NSUNZO 7
JIBO 15 Attittimihiwe Nammodha wa Yehova!
Olevelela wa Yehova—Ontapulela eni mwa Weyo
“Mwa nyuwo punfwanyiwa oleveleliwa [webaribari].” —MS. 130:4.
DHINASUNZE IYO
Ninele wona dhotagiha dhing’onovi dhinloga Bibilia vina mukalelo onanikamihedhani wunuwiha omutamalela wehu Yehova sabwa ya onilevelela kakamwe.
1. Ekalele nni yorutxa ononelamo muttu agaloga wi ononilevelela?
“MIYO DDINOWULEVELELA.” Japama vaddiddi ovuruwana mazu aba, makamaka akala nihiloga obe nihikosa elobo emunyimulile muttu mwina! Kito mazu aba antapulela nni txibarene? Antapulela wi mandano enyu anele odhowagavi vasogorho? Txino muttuya kanfuna ologa wili sabwa ya ejile epadduwile, mbwenyi mandano enyu kali ninga mwalani wale. Muttu agaloga wi ddihulevelela enotapulela dhilobo dhottiyana.
2. Txini enloga Bibilia sabwa ya olevelela wa Yehova? (Koona vina nota.)
2 Olevelela wa Yehova onottiyana na mukalelo onalevelelihu attu ena. Kawo onwodha olevelela ninga Yehova. Munasalmo dhahi ohiloga mwaha wa Yehova: “Mwa nyuwo punfwanyiwa oleveleliwa [webaribari]; nona mugoviwa na nriho.”a (Ms. 130:4) Txibarene olevelela wa Yehova kwa ebaribari. Ddi iyene bahi onziwa mowakwana-mwene entapulela olevelela. Mwa mpaddi mwina, anamaleba Bibilia ahilabihedha nzu ntti olevelela na Hebrayiko nihinlabihedhiwa wi niloge mukalelo onlevelela attu.
3. Olevelela wa Yehova ottiyanile dhavi na mukalelo onlevelelihu? (Izaiya 55:6, 7)
3 Yehova agamulevelela muttu, iyene onofudha kakamwe yottegaya. Mwadhawene muttuya onokanavi mandano ofiyedheya na Yehova. Iyo ninomutamalela venjene Yehova sabwa ya onilevelela na mukalelo obu wotikiniha.—Kengesa Izaiya 55:6, 7.
4. Yehova onnikamihedha dhavi ononelamo entapulela olevelela webaribari?
4 Akala olevelela wa Yehova ohittiyana na wehu, kito ninga attu ohiligana ninawodhe dhavi ononelamo ejile entapulela olevelela webaribari? Yehova onolabihedha dhotagiha dhing’onovi wi anikamihedhe ononelamo olevelela waye. Mu nsunzoni ntti, ninele wona dhotagiha dhing’onovi. Dhotagiha esi dhinolagiha mukalelo onfudha Yehova yottega bakosa wi mandano ehu eyelele ninga mwalani wale. Otanalela dhotagiha esi, enele wunuwiha omutamalela wehu Babihu Yehova oli Mulugu wapama vina wa ttagaraga.
YEHOVA ONOFUDHA DHOTTEGA
5. Txini empadduwa Yehova agalevelela dhottega dhehu?
5 Mbibiliani, dila dhinjene dhottega dhinoladdanihiwa na muttorho. Mwene Davidi ohiloga dhahi sabwa ya dhottega dhaye: “Dhothega dhaga dhinoddilemela [vamusorhoni], ninga muthorho ohinwodhemi othukula.” (Ms. 38:5, [Ms. 38:4 NM]) Mbwenyi Yehova onolevelela dhottega dha abale antxinuwa. (Ms. 25:18; 32:5) Nzu na Hebrayiko nitapuleliwe ninga “olevelela” nintapulela “ovenyiha” obe “ottukula.” Enowodheya iyo omona Yehova ninga mulobwana woliba vaddiddi onttukula muttorho wa dhottega dhehu badhowana wuddayiwene.
“Muddilevelela” (Ms. 32:5)
6. Yehova onttukulela wuvi dhottega dhehu?
6 Bibilia onolabihedha yotagiha yina enoniha wi Yehova onottukulela wuddayiwene dhottega dhehu. Masalmo 103:12 onologa: “Mulapelano oli omadhelo wa nzuwa na omaddowelo, ji ekalelo ennibareliha iyene dhothega dhehu.” Omadhelo wa nzuwa txipo kungumana na omaddowelo wa nzuwa. Sabwani ompadduwa mimburo vina midhidhi dhottiyana. Na mazu mena munasalmo oddu, onologa wi Yehova onottukulela dhottega dhehu mburo wolapela vaddiddi ohinawodhihu ofwanya vina. Eji enolagiha wi Yehova ononilevelela kakamwe!
“Mulapelano oli omadhelo wa nzuwa na omaddowelo” (Ms. 103:12)
7. Yehova ontapulela dhavi enkosiye na dhottega dhehu? (Mikeya 7:18, 19)
7 Masiki Yehova attukulelaga dhottega dhehu wuddayiwene, iyene onottiddelavi dhottegadha? Nne-wene. Mwene Ezekiya ohiloga: “Muddilevelela dhothega dhaga dhotene.” (Iza. 38:9, 17) Eji enolagiha wi Yehova onolevelela dhottega dha muttu otxinuwile nanda txipo kanubuwela vina. Nona enowodheya otapulela mazu a Ezekiya na mukalelo obu: “Nyuwo mukosiha dhottega dhaga okala ninga kadhinapadduwaga.” Bibilia onottukulela vadhulu makani aba na yotagiha yina enfwanyeya va Mikeya 7:18, 19. (Kengesa.) Versu esi dhinologa wi Yehova onoponyela dhottega dhehu mbara nanda dhottegadha badhiririmela. Masaka a mundduni elobo kumottela mbara biririmela kiyafwanyiwa vina.
“Muddilevelela dhothega dhaga dhotene” (Iza. 38:17)
Nyuwo munele oririmiha mbara dhottega dhaga (Mik. 7:19)
8. Txini esunzilihu mpaka veneva?
8 Dhotagiha esi, dhinonisunziha wi Yehova aganilevelela onoburutxa muttorho wa dhottega wali vetturini vehu. Davidi ohiloga: “Ohagalala babale aleveleliwe merelo awa abure vina dhottega dhawa dhidduwaliwa, wohagalala dduddule dhottega dhaye, dhihintanaliwa na Yehova.” (Rom. 4:7, 8) Oku olevelela webaribari!
YEHOVA ONOTTIMIHA DHOTTEGA DHEHU
9. Yotagiha gani enlabihedha Bibilia wi anikamihedhe ononelamo wila Yehova ononilevelela kakamwe?
9 Yehova onolabihedha yotagiha yina wi anikamihedhe ovaha ttima mukutto wa yobolo, iyene onokuputta obe onottimiha dhottega dha muttu otxinuwile. Bibilia onologa wi enkala ninga Yehova onosuwa vina onokuputta dhottega. Eji enomuttukulela muttuya okala wotxena wili. (Ms. 51:7; Iza. 4:4; Jer. 33:8) Mwinyene Yehova onotapulelamo makani aba va Izaiya 1:18: “Masiki dhothega dhenyu kokala dhofila-fila, dhigatxena ninga nthoje; masiki dhikale dhofila ninga guwo yasuli, dhigatxena ninga murhi.” Jorutxa vaddiddi oburutxavo nleba nofila vaguwoni. Nona Yehova akosa yoladdaniha eji enlagiha wila enowodheya dhottega dhehu okuputtiwa ofiyedha okala ninga kaninattegaga.
“Masiki dhothega dhenyu kokala dhofila-fila, dhigatxena ninga nthoje” (Iza. 1:18)
10. Bibilia ontapulela dhavi mukalelo wapama onnilevelela Yehova?
10 Ninga monelihu nsunzo nivirile, dhottega dhehu dhinoladdanihiwa na mangawu. (Mt. 6:12; Lk. 11:4) Nona dila dhotene dhinimuttegelihu Yehova, enkala ninga mangawu ehu anowinjivavi. Mangawu ehu manddimuwa vaddiddi! Mbwenyi Yehova aganilevelela, enkala ninga onofudha mangawu anihu. Iyene kanjedhela wi nimpitxele dhottega dhinileveleliye. Na mukalelo wakakene onagalala muttu agalaveleliwa mangawu aniye, iyo vina ninohagalala venjene Yehova aganilevelela!
“Munilevelele dhoddawa dhehu” (Mt. 6:12)
11. Bibilia onfuna atapulele eni agalogaga wi dhottega dhehu dhinottimihiwa? (Merelo 3:19)
11 Ottiya bahi olevelela mangawu obe dhottega dhehu, Yehova onottimiha kakamwe. (Kengesa Merelo 3:19.) Mangawu agaleveleliwa enkala ninga elebiwe X vadhulu va muttengo wa mangawuya. Masiki dhawene muttengoya onowoneya. Mbwenyi ottimiha elobo enottiyana. Wi ninonelemo makani aba, ninofwanyelela wubuwela wi tinta yalabihedhetxa attu masaka a mundduni yanwodheya ofudha na manje. Nona kiyarutxa muttu ottidda esponja banyettiya vang’onovi wi awodhe ofudha yalebiwe na tintaya. Kuloga, mangawu “agattimihiwa” anofudhiwa kakamwe. Kinwodheya vina wona yalebiwevo, enkala ninga mangawuya kanakalagawo. Iyo ninotamalela venjene sabwa ya oziwa wi Yehova agalevelela dhottega dhehu onofudha kakamwe!—Ms. 51:9.
“Wila Yehova auleveleleni dhottega dhenyu” (Mer. 3:19)
12. Ninsunzavo eni na yotagiha enloga sabwa ya murabo munddimuwa?
12 Va Izaiya 44:22 Yehova onolabihedha yotagiha yina wi atapulele mukalelo onttimiha iyene dhottega dhehu. Veneva iyo ninowengesa: Ddinele ottimiha dhoddawa dhenyu ninga ddinkunela na mirabo vina dhottega dhenyu na murabo munddimuwa. Yehova aganilevelela, enkala ninga iyene onottidda murabo munddimuwa bakunelana dhottega dhehu wi iyene ahoone iyo vina nihoone.
Ddinele ottimiha dhoddawa dhawa ninga ddikunelana na mirabo (Iza. 44:22)
13. Niniviwamo dhavi Yehova agalevelela dhottega dhehu?
13 Eji ennisunziha eni? Yehova agalevelela dhottega dhehu, iyo kaninfwanyela vina ovipwatteliha muladdu. Mukutto wa Yezu Kristu, ohifudha kakamwe dhottega dhehu. Enkala ninga txipo kaninattegaga. Nigatxinuwa txibarene dhottega dhehu, Yehova onnilevelela dhawene.
YEHOVA ONONIRUMELA WILI NINGA AMARHO AYE
Sabwa ya oleveleliwa na Babi wehu wa wirimu ninokana gari ya okana mandano ofiyedheya na iyene (Kang’ ana ddima 14)
14. Ninfwanyelela nni okuluvela olevelela wa Yehova? (Koona vina mafoto.)
14 Yehova aganilevelela ninofwanyela okuluvela wi enowodheya okala amarho aye wili. Eji enele onikamihedha ohizuzuma na mubuwelo wa ovipwatteliha muladdu. Vina kaninfwanyela wova nubuwelaga wi Yehova ohinikoyela ntxiga sabwa ya dhikosilihu atamelaga mudhidhi wa onitxinutxa. Iyene txipo kanakose ejuwene. Ninfwanyelela nni okuluvela wi Yehova ononilevelela txibarene? Yehova ohimwaddela dhahi namavuhulela Jeremiya: “Ddinoalevelela otene dhoddawa dhawa; kaddinubuwela vina dhothega dhawa.” (Jer. 31:34) Vina addagana mazu-ene aba, murumiwi Paulo onolabihedha mazu oladdana, anloga: “Kaddinobuwele vina dhottega dhawa.” (Ahe. 8:12) Eji entapulela eni?
“Kaddinubuwela vina dhothega dhawa” (Jer. 31:34)
15. Na mukalelo gani ohinubuwela vina Yehova dhottega dhehu?
15 Mbibiliani, nzu ntti “wubuwela” kaninlabihedhiwa wi nimutonye muttu onubuwela elobo epadduwile mundduni. Ottiya ejo, ninimutonya muttu onkosa elobo. Timbwini watomeyiwe vapingirhizini vakuvi na Yezu ohiloga: “Yezu muddubuwele mugavolowa Mumweneni mwenyu.” (Lk. 23:42, 43) Mulobwana oddu kamukumbirha bahi Yezu wi amubuwele. Vina yowakula ya Yezu enolagiha wi timbwiniya wanfuna wi Yezu amukamihedhe. Nona Yehova agaloga kanubuwela vina dhottega dhehu, ejo entapulela wi iyene kanakose elobo wi anitxinutxe. Yehova kananitabutxe musogorho sabwa ya dhottega dhimaliliye olevelela.
16. Bibilia ontapulela dhavi ofuru onkaana iyo sabwa ya oleveleliwa na Yehova?
16 Yehova aganilevelela iyo ninofuruleya, Bibilia onolabihedha yotagiha yina wi anikamihedhe ononelamo. Iyo nili ninga “adhari a yottega.” Mbwenyi sabwa ya oleveleliwa na Yehova nili ninga adhari amalile “ofuruliwa muttegani.” (Rom. 6:17, 18; Ovu. 1:5) Olevelela wa Yehova onifurula kakamwe muttegani, ejo enonagalaliha venjene.
“Ovano mumala ofuruliwa muttegani” (Rom. 6:18)
17. Olevelela wa Yehova onnivulumutxa dhavi? (Izaiya 53:5)
17 Kengesa Izaiya 53:5. Yotagiha yomariha enonihu enoniladdaniha na muttu onna eredda ehina murobwe. Sabwa ya yobolo eniperhekele Yehova modhela Mwanaye, enkala ninga iyo nihivulumutxiwa. (1 Pe. 2:24) Dhahene ninga munagalala muttu onna eredda ehina murobwe agavulumutxiwa, iyo vina nonowagalala vaddiddi sabwa ya okana mandano ofiyedheya na Yehova vina oleveleliwa dhottega dhehu. Esi dhotene dhiwodheyile sabwa ya yobolo, modhela yobolo Yehova ononilevelela vina ninowodha okana mandano ofiyedheya na iyene.
“Maguma asuviweye, banivulumutxile” (Iza. 53:5)
OLEVELELA WA YEHOVA ONTAPULELA ENI MWA IYO
18. Ninsunzavo eni nigonaga dhotagiha dhinvaha Bibilia mwaha wa olevelela wa Yehova? (Koona vina kasha “Yehova Onnilevelela Dhavi.”)
18 Txini ensunzihu na dhotagiha dhinvaha Bibilia mwaha wa olevelela wa Yehova? Ninosunza wi Yehova aganilevelela, enkala ninga txipo kaninattegaga, Yehova txipo kananilogose sabwa ya dhikosilihu. Nona enowodheya iyo okana mandano ofiyedheya vaddiddi na Babihu wa wirimu. Olevelela webaribari nvaho wa Yehova. Ninoziwa wi iyo kaninfwanyelela, mbwenyi olevelela oku ezinddiyelo ya okwela wa Yehova vina opama waye na attu ohiligana.—Rom. 3:24.
19. (a) Ninfwanyelela otamalela eni? (Roma 4:8) (b) Txini enone iyo nsunzo ninfwarela?
19 Kengesa Roma 4:8. Ninomutamalela venjene Yehova sabwa ya iyene okala Mulugu onlevelela txibarene! (Ms. 130:4) Mbwenyi nigafuna oleveleliwa na iyene ninofwanyela okosa elobo yina yamakamaka. Yezu ohiloga: “Mugakoodda walevelela attu dhottega dhawa, Babinyu vina kanauleveleleni.” (Mt. 6:14, 15) Enowoneya-wene wi jamakamaka vaddiddi otagiha olevelela wa Yehova. Mbwenyi ninawodhe dhavi okosa ejuwene? Nsunzo ninfwarela ninele osunza venjene mwaha wa makani aba.
JIBO 46 Ninoutamalelani, Yehova
a Mazu oroma a Ebrayiko anolabihedha nzu ntti “olevelela,” nintonya olevelela webaribari, masiki dhikalagawo mikalelo dhina dha olevelela. Mbwenyi anamatapulela enjene a Bibilia anottiya olabihedha makani aba amakamaka va Masalmo 130:4.