Karumela Olevelela wa Yehova

1-2. Txini enkosa Yehova nigatxinuwa mwa dhottega dhehu? (Koona vina foto ya kapa.)

MWENE Davidi wanziwa entapulela ovipwatteliha muladdu sabwa ya dhottega dhawale. (Ms. 40:12; 51:3; mwana musorho) Iyene wahikosa dhottega dhottabwa mwigumini mwaye. Mbwenyi iyene, wahitxinuwa na murima waye wotene vina Yehova wahimulevelela. (2 Sa. 12:13) Yodhelavoya, Davidi wahagalala vazinddiyeliye wi Yehova wahimulevelela.—Ms. 32:1.

² Dhahene ninga Davidi, enowodheya iyo wagalala sabwa ya oleveleliwa na Yehova. Jopangarhazeya oziwa wi Yehova oli womala-nawale wi anilevelele masiki nigakosa dhottega dhinddimuwa. Iyene oli womala-nawale wi akose ejuwene nigatxinuwa na murima wehu wotene, nigabweka dhottega dhehu dhotene vina nigavilibihedha ohikosa dhottega dhakakene. (Gan. 28:13; Mer. 26:20; 1 Jo. 1:9) Jowagalaliha oziwa wi iyene ononilevelela mowakwana-mwene ekalaga ninga kaninattegaga!—Eze. 33:16.

3-4. Murogora dhahi oviwilemo dhavi mmaliliye obatiziwa vina txini enasekeserhihu mu nsunzoni ntti?

³ Dila dhina, attu ena anodhaga wubuwela wi Yehova kaalevelile. Koona yotagiha ya Jennifer, amambali aye ahimusunziha mwaha wa Yehova. Mbwenyi vonuwiliye, wahiroma okosa dhilobo dhabure vina wanavitela amambali aye. Vyaka dhing’onovi musogorhomwa, iyene wahiroma otugumana vina wahittukula ttarho yobatiziwa. Iyene ohiloga: “Masaka a wale miyo ddankosa ogonihana wonyakuwa, ddanlezela, ddali muwali vina okana kobiri yali elobo yamakamaka mwigumini mwaga. Miyo ddanziwa wi Bibilia onologa wila sabwa ya mukutto wa Yezu, Yehova onowodha olevelela dhottega dhehu. Mbwenyi kaddawodha okuluveliha murimaga wi Yehova omala oddilevelela.”

⁴ Dila dhina onorutxiwa okuluveliha murima wawo wi Yehova olevelela dhottega dhawo dhawale? Yehova onfuna wi nikuluvele ttagaraga yaye dhahene ninga mwakuluvela Davidi. Mu nsunzoni ntti, ninele wona txini enfwanyelihu okosa wila nirumele olevelela wa Yehova vina txini enanikamihedhe okosa ejuwene.

NINFWAYELELANI ORUMELA OLEVELELA WA YEHOVA?

5. Satana onfuna wi nirumele eni? Kavaha yotagiha.

⁵ Nigarumela olevelela wa Yehova, ninorabela ogwela va muregani va Satana. Kudduwale wi Satana onokosa mpaka munwodheliye wi anittihiye omulabela Yehova. Wi akwanihedhe yogana yaye, Satana onodhaga onittukulela wubuwela wi dhottega dhehu kadhinfwanyela oleveleliwa. Kobuwela nipadduwo na mulobwana w’o Korinto waburutxiwe mmulogoni sabwa ya okosa mararuwo. (1 Ko. 5:​1, 5, 13) Vasogorhova vatxinuwiliye, Satana wafuna wi abali a mmulogoni ahimulevelele vina ahimwakele. Mulogo kohimulevelela, mulobwana ole txino agawubuwela wi Yehova txipo kamuleveleli, agahikana okubwanya onddimuwa ofiyedha ottiya omulabela Yehova obuwelaga wi Yehova kanamulevelele. Satana katxinjile yogana yaye obe dhimanya dhaye. Mbwenyi “ninoziwa esile dhinfuna iyene.”—2 Ko. 2:​5-11.

6. Nigobuwela wi Yehova kananilevelele mwa elobo ekosilihu wale, txini enanikamihedhe?

⁶ Nigakuluvela wi Yehova ohinilevelela ninottiya ovipwatteliha muladdu. Nigattega, ninokubanya sabwa ya ejile ekosilihu. (Ms. 51:17) Ejo elobo yapama. Sabwani mubuwelo wehu onodhaga onittukulela okosa dhilobo dhinasisigule mweddelo wehu. (2 Ko. 7:​10, 11) Mbwenyi nigadhowagavi nubuwelaga wi Yehova kanileveleli txino ninodhaga ottiya omulabela. Nigarumela olevelela wa Yehova, kaninavipwattelihe muladdu. N’eji, ninele owodha omulabela Yehova dhahene ninga munfunela iyene—na mubuwelo wotxena vina na wagalala onddimuwa. (Ko. 1:​10, 11; 2 Tm. 1:3) Kito ninakuluvelihe dhavi murima wehu wi Yehova onilevelela?

TXINI ENANIKAMIHEDHE ORUMELA OLEVELELA WA YEHOVA?

7-8. Yehova oviziwihile dhavi wa Mizé vina ejo ennivaha nikuluvelo gani? (Obudduwa 34:​6, 7)

⁷ Katanalela ejile elogile Yehova Sabwa ya iyene. Motagiha, koona yamwaddelile Yehova Mizé Omwangoni Sinai.a (Kengesa Obudduwa 34:​6, 7.) Masiki Yehova akaanaga mikalelo dhinji dhapama, iyene oganile omwaddela Mizé wi iyene “Mulugu wanthebwa vina wathagaraga.” Weyo onubuwela wi muttu onimukwela Yehova agattega vina agatxinuwa Yehova kanimulevela? Kohimulevelela muttuya oddo iyene agali mutabala vina se ttagaraga, Yehova txipo kanakale dhawene!

⁸ Ninofwanyelela okuluvela wi Yehova agalogaga wi ddattagaraga onloga ebaribari, iyene txipo kanzivala. (Ms. 31:5) Nona ninofwanyela okuluvela ejile enlogiye. Akala enorutxa ottiya ovipwatteliha muladdu sabwa ya dhottega dhikosiliwe mundduni, kavivuze: ‘Ddinokuluvela wila Yehova txibarene ddattagaraga vina ddanttebwa? Kanawodhe omulevelela muttegi otxinuwile? Miyo kaddinfwayela orumela wila oddilevelela?’

9. Masalmo 32:5 ensunziha eni mwaha wa Yehova olevelela dhottega dhehu?

⁹ Katanalela ejile yavudheleli Yehova anamaleba Bibilia ologa mwaha wa olevelela waye. Motagiha, koona ejile elebile Davidi sabwa ya olevelela wa Yehova. (Kengesa Masalmo 32:5.) “Nyuwo muddilevelela outhegelani waga,” ologile ddi Davidi. Nzu ntti “olevelela” na Ebrayiko nintapulela “ovenyiha,” “oburutxa” obe “ottukula.” Yehova amulevelelaga Davidi wakala ninga ottukulile dhottega dhaye badhowana wuddayiwene. Davidi wahikana wagalala sabwani wahiziwa wi Yehova omulevelela. (Ms. 32:​2-4) Enowodheya iyo vina okana wagalala wakakene. Nigatxinuwa dhottega dhehu na murima wotene, kaninfwanyela odhowavi nivipwattelihaga muladdu na dhottega dhehu dhittukulile Yehova adhowana wuddayiwene.

10-11. Mazu aba oli womala-nawale wi alevelele annisunziha eni mwaha wa Yehova? (Masalmo 86:5)

¹⁰ Kengesa Masalmo 86:5. Davidi ohiloga wi Yehova oli womala-nawale wila alevelele. Eji entapulela wi Yehova kammaguvela osilidheya nigavonya vina iyene onofuna onilevelela nigatxinuwa. Onkoselani ejuwene? Epaddi yomariha ya versuya enologa: Onowawoniha okwela woweddeyana attu otene anutamelani. Nsunzo nivirile nihoona wi Yehova ohipikirhela walagiha okwela woweddeyana abale animukwela vina txipo kananyanyale. Nona akala awene anottega vina atxinuwa, Yehova onodhowavi atonyihedhaga okwela woweddeyana vina onowalevelela kakamwene. (Iza. 55:7.) Akala enowurutxa orumela olevelela wa Yehova, onofwanyelela ovivuza: ‘Miyo ddinorumela wi Yehova Namalevelela obe onowalevela otene atxinuwile vina antamela ttagaraga yaye? Koddi kanddifwanyela orumela wi Yehova oddilevelela vantamelimi ttagaraga yaye?’

¹¹ Bibilia onologa wi Yehova onononelamo mowakwana-mwene mukalelo ottanddiwe iyo vina wi nili attu ohiligana, eji enonilibiha. (Ms. 139:​1, 2) Ndoweni nooneni ejile elogile Davidi Mmasalmuni mwina vina ejo enanikamihedhe dhavi okuluvela wi Yehova onofuna onilevelela.

TXINI ENUBUWELA YEHOVA MWAHA WA IYO?

12-13. Mowiwanana na Masalmo 103:​14, txini enubuwela Yehova mwa iyo vina ejo ennittukulela okosa eni?

¹² Kengesa Masalmo 103:14. Davidi onologa mwaha onimuttukulela Yehova okala womala-nawale wi àlevelele abale antxinuwa mwa dhottega dhawa. Iyene ohiloga wi Yehova “kandduwala wila nili mathaka.” Eji entapulela wi Yehova onoziwa wila nili attu ohiligana. Ndoweni nooneni entapulela mazu aba a Davidi.

¹³ Yehova omuttanddile Adamu na mattaka, nona iyene onoziwa mukalelo ottanddiwe attu vina dhinfunani. Motagiha, awene anofuna oja, ogona vina ovuma; attu oligana vina anofuna dhilobo ninga esi. (Wi. 2:7) Vowi Adamu na Eva ahimuttegela Mulugu, attu mattaka na mukalelo mwina. Ninga aima, nihibaaliwa na yottega vina ninottukuleleya okosa elobo yabure. Yehova onoziwa pama ejoya. Mbwenyi valogile Davidi wi Yehova “kandduwala wi nili mathaka,” iyene wafuna aloge wi Yehova onoziwa wila nili attegi vina ononeddiha na nttebwa. Enowodheya ogwaddela mazu aba alogile Davidi dhahi: Yehova onoziwa wi masaka mena ninovonya, mbwenyi nigavonya banitxinuwa mwa dhovonya dhehu, iyene ononilagiha ttagaraga vina ononilevelela.—Ms. 78:​38, 39.

14. (a) Elobo gani yina elogile Davidi mwaha wa mukalelo onnilevelela Yehova? (Masalmo 103:12) (b) Txini ensunzihu na mukalelo omulevelile Yehova Davidi? (Koona kasha “Yehova Onnilevelela Dhavi vina Ondduwala Dhavi Dhottega Dhehu?”)

¹⁴ Elobo gani yina ensunzihu na Masalmo 103 mwaha wa olevelela wa Yehova? (Kengesa Masalmo 103:12.) Davidi ohiloga wi Yehova agalevelela dhottega dhehu, onowika wuddayiwene dhahene ninga “[munlapelana] omadhelo wa nzuwa na omaddowelo.” Omadhelo wa nzuwa olapelana vaddiddi na omaddowelo. Eji enisunziha eni mwaha wa Yehova olevelela dhottega dhehu? Nivuru dhahi ninologa wi versu eji entapulela wi Mulugu onoponyedha dhottega dhehu wolapela na iyo, ekalaga ninga elobo yonukwa erimelile mowakwana-mwene. Nona ninofwanyelela okuluvela wi iyene txipo kanobuwele wili obe kananubutxedhe. Dila dhina onukwela wa oja obe onukwa wa elobo enodhaga onittukulela wubuwela elobo epadduwile wale. Yehova agamala olevelela yottega, kayiwo elobo enimuttukulela wubuwela yottegaya vina onipwatteliha muladdu obe onitabutxa sabwa ya ejuwene.—Eze. 18:​21, 22; Mer. 3:19.

15. Txini enfwanyelihu okosa nigadhowagavi nivipwattelihaga muladdu mwaha wa dhottega dhikosilihu wale?

¹⁵ Mazu a Davidi anfwanyeya va Masalmo 103 anikamihedha dhavi orumela olevelela wa Yehova? Nigavipwatteliha muladdu mwari mwa mudhidhi mwinjene sabwa ya dhottega dhawale, ninofwanyela ovivuza: ‘Ddinodduwala ejile enubuwela Yehova—kuloga, ddinodduwala wi iyene onoziwa wila ddili muttu wohiligana vina onele omulevelela muttegi ninga miyo otxinuwile? Ddinowubuwela vina ejile eganile Yehova odduwala—kuloga, ddinowubuwela dhottega dhiddileveleliye vina dhihinalabihedhiye wi additabutxena?’ Yehova kanfwaseyela dhottega dhehu dhawale, iyo vina kaninfwanyela ofwaseyela. (Ms. 130:3) Nigarumela olevelela wa Yehova ninovilevela nanya mwa dhovonya dhikosilihu wale vina ninodhowavi nimulabelaga Yehova nowagalala.

16. Kavaha yotagiha enlagiha yowopiha elivo ya ovipwatteliha muladdu mwaha wa dhottega dhehu dhawale. (Koona vina foto.)

¹⁶ Katanalela yotagiha eji. Muttu oneddiha karo onowang’ana mu supeyoni wi one esile dhimpadduwa mundduni mwaye. Iyene owang’ana ejoya mudhidhi na mudhidhi, mbwenyi egali yowopiha wang’anaga mu supeyoni mudhidhi wotene. Wi eddihe karoya na nibarelo, onofwanyelela odhowavi ang’anaga osogorho. Na mukalelo wakakene, enokala yapama wang’ana dhovonya dhehu dhawale wi nilibihe yogana yehu ya ohiyelela dhottega dhakakene. Sabwa ya ovipwatteliha muladdu, ninodhaga ottiya omukosela venjene Yehova mmabasani mwaye, nona ninofwanyela ozuzumela wang’ana osogorho. Nili dila ennittukulela egumi yohimala mwilaboni eswa enipikirheli Mulugu, mwenemo munadduwalihu mudduwalelo dhilobo dhabure.—Iza. 65:17; Gan. 4:25.

KADHOWAGAVI OKULUVELIHAGA MURIMA WAWO

17. Ninfwanyelela nni odhowagavi nikuluvelihaga murima wehu mwaha wa okwela wa Yehova vina olevelela waye?

¹⁷ Ninofwanyela odhowagavi ninkuluvelihaga murima wehu wi Yehova ononikwela vina ononilevelela. (1 Jo. 3:19) Sabwaya? Sabwani Satana onele otamela onittukulela orumela wi nattegi vaddiddi, nona Yehova kananikwele vina txipo kananilevelele. Yogana yaye ja onittiyiha omulabela Yehova. Nona ninojedhela wi Satana onele odhowavi akosaga muli-mwetemwene vowi onoziwa wi ohalilena mudhidhi mung’onovi. (Ovu. 12:12) Kanimuttiye Satana opemberha!

18. Txini enfwanyeliwe okosa wi okuluvele wila Yehova onowukwela vina oli womala-nawale wi awulevelele?

¹⁸ Nsunzo nivirile nihilagiha ejile enfwanyeliwe okosa wi okuluvele wila Yehova onowukwela. Wila okuluvelihe murima wawo olevelela wa Yehova, katanalela ejile elogiliye mwaha wa iyene. Katanalela yavudheleliye anamaleba Bibilia ologa sabwa ya olevelela waye. Kudduwale wi iyene onoziwa wila weyo oli muttegi vina onele wuweddiha na ttagaraga. Wubuwele wi iyene agawulevelela, onkosa ejuwene na murima wotene. Dhahene ninga Davidi wakuluvela ttagaraga ya Yehova, weyo onele ologa dhahi, “Ddinowutamalelani Yehova sabwani ‘muddilevelela outhegelani waga’!”—Ms. 32:5.