Yehova Onnikamihedha Dhavi Ovilela?

1. Ninfwanyelela nni ovilela vina bani onwodha onikamihedha? (1 Pedro 5:10)

VOWI egumi masaka abano jorutxa vaddiddi, iyo notene ninofuniwana ovilela. Attu ena anotabuwa na eredda ya wopiha, ena anotabuwa sabwa ya omuyelela muttu onimukwelani. Ena anofwara-fwariwa na anamudhi obe na guverno. (Mt. 10:​18, 36, 37) Mbwenyi kakana nikuluvelo wi kintanala makattamiho angumana weyo, Yehova onele wukamihedha ovilela.—Kengesa 1 Pedro 5:10.

2. Txini enniwodhiha ovilela?

² Ovilela entapulela okalavi olibene vina ohirimeliwa njedhelo masiki ogagumanana dhorutxa, ofwarafwariwa, dhoweha obe dhonyengetta. Mbwenyi ninawodhe ovilela na “owodha onddimuwa” onnivaha Yehova. (2 Ko. 4:7) Mu nsunzoni ntti, ninele osekeserha dhilobo nayi dhinnivaha Yehova wi niwodhe ovilela. Ottiya ejo, ninele wona marhe anniwodhiha opurelamo pama nikamihedho nimodha-nimodha.

NLOBELO

3. Ninlogelani wi nlobelo ntikiniho?

³ Yehova okosa elobo yotikiniha wi niwodhe ovilela. Iyene ohiwodhiha wi masiki nikalaga attegi niwodhege ologa na iyene. (Ahe. 4:16) Kobuwela eji: Enowodheya omulobelela Yehova mudhidhi-mudhidhivi vina omwaddela makani-makanivi. Enowodheya ologa na iyene na elogelo-elogelovi, mburo-mburovi masiki akala nili nooka obe mukambura. (Jon. 2:​1, 2; Mer. 16:​25, 26) Masiki nihikane mazu ologa, Yehova onowodha ononelamo ejile yafunihu ologa. (Rom. 8:​26, 27) Txibarene jotikiniha iyo owodha ologa na Yehova!

4. Ninziwa dhavi wi olobela nikumbirhaga ovilela enowiwanana na efunelo ya Yehova?

⁴ Mbibiliani Yehova ononikuluveliha wi iyene “ononivuruwana, nigamuloba elobo-txilobo eniwanana na ofuna waye.” (1 Jo. 5:14) Kito enowodheya omukumbirha Yehova wi anikamihedhe ovilela? Ndde! Okosa ejuwene enowiwanana na efunelo yaye. Ninziwa dhavi? Nigavilelaga dhoweha, ninomukamihedha Yehova omwakula Satana Ddiabo, odduwene onimbedda. (Gan. 27:11) Ottiya ejo, Bibilia onologa wi Yehova onofuna venjene watanala “abale animuroromela.” (2 Ma. 16:9) Nona ninofwanyela okana ebaribari wi Yehova okana ewodhelo ya onikamihedha ovilela vina onowodha okosa ejoya.—Iza. 30:18; 41:10; Lk. 11:13.

5. Nlobelo ninnikamihedha dhavi okana murenddele? (Izaiya 26:3)

⁵ Bibilia onologa wi niganfugulela murima wehu Yehova, ‘murenddele wa Mulugu ompitta dhubuwelo dha attu, onele okoya murima na dhubuwelo dhehu.’ (Flp. 4:7) Eji gari enddimuwa vaddiddi. Attu ahinimulabela Yehova anogumanana makattamiho vina enjene anotamela okana murenddele wa muyubuweloni na marhe mena. Motagiha, ena anotamela oburutxamo dhubuwelo dhawa wi aviwemo pama. Muttu onkosa dhilobo ninga esi vina onttiya wang’anela dhubuwelo dhaye, onodhaga opattiwa na adomonyo. Ejo jawopiha vaddiddi. (Kaladdaniha na Mateu 12:​43-45.) Masiki attuya akalaga ofwaseneye agamala olabihedha marhe aba, awene kankana murenddele webaribari onda wa Yehova. Nigalobelaga, ninolagiha wi ninomukuluvela kakamwe Yehova nona iyene onodhowavi anivahaga murenddele. (Kengesa Izaiya 26:3.) Iyene onkosa dhavi ejoya? Elobo modha enkosiye ja onikamihedha wubuwela Malebo annikuluveliha wi iyene ononikwela vina onofuna oderetu wehu. Wubuwela Malebo aba enofwasiha mubuwelo vina murima wehu.—Ms. 62:​1, 2.

6. Onawodhe dhavi opurelamo pama gari ya olobela? (Koona vina foto.)

⁶ Txini enfwanyeliwe okosa? Ogagumanagana dhorutxa dhineha nroromelo nawo, kamuroromele Yehova vina olobele omukumbirhaga murenddele. (Ms. 55:22) Kamukumbirhe vina eziwelo enfuniwe wi owodhe owanana yorutxaya. (Gan. 2:​10, 11) Ottiya ejuwenevi mmalobeloni mwawo, kudduwale omutamalela Yehova. (Flp. 4:6) Kafwaseyela wona vizinddiyelo dhinlagiha wi Yehova onowukamihedha malabo otene vina kamutamalele sabwa ya ejuwene. Kuttiye dhorutxa wutximiha wona maruriho anakeliwe.—Ms. 16:​5, 6.

NZU NA MULUGU

7. Omusunza Bibilia ennikamihedha dhavi ovilela?

⁷ Yehova ohinivaha Nzu naye wi anikamihedhe ovilela. Nigamusunzaga Bibilia ninofwanya Malebo menjene annikuluveliha wi Yehova onele onikamihedha. Koona yotagiha modha. Mateu 6:8 enloga dhahi: “Babinyu onoziwa enfunenyu, muhinatti-wene omukumbirha.” Ologile mazu aba ddi Yezu, iyene onomuziwa pama Yehova opitta muttu mwina, nona ninofwanyela okuluvela wi nigagumanana dhorutxa, Yehova onoziwa ejile enfunihu vina onele onikamihedha. Bibilia okana Malebo menjene annivaha guru wi niwodhe ovilela.—Ms. 94:19.

8. (a) Magano gani a mBibiliani annikamihedha ovilela? (b) Txini enanikamihedhe wubuwela magano a mBibiliani?

⁸ Magano a mBibiliani anonikamihedha ovilela. Sabwani anonivaha eziwelo, wi nikose dhogana dhapama. (Gan. 2:​6, 7) Motagiha, Bibilia ononikokomeza ohizuzuma na dhilobo dhinapadduwe musogorho mbwenyi nimukuluvelege Yehova masiku otene. (Mt. 6:34) Nigakana elemelelo ya omwengesa Bibilia vina otanalela, enokala wovevuwa iyo wubuwela magano a mBibiliani nigafwanyiwa makattamiho.

9. Mapadduwo a mBibiliani annikamihedha dhavi?

⁹ Mbibiliani ninofwanyamo mapadduwo a attu ninga iyo amukuluvelile Yehova vina akamihedhiwe na iyene. (Ahe. 11:​32-34; Tia. 5:17) Otanalela mapadduwo aba, enowunuwiha nikuluvelo nehu wi Yehova ddi “vothawela vehu, guru dhehu, [iyene] ddinaguvela onikamyedha midhidhi dhetene dhinsegedheya iyo.” (Ms. 46:​2, [Ms. 46:1 NM]) Otanalela dhotagiha esi dha alabeli ororomeleya, enonikamihedha otagiha nroromelo vina ovilela wawa.—Tia. 5:​10, 11.

10. Weyo onawodhe dhavi opurelamo Nzu na Mulugu?

¹⁰ Txini enfwanyeliwe okosa? Omwengesege Bibilia malabo otene vina okane lista na Malebo anukamihedha. Ena anoroma siku nawa engesaga Malebo a Siku na Siku. Sabwani okosa ejo enowakamihedha wubuwela siku notene. Jijuwene epadduwile na murogora onkuweliwa Mariea mudhidhi waddeliwiye wi amambali aye ahikana eredda ya kanseri. Txini emukamihedhile ovilela oku akamihedhaga amambali aye myeri dhomariha ya egumi yawa? Iyene ohiloga: “Ddanengesa malabo otene Malebo a Siku na Siku vina ddantanalela. Elemelelo eji ehiddikamihedha ottiya ovizuzumela ddamwinya vina makattamiho addipatta mudhidhene obule.”—Ms. 61:2.

ABALIHU

11. Niniviwamo dhavi nigatanalela ovilela wa abalihu?

¹¹ Yehova onowalabihedha abali na arogora wi anikamihedhe ovilela. Oziwa wi abalihu vamodha na arogora orugunuwa elabo yotene anofwanyiwa makattamiho akakene, enonikuluveliha wi kanili nooka. (1 Pe. 5:9) Mwilaboni yotene, akalawo abali angumanana makattamiho akakene na ehu vina anovilela. Eji entonyihedha wi kintanala makattamiho gani anagumanena iyo, enowodheya ovilela!—Mer. 14:22.

12. Abalihu ananikamihedhe dhavi vina iyo ninawodhe dhavi wakamihedha? (2 Korinto 1:​3, 4)

¹² Abalihu anowodha onikamihedha na ejile enlogani obe enkosani. Murumiwi Paulo wahona ejoya. Dila dhinjene mmakartani mwaye iyene wahitamalela nikamihedho navahiwiye na abali valiye mukambura, vina wahikosa guru ya waloga mazina awa. Abaliya ahimpangarhaza, ahimulibiha vina ahinvaha nikamihedho nafuniye. (Flp. 2:​25, 29, 30; Kol. 4:​10, 11) Masaka abano ninowona elobo yoligana. Nigafunaga nikamihedho wi nivilele, abali ehu anokala na iyo, awene vina agatamelaga nikamihedho iyo ninokala na awene.—Kengesa 2 Korinto 1:​3, 4.

13. Txini emukamihedhile Maya?

¹³ Yaka ya 2020, asupayi o Rússia ahifiya vatakulu va murogora onkuweliwa Maya. Venevo iyene wahittukuleliwa o tribunali sabwa ya ologa esile dhinrumeliye na attu ena. Mudhidhene obo abali ahimpangarhaza venjene Maya. Iyene onologa: “Mudhidhi wakalimi wolemene mpaddi wa muyubuweloni, abali na arogora ahiddiligarela vina ahiddilebela makarta alogaga wi anoddikwela. Miyo ddanziwa wi ddikana anamudhi enjene anddikwela. Mbwenyi oromana yaka ya 2020, ddinowoona okwela oku na mukalelo wa vawoka.”

14. Ninawodhe dhavi opurelamo pama nikamihedho na abalihu? (Koona vina foto.)

¹⁴ Txini enfwanyeliwe okosa? Ogagumanana dhorutxa, okale vakuvi na abali, kukane manyazo okumbirha nikamihedho na anddimuwa a mmulogoni. Awene anodhaga okala ninga “ebarelo nsaka na pevo, ninga thawelo nsaka na mpulo.” (Iza. 32:2) Ottiya ejo, kudduwale wi abali anogumanana dhorutxa dhakakene. Weyo ogamukamihedha mbali ontamela nikamihedho, onowodha woona dhilobodha nopimeleleya vina nofwanyelela, ejo enowukamihedha ovilela.—Mer. 20:35.

NJEDHELO NEHU

15. Njedhelo nimukamihedhile dhavi Yezu vina ninnikamihedha dhavi iyo? (Ahebreu 12:2)

¹⁵ Njedhelo ninnivaha Yehova tta pama vina ninonikamihedha ovilela. (Rom. 15:13) Jijuwene epadduwile na Yezu, iyene wanziwa wi kodhowavi akalaga wororomeleya agahikamihedha okuputta nzina na Yehova. Yezu vina wanjedhela okala wili wirimu na Babe vina agahilamulela vamodha na abalaye. Njedhelo ntti nimukamihedha Yezu ovilela labo nomariha nikwiliye vapingirhizini. (Kengesa Ahebreu 12:2.) Moligana na ejuwene, njedhelo nehu na okalawo namukalakala mwilaboni eswa, ninonikamihedha ovilela makattamiho-makattamihovi angumanihuna masaka abano mwilaboni ejino ya Satana.

16. Njedhelo nimukamihedhile dhavi murogora ovilela vina txini ensunzihu na ejile elogiliye?

¹⁶ Koona njedhelo nokala mwilaboni eswa nimukamihedhile dhavi murogora onkala o Rússia onkuweliwa Alla. Mamunaye wahifugeliwa mukambura oku ajedhaga ottongiwa. Vapadduwilani ejo, Alla ohiloga: “Olobela sabwa ya njedhelo nehu na musogorho vina otanalela, niddikamihedha ohikala wokumuwene. Sabwani ddinoziwa wi dhorutxa esi dhinele ogoma mohigonela. Yehova onele opemberha, iyo vina ninele opemberha.”

17. Txini enfwanyelihu okosa wi nipurelemo njedhelo ninnivaha Yehova? (Koona vina foto.)

¹⁷ Txini enfwanyeliwe okosa? Katamela mudhidhi wi otanalele nipikirhelo notikiniha na musogorho ninikoseli Yehova. Kavubuwele buli mwilaboni eswa vina katanalela mwaha dhotene dhinakaniwena wi okale wohagalala. Makattamiho angumaniwena ovanene ba mudhidhi mung’onovi ogaladdaniha na egumi yohimala enakaniwe mparaizu. (2 Ko. 4:17) Ottiya ejo, kakosa mpaka vanwodheliwe wi wawaddele ena mwaha wa njedhelo ntti. Katanalela ekalelani yorutxa attu ahina njedhelo na musogorho owanana makattamiho a mwilaboni ejino ya Satana. Makani mang’onovi anodhaga wattukulela okana efunelo ya oziwa mwaha wa njedhelo ntti.

18. Ninfwanyelela nni okuluvela mapikirhelo a Yehova?

¹⁸ Mmaleli Job ovilela mwari mwa makattamiho menjene, iyene ohiloga dhahi mwaha wa Yehova: “Miyo ddiziwa wi munowodha dhetedhene, kuli elo-wene ehinwodha nyuwo.” (Job 42:2) Job wahisunza wi kavali elobo enamutximihe Yehova wakwanihedha efunelo yaye. Ebaribari eji enowodha onivaha guru ya ovilela. Katanalela yotagiha eji: Muyana oli muredda okumuwile sabwa ya watamela amediku enjene mbwenyi kawodhile onfwanya mediku ogagomihile eredda yaye. Vasogorhova mediku wa ttotto vina wokuluveleya, onozinddiyela eredda enna muyanaya vina onomutapulelamo wi onele omukamihedha ogomiha ereddaya. Masiki aziwaga wi onele ottukula mudhidhi menjene wi avulumuwe, iyene onoviwamo pama. Enimukamihedha muyana oddu ovilela—njedhelo niniyena nawi onele ovulumuwa. Na mukalelo wakakene, okuluvela wi njedhelo na musogorho ninele wakwanihedheya, enonikamihedha ovilela.

19. Txini enfwanyelihu okosa wi nivilele?

¹⁹ Ninga moonelihu, Yehova ononikamihedha ovilela modhela, nlobelo, Nzu naye, abalihu vina njedhelo nehu. Nigapurelamo pama nikamihedho nimodha-nimodha, ninele woona wi Yehova onelege onikamihedha mmakattamihoni-makattamihovi anagumanena iyo vina ninele owodha ovilela mpaka labo ninagome makattamiho otene antoteya mwilaboni ejino ya Satana.—Flp. 4:13.