Ninomutamalela Yehova—Sabwa ya Olevelela Dhottega Dhehu

1-2. Mukalelo wa attu onligana dhavi na wa muzombwe ologiwe omaromo wa nsunzo ntti?

KAMUBUWELE muzombwe oleliwe na anamudhi orela. Siku nimodha opadduwa elobo yohijedheleya; amambali aye okwa na asidenti. Muselu obu onomukubanyiha vaddiddi, mbwenyi onowakela muselu mwina wohijedheleya. Iyene onowona wi amambali aye ahinonga dhorela dhotene dha anamudhi vina ahikana mangawu menjene. Ottiya owalana dhorela, iyene onofwanyela opitxa mangawu a amambali aye vina attuya anfuna wi iyene apitxe momaguva-mwene. Iyene txipo kanawodhe opitxa mangawu otene.

² Iyo nili ninga muzombwe oddu, amambali ehu oroma Adamu na Eva, àli attu oligana vina akala mparaizuni wokoddela. (Wi. 1:27; 2:​7-9) Awene ahikana gari ya ojavo egumi yapama vina yamukalakala. Mbwenyi dhilobodha dhahitxinja, awene ayelela gari ya okala mParaizu vina okalawo namukalakala. Elobo gani yattiyedhilani anawa? Bibilia ononaddela: “Nona, sabwa ya mulobwana mmodha bahi [Adamu], ottega ovolowa mwilaboni, vina ottegawa ototelamo okwa, dhahene okwa onowafwanya attu otene sabwani otene attega.” (Rom. 5:12) Elobo enittiyedhi Adamu yottega ennitotela okwa. Yottega eji enittiyedhi Adamu eli ninga mangawu manddimuwa ahinwodhihu opitxa.—Ms. 49:8.

3. Sabwaya jani dhottega dhehu dhigaladdanihiwa na mangawu?

³ Yezu oladdaniha yottega na mangawu. (Mt. 6:12; Lk. 11:4) Nigattega ninkala ninga nihikana mangawu na Yehova anfwanyelihu opitxa. Nigahipitxe, mangawuya anfudheya bahi iyo nigakwa.—Rom. 6:​7, 23.

4. (a) Se nikamihedho na Yehova, txini egapadduweli attegi otene? (Masalmo 49:​7-9) (b) Mbibiliani nzu ntti “yottega” nintapulela eni? (Koona kasha “Yottega.”)

⁴ Iyo nooka kaninwodha wiyelela okana dhotene dhiyelelile Adamu na Eva. (Kengesa Masalmo 49:​7-9.) Se nikamihedho, kanigakanile njedhelo na musogorho, okalawo namukalakala vina ovenyihiwa mukwani. Mwebaribari, okwa wehu ogali ninga wa dhinama.—Ko. 3:19; 2 Pe. 2:12.

5. Babi wehu Yehova onikamihedhile dhavi opitxa mangawu a dhottega dhehu?

⁵ Omubuwelaga muzombwe ologiwe mundduni, iyene agaviwilemo dhavi muttu worela kuvilevela wi apitxe mangawu otene? Mwebaribari muzombwe oddule agahitamalela vaddiddi vina agahirumela otapuwa mada wa muttuya. Na mukalelo wakene, Babihu wokwela Yehova, ohinivaha nvaho ompitxa mangawu a yottega anittiyedhile Adamu. Yezu otapulelamo dhahi: “Mulugu okwela vaddiddi elabo ofiyedha omperheka nammodha waye wi otene animuroromela ahitolotxiwe, mbwenyi akaane egumi yohimala.” (Jo. 3:16) Ottiya ejo, nvaho obu onivaha gari ya okana mandano ofiyedheya na Yehova.

6. Txini enasekeserhihu mu nsunzoni ntti nanda sabwaya jani?

⁶ Ninawodhe dhavi opurelamo nvaho obu wotikiniha vina oleveleliwa dhottega dhehu? Wi nakule nivuzo ntti ninele osekeserha mazu mang’onovi anfwanyeya mBibiliani vina entapulelani. Otanalela ekosile Yehova wi anilevelele, enele wenjedhedha omutamalela wehu iyene.

YEHOVA ONFUNA WI NIKALE AMARHO AYE

7. (a) Elobo gani yina eyelelile Adamu na Eva? (b) Sabwa ya okala ziza na Adamu na Eva, elobo gani enfunihu? (Roma 5:​10, 11)

⁷ Ottiya oyelela gari ya okalawo namukalakala, Adamu na Eva ayelela mandano awa na Babiwa Yehova. Omaromo, Adamu na Eva ankosa mpaddi wa anamudhi a Mulugu. (Lk. 3:38) Mbwenyi mukoddelani omwiwelela Yehova, iyene kaattiyile vina okosa mpaddi wa anamudhi aye, ejo epadduwile awene ahinakana aima. (Wi. 3:​23, 24; 4:1) Nona ana Adamu na Eva otaganyiha na iyo vina, kanigawodhile okosa mpaddi wa anamudhi a Yehova, sabwa ya ejuwene ninofuna nikamihedho wi nikane mandano apama na iyene. (Kengesa Roma 5:​10, 11.) Nanfwanyela ottiya okala amwiddani a Mulugu wi nikale amarho aye. Masiki ekalaga elobo yotikiniha, Yehova ddiromile okosa elobo wi ejoya ewodheye. Dhavi?

YEHOVA OHIKOSA MASASANYEDHO WI NIKALE AMARHO AYE

8. Masasanyedho gani akosile Yehova wi niyelele okana mandano na iyene?

⁸ Yehova ohikosa masasanyedho wi eyelele okana mandano na attu ottega. Eji entapulela operheka elobo enna ttima yakakene. Dhahene, elobo eyeleliwe enodhaga wiyihedhiwa obe otxinjiwa. Malebo a Egregu anologa ekosile Yehova wi muttu-muttu wa iyo awodhe okana mandano na iyene.—Rom. 3:25.

9. Txini ekosile Yehova wi dhottega dha ana Izrayel dhileveleliwe?

⁹ Wi ana Izrayel awodhe okana mandano apama na Yehova, iyene wahikosa masasanyedho a mudhidhi mung’onovi wi alevelele dhottega dhawa. Mw’Izrayel, Siku Noleveleliwa Dhottega nanubuweliwa vyaka dhotene. Namakutta munddimuwa wamperheka mikutto wa dhinama mwa nlogo notene. Ebaribari wi mikutto wa dhinama, kadhawodha ottimiha mowakwana-mwene dhottega dha attu sabwani dhinama kadhina ttima ninga attu. Mbwenyi ana Izrayel atxinuwa vina aperheka mikutto dhajedhelana Yehova, iyene wali womala-nawale wi alevelele dhottega dhawa. (Ahe. 10:​1-4) Mikutto dhaperheka ana Izrayel Siku Noleveleliwa vina masiku mena dhanakamihedha awene oziwa wi àli attu ottega vina anfuna elobo yina wi aleveleliwe kakamwe dhottega dhawa.

10. Yehova okosile eni wi dhottega dha attu dhileveleliwe namukalakala?

¹⁰ Txini ekosile Yehova wi awodhe walevelela kakamwe attu dhottega dhawa? Iyene ohikosa masasanyedho wi Mwanaye wokweleya Yezu “[aperhekiwe] dila modha bahi, wila agomihe dhottega dha enjene.” (Ahe. 9:28) Yezu ohiperheka egumi yaye “wi awobolelena attu enjene.” (Mt. 20:28) Yobolo entapulela eni?

MUKUTTO WA YEZU OHIPITXA MUTTENGOYA

11. (a) Mowiwanana na Bibilia, txini entapulela yobolo? (b) Bani agawodhile opitxa yobolo?

¹¹ Bibilia, onologa wi Yehova ohigana wi wanfwanyela opitxa yobolo wi dhottega dhehu dhileveleliwe vina niwodhe okala amarho aye.a Kito muttengo gani wa yobolo wafwanyela opitxiwa wi nikane wili eyelelile Adamu? Kobuwela wi Adamu na Eva ayelela egumi yawa yoligana vina gari ya okalawo namukalakala. Nona yobolo yanfwanyela okana ttima yakakene na ejile eyeleliwe. (1 Tm. 2:6) Muttengo wa yobolo ogawodheyile opitxiwa bahi na mulobwana munddimuwa (1) woligana; (2) agana ewodhelo ya okalawo namukalakala velaboni ya vati vina (3) agali womala-nawale wi aperheke egumi yaye wila anivune. Mwadhawene egumi ya muttu oddo egahiwodha opitxa ejile eyeleliwe.

12. Sabwaya jani Yezu ddigawodhile opitxa yobolo?

¹² Katanalela mwaha miraru dhimuttukulele Yezu owodha opitxa muttengo wa yobolo. (1) Iyene wali woligana—“kattegile.” (1 Pe. 2:22) (2) Sabwa ya ejuwene, iyene agahikana ewodhelo ya okalawo velaboni ya vati namukalakala. (3) Iyene wali womala-nawale wi aniperhekele egumi yaye. (Ahe. 10:​9, 10) Vowi wali muttu woligana, Yezu wali ninga mulobwana woroma Adamu, ahinatti ottega. (1 Ko. 15:45) Sabwa ya Yezu operheka egumi yaye, iyene wahiwodha operheka muttengo wayelelile Adamu. (Rom. 5:19) Na mukalelo obu Yezu wahidha okala Adamu womariha. Kili yofuneya muttu mwina woligana odha wi apitxe eyelelile Adamu. Na okwa waye Yezu operheka mukutto “dila modha bahi.”—Ahe. 7:27; 10:12.

13. Ottiyana gani olivo wa oleveleliwa dhottega na yobolo?

¹³ Ottiyana gani olivo wa oleveleliwa dhottega na yobolo? Oleveleliwa dhottega masasanyedho ankosa Yehova wi niwodhe okala amarho aye. Yobolo muttengo opitxiwe wi attu aleveleliwe dhottega dhawa. Muttengo wa yobolo oniwanana na nikami na Yezu nikuttuleliwe iyo.—Ef. 1:7; Ahe. 9:14.

YEHOVA OHINIFURULA MUTTEGANI, MUKWANI VINA ONONONA NINGA ALIGANI

14. Txini enasekeserhihu ovanene?

¹⁴ Nimpurelamo dhavi dhinikoseli Yehova? Wi nakule nivuzo ntti, ninele wona mazu meeli anlabihedha Bibilia annikamihedha ononelamo enfwanyelihu okosa wi nileveleliwe na Yehova.

15-16. (a) Mbibiliani nzu ntti “woboliwa” nintapulela eni? (b) Niniviwamo dhavi sabwa ya oziwa wi nihifuruliwa muttegani vina mukwani?

¹⁵ Bibilia onolabihedha nzu ntti woboliwa nintapulela ofuruliwa onwodheya sabwa ya opitxiwa yobolo. Murumiwi Pedro ohiloga dhahi: “Munoziwa wi kamufuruliwe na dhilobo dhinvudda ninga woru obe parata mmweddeloni mwenyu wabure, obuwene oravihiwenyu na azamani enyu. Mbwenyi mufuruliwe na nikami na Kristu ninna ttima enddimuwa opitta nikami na nibila nohiragala, vina nihinna maleba.”—1 Pe. 1:​18, 19.

¹⁶ Sabwa ya mukutto wa yobolo, enowodheya iyo ofuruliwa mwa otabuwa wotene ontoteya sabwa ya yottega vina okwa. (Rom. 5:21) Kaninaganyedha wi iyo nikana mangawu menjene na Yehova vina Yezu sabwa ya onifurula modhela nikami na Yezu.—1 Ko. 15:22.

17-18. (a) Txini entapulela woniwa ninga aligani? (b) Eji entapulela eni mwa muttu-muttu wa iyo?

¹⁷ Bibilia onologa wi alabeli a Yehova ali ninga aligani. Eji entapulela wi Yehova kanalogosa wi apitxe dhottega dhinkosani. Eji kintapulela wi Yehova onopwaza magano aye oligana. Woniwa ninga aligani kahiye elobo enfwanyelelihu; Yehova vina kanfwaseyela wang’ana dhottega dhehu. Mbwenyi oli womala-nawale wi afudhe mangawu ehu sabwani ninororomela yobolo epitxiwe na Yezu.—Rom. 3:24; Gal. 2:16.

¹⁸ Eji entapulela eni mwa iyo? Abale asakuliwe wi attonge na Yezu wirimu anoniwa ninga aligani vina ana a Mulugu. (Tit. 3:7; 1 Jo. 3:1) Dhottega dhawa dhihileveleliwa. Enkala ninga awene txipo kanattegaga, dhahene anorumeliwa Mumweneni. (Rom. 8:​1, 2, 30) Abale anna njedhelo nokala velaboni ya vati namukalakala anoniwa ninga aligani, amarho a Mulugu vina dhottega dhawa dhinoleveleliwa. (Tia. 2:​21-23) Muttitti munddimuwa onaviluwe mu Armagedón, ohikana gari yohikwa vina. (Jo. 11:26) ‘Aligani’ vina ‘ahiligani’ akwile ahikana njedhelo novenya mukwani. (Mer. 24:15; Jo. 5:​28, 29) Mwa ovira wa mudhidhi, alabeli otene a Yehova anakale velaboni ya vati animwiwelela anele “ofwanya ofuru wowakwana wa ana a Mulugu.” (Rom. 8:21) Iyo ninowagalala sabwa ya wubuwela mudhidhi onakale iyo—ana oligana a Babihu Yehova!

19. Mukalelo wehu otxinjile dhavi na enikosele Yehova vina Yezu? (Koona kasha “Eji Entapulela eni mwa Iyo.”)

¹⁹ Mukalelo wehu oli ninga wa muzombwe ologiwe omaromo wa nsunzo ntti, oyelelile dhotedhene bahalana mangawu menjene ahawodhiye opitxa. Mbwenyi Yehova ohinivaha nikamihedho. Mukalelo wehu ohitxinja sabwa ya Yehova okosa masasanyedho wi dhottega dhehu dhileveleliwe vina Yezu opitxa yobolo. Omukuluvela wehu Yezu Kristu ononikosiha ofuruliwa wa dhottega dhehu vina mukwani. Dhottega dhehu vina dhinoleveleliwa, ejo egapadduwa ninkala ninga kaninattegaga. Mbwenyi yamakamakaya, ninokana mandano na Babihu wokweleya Yehova.

20. Txini enasekeserhihu mu nsunzoni ninfwarela?

²⁰ Iyo ninomutamalela venjene Yehova vina Yezu nigatanalela dhotedhene dhinikosele awene. (2 Ko. 5:15) Se nikamihedho nawa, kanigana njedhelo! Mbwenyi txini entapulela olevelela wa Yehova mwa muttu-muttu wa iyo? Nsunzo ninfwarela ninele osekeserha yowakulaya.