale amarho a Mulugu wehu wokwela ja otxinuwa. Mbwenyi txini entapulela otxinuwa vina ejo enanikamihedhe dhavi owanana yottega? Nsunzo ninfwarela, ninele wakula nivuzo ntti.