Karta Ninnikamihedha Ovilela Mpaka Omagomo

1-2. (a) Txini yapadduwa o Judeya mudhidhi walebele Paulo Ahebreu? (b) Ninlogela nni wi karta ntti nifiyile mudhidhi wofwanyelela?

AKRISTU àkala o Jeruzalemi vina o Juda ahigumanana makattamiho orutxa, vyaka dhing’onovi mmaleli Yezu okwa. Mmaleli witiwa mulogo w’Okristu, awene ahiroma ofwara-fwariwa venjene. (Mer. 8:1) Muvireli vyaka 20 musogorhomwa, anamafwara a Kristu ahipattiwa na makattamiho a oyelega, txino atoteyile na dala yapattile elabo ejile. (Mer. 11:​27-30) Mbwenyi, yaka ya 61 mmaleli Yezu obaliwa, Akristu ahikana murenddele mottiyana na vyaka dhafwarela. Mwari mwa mudhidhi obu, awene ahakela karta navudheleliwe murumiwi Paulo oleba—malago afwanyeya mukartanimwa àli ejile yafunani wi awodhe ovisasanyedhela dhigapadduwile musogorho.

² Karta na akadda Ahebreu nahifiya mudhidhi wofwanyelela, sabwani murenddele wana Akristu kugagonelile. Paulo wahavaha Akristu malago agawodhile wakamihedha ovilela makattamiho agagumanilanina. Ninga mwalogile Yezu, otolotxiwa wa Jeruzalemi wela waddamela. (Lk. 21:20) Ebaribari wi Paulo vina Akristu o Judeya kaziwa mowakwana-mwene mudhidhi ogapadduwile otolotxiwa oku. Mbwenyi, Akristu abale agahilabihedha mudhidhi wahalilewo wi avisasanyedhele modhela wunuwiha mikalelo ninga nroromelo vina ovilela.—Aheb. 10:25; 12:​1, 2.

3. Nivuru na Ahebreu nikalele nni namakamaka mwa Akristu masaka abano?

³ Mohigonela, ninele ogumanana masoso manddimuwa opitta abale agumanilena Akristu Ahebreu. (Mt. 24:21; Ovuh. 16:​14, 16) Nona ninele wona malago avahile Yehova Akristu abale anawodhe onikamihedha.

“NISOGORHENA MASUNZIHO OWARALAYÁ”

4. Dhorutxa gani dhigumanilena Akristu àli Ayuda? (Koona vina foto.)

⁴ Ayuda adhile okala Akristu anfwanyela okosa matxinjo manddimuwa vaddiddi, ejo kiyali yovevuwa. Masaka a mundduni Yehova wahasakula Ayuda ninga nlogo naye. Jeruzalemi watonya Omwene wa Mulugu velaboni ya vati, mparha wali niparha wa webedha webaribari. Ayuda otene ororomeleya anfwara Malamulo a Mizé vina dhoruma dha asogorheli a marelijiau. Masunziho abale anang’anela esile dhajani, monelo wawa mwaha wa otxetteliwa vina mukalelo wafwanyelani waweddiha attu a malogo mena. Mbwenyi, Yehova wahittiya orumela mikutto esi dhakosani mmaleli Yezu okwa. Eji yali yorutxa mwa Akristu Ayuda alemelile ofwara Malamulo. (Aheb. 10:​1, 4, 10) Vina Akristu owarala mpaddi womuyani, ninga Pedro ahigumanana makattamiho sabwa ya matxinjo aba. (Mer. 10:​9-14; Gal. 2:​11-14) Sabwa ya dharumelani, Akristu aba ahiroma ofwara-fwariwa na asogorheli a marelijiau.

5. Akristu afwanyela ovibarela mwa dhilobo gani?

⁵ Akristu o Juda ahifwara-fwariwa na makuru meeli a attu. Voroma, ahikalawo asogorheli a marelijiau awona ninga asadduweli sabwa ya ottiya relijiau ya Ayuda. Ottiya ejo, ena aviwona ninga Akristu anakokomeza anamafwara a Yezu wi anfwanyela ofwara Malamulo a Mizé, txino ankosa ejuwene ovaga ofwara-fwariwa. (Gal. 6:12) Txini egakamihedhile Akristu ororomeleya ottiddelavi ebaribari?

6. Paulo wakokomezile abalaye okosa eni? (Ahebreu 5:14–6:1)

⁶ Karta nalebele Paulo akadda Ahebreu, iyene wahakokomeza okosa nsunzo notibeleya na mazu a Mulugu. (Kengesa Ahebreu 5:14–6:1.) Paulo wahiloga Malebo a Ebrayiko vina wahitapulelamo wi webedha wa Akristu wali wamakamaka opitta mukalelo webedha Ayuda.a Paulo wanziwa wi Akristu abale kuziwa ebaribari deretu, agahiwodha ozinddiyela vina orabela masunziho ottambi.

7. Dhorutxa gani dhingumanihuna masaka abano?

⁷ Dhahene ninga Akristu Ahebreu, masaka abano ninogumanana attu anvaviha miselu dhottambi vina ahinriha magano a Yehova. Ena anowapambiha Anamoona a Yehova sabwa ya orumela esile dhinsunziha Bibilia mwaha wa ogonihana. Monelo wa mwilaboni onodhowavi okalaga wolapelana na monelo woligana wa Yehova. (Gano 17:15) Mwadhawene, jamakamaka ozindiyela dhubuwelo esi dhabure vina orabela.—Aheb. 13:9.

8. Ninawodhe dhavi odhowagavi nunuwaga mpaddi womuyani?

⁸ Paulo ohakokomeza Akristu Ahebreu wi anfwanyela wunuwa mpaddi womuyani, iyo vina ninofwanyela okosa yakakene. Ejo enowiwanana na okosa nsunzo notibeleya na Bibilia wi nimuziwe pama Yehova vina mukalelo waye wowubuwela. Ninofwanyelela okosa ejuwene masiki nigamala oviperheka vina obatiziwa. Kintanala vyaka dhilihu mwibaribarini, iyo notene ninofwanyela wengesa vina osunza Nzu na Mulugu malabo otene. (Masal. 1:2) Matadelo apama a nsunzo nomwinya, anele onikamihedha wunuwiha mukalelo ologile murumiwi Paulo mukartani nalebeliye akadda Ahebreu: nroromelo.—Aheb. 11:​1, 6.

KAKANA NROROMELO WI OFWANYE EGUMI

9. Yakaleli nni yamakamaka Akristu Ahebreu okana nroromelo noliba?

⁹ Akristu Ahebreu anfwanyela okana nroromelo noliba sabwani eji egahakamihedha oviluwa mudhidhi ogatolotxiwe Jeruzalemi. (Aheb. 10:​37-39) Yezu wahawaddela anamafwara aye wi agamoona Jeruzalemi arijiwaga na anyakoddo, anfwanyela ottawela mmyangoni. Malago aba anapatta Akristu otene, abale akala mu sidadi obe muttemba. (Lk. 21:​20-24) Nsaka nttile anyakoddo agalupela murudda, abale akala muttemba anttawela mu sidadi vowi ambareleya sabwa ya ngome yakana sidadiya. Egali dhawene ottawela mmwangoni yali ninga otowa malago, nona yanfuneya okana nroromelo noliba.

10. Txini egawodhile Akristu okosa kokana nroromelo noliba? (Ahebreu 13:17)

¹⁰ Akristu Ahebreu anfwanyela wakuluvela abale asakulile Yezu wi asogorhele mulogo. Txino abale asogorhela milogo ahivaha malago ohipipiriha ewanana na mukalelo vina mudhidhi wafwanyelelani ottawa. (Kengesa Ahebreu 13:17.) Murumiwi Paulo wahawaddela Akristu wi anfwanyela wawiwelela abale àsogorhela. Iyene kafuna ologa wi anfwanyela wawiwelela anddimuwa a mulogoni sabwani ahikana ettomo. Akristu akadda Ahebreu anfwanyela osunza wakuluvela abale àsogorhela masoso ahinaroma. Awene kuwawiwelela abale àsogorhela nsaka na murenddele, egahikala yovevuwa wawiwelela mmidhidhini dhorutxa.

11. Ekalele nni yamakamaka Akristu masaka abano okana nroromelo noliba?

¹¹ Dhahene ninga Akristu Ahebreu iyo vina ninofwanyela okana nroromelo. Masaka abano ankalihu, attu enjene kanrumela—wi omagomo wa elabo oli vakuvi, awene anonibedda—sabwa ya orumela ejuwene. (2 Ped. 3:​3, 4) Masiki Bibilia alogaga miselu dhinapadduwe mu goyini enddimuwa, dhihikalawo dhilobo dhinji dhihinziwihu. Nona ninofwanyela okuluvela wi omagomo onele ofiya mudhidhi wofwanyelela, ejoya egapadduwa Yehova onele onikoya.—Hab. 2:3.

12. Txini enanikamihedhe oviluwa mu goyini enddimuwa?

¹² Ninofwanyela olibiha nikuluvelo nehu wi Yehova onomulabihedha—“mwimeleli wororomeleya vina wamalago” wi aneddihe. (Mt. 24:45) Goyi enddimuwa egaroma, ninodhaga wakela malago ohipipiriheya anavune dhigumi dhehu, dhahene ninga Akristu Ahebreu akelile malogo mudhidhi warijile anyakoddo o Roma Jeruzalemi. Ovano bu mudhidhi wa osunza wakuluvela abale analabihedha Yehova wi anisogorhele. Nigahakuluvele vina nigahawiwelele ovanene mohaganyedha enele okala yorutxa wiwelela malago anavahiwihu mudhidhi wa goyi enddimuwa.

13. Sabwaya jani malago anfwanyeya va Ahebreu 13:5 àli ofwanyelela?

¹³ Oku ajedhelaga mudhidhi wottawa, Akristu Ahebreu anfwanyela orabela “[ojiwa] murima na muhaku” vina ovevutxa egumi azuzumelaga omulabela Yehova. (Kengesa Ahebreu 13:5.) Ena mwa abuwene ahipattiwa dala vina oyelega. (Aheb. 10:​32-34) Masiki varumelilani ogumanana makattamiho aba sabwa ya miselu dhapama, txino ena ahiroma ozuzumela dhorela wi avibarele mwa dhowopiha dhigadhile opadduwa vina attawe oyelega. Mbwenyi kobiri kaddigawodhile wavuna mudhidhi ogatolotxiwe Jeruzalemi. (Tia. 5:3) Mwebaribari, mwa abale agakwelile dhorela egahikala yorutxa ottawa, ottiya nyumba dhawa vina dhokaana dhawa.

14. Nroromelo noliba ninanikamihedhe dhavi okosa dhogana dhiniwanana na dhilobo dhomaningoni?

¹⁴ Iyo nigakuluvela wi Yehova mohigonela onele otolotxa elabo ejino yabure, kaninobuwele wi okana kobiri yinjene obe dhilobo dhomaningoni silitxi dhamakamaka. Mudhidhi wa goyi enddimuwa kobiri kinakaane ttima, Bibilia onologa wi attu aganrahilela parata murampani vowi anele ozinddiyela wi parata awa nne vina nddarhama kinawodhe wavuna siku nosilidhiwa na Yehova. (Ezek. 7:19) Ottiya ozuzumela okana kobiri yinjene, ninofwanyela okosa dhogana dhinawodhe onikamihedha iyo nanya, anamudhihu vina odhowagavi nimulabelaga Yehova. Kigali yamalago ononga kobiri ehinehuna obe ononga mudhidhi mwinjene nizuzumelaga dhokaana dhehu. Vina ninofwanyela okala txenjewa wi dhokaana dhehu dhihikale dhamakamaka mwigumini mwehu. (Mt. 6:​19, 24) Vowi omagomo wa elabo onowaddamela enele ofuneya osakula akala ninele omukuluvela Yehova obe dhokaana dhehu.

NYUWO MUNOFWANYELA OVILELA

15. Akristu Ahebreu afwanyelela nni ovilela?

¹⁵ Akristu Ahebreu anfwanyela ovilela wi awodhe owanana makattamiho agagumanilanina. (Aheb. 10:36) Masiki Akristu ena vagumanilanina ofwara-fwariwa wottabwa, enji akalile Akristu nsaka na murenddele. Paulo wahawubutxedha wi anfwanyela ovisasanyedhela ofwara-fwariwa ogagumanilanina musogorho vina okala ororomeleya mpaka okwa ninga Yezu. (Aheb. 12:4) Ayuda enjene àli osilidhiwene vina anaweddiha bure Akristu, sabwani Ayuda enji ahikala Akristu. Vyaka dhing’onovi mundduni, muttitti wahimulupela Paulo mudhidhi walaleyiye o Jeruzalemi. Ayuda okwaranya 40 ahiddubela wi “kanaje, kanamwe ahinathi ompa [Paulo].” (Mer. 22:22; 23:​12-14) Masiki Akristu vafwara-fwariwani vina veddiwani awene anfwanyela otugumana wi amwebedhe Mulugu, olaleya miselu dhapama vina olibiha nroromelo nawa.

16. Karta na Ahebreu ninanikamihedhe dhavi wona dhopurelamo nigafwara-fwariwaga? (Ahebreu 12:7)

¹⁶ Txini yakamihedhile Akristu Ahebreu ovilela masiki agumanagana ofwara-fwariwa? Paulo wanfuna wakamihedha ononelamo dhopurelamo sabwa ya ogumanana makattamiho. Nona iyene ohitapulelamo wi Akristu agagumanana makattamiho aneha nroromelo nawa, Mulugu onodhaga olabihedha ejuwene wi ashagihe. (Kengesa Ahebreu 12:7.) Mashagiho aba agahidha wakamihedha wunuwiha mikalelo dh’Okristu dhili dhofuneya. Akristu abale kufwaseyela wona dhopurelamo dhakaanani sabwa ya ogumanana makattamiho, egahikala yovevuwa ovilela.—Aheb. 12:11.

17. Txini yaziwa Paulo sabwa ya ofwara-fwariwa?

¹⁷ Paulo wahakokomeza Akristu Ahebreu wi anfwanyela oliba murima vina ohiyelela mundduni agumanagana ofwara-fwariwa. Murumiwi Paulo agahiwodha ovaha malago apama mwaha wa ofwara-fwariwa. Masaka a mundduni iyene wannafwara-fwara Akristu. Nona wannonelamo mowakwana-mwene makattamiho agumananina. Mumaleliye okala Mukristu iyene ogumanana mikalelo dhottiyana-ttiyana dhofwara-fwariwa. (2 Kor. 11:​23-25) Nona Paulo wanziwa mowakwana-mwene yafwanyelelani okosa wila avilele. Wahawubutxedha Akristu wila agagumanana makattamiho anfwanyela omukuluvela Yehova ottiya ovikuluvela anyene, awene agahiwodha oliba murima kowubuwela mazu aba: “[Yehova] ddinddikoya, kaddinova elo.”—Aheb. 13:6.

18. Txini enanikamihedhe ovilela nigagumanana ofwara-fwariwa?

¹⁸ Masaka abano abalihu ena anogumanana ofwara-fwariwa. Mukalelo mmodha wa olagiha okwela wehu bwa walobelela vina dila dhina wakamihedha modhela wavaha enajombela. (Aheb. 10:33) Mbwenyi Bibilia onologa mowakwana-mwene wi, “etene anfuna wiwananeyana na Mulugu, aluwelana na Yezu Kristu, anofwanya widdiwa.” (2 Tim. 3:12) Nona, iyo notene ninofwanyelela ovisasanyedhela midhidhi dhorutxa dhinagumanihuna. Mwadhawene ninofwanyelela odhowagavi nimukuluvelaga Yehova vina okuluvela wi anele onikamihedha makattamiho-makattamihovi anagumanihuna. Nsaka nofwanyelela, iyene onele wavuna alabeli aye otene ororomeleya.—2 Tes. 1:​7, 8.

19. Elobo gani enanikamihedhe ovisasanyedhela goyi enddimuwa? (Koona vina foto.)

¹⁹ Karta nalebele Paulo akadda Ahebreu nahakamihedha Akristu a nsaka zana noroma ovisasanyedhela makattamiho agagumanilanina. Paulo wahakokomeza okosa nsunzo notibeleya na Nzu na Mulugu vina ovilibihedha ononelamo mowakwana-mwene. Kukosa ejuwene, agahiwodha ozinddiyela masunziho agobanihile nroromelo nawa vina agahiwodha orabela. Iyene wahawaddela wi anfwanyelela olibiha nroromelo nawa wi awodhe wiwelela malago a Yezu vina wawiwelela abale àsogorhela. Wahakamihedha Akristu abale olibiha nroromelo nawa modhela wona makattamiho agumananina ninga gari ya oshagihiwa na Babiwa wa wirimu. Iyo vina ninofwanyela ofwara malago aba. Nigakosa ejuwene ninele owodha okalavi ororomeleya mpaka omagomo.—Aheb. 3:14.