Omulabela Yehova Oddidhelana Mareliho Menjene

ANAMUDHI AGA

Ddibaliwe yaka ya 1934. Amambali aga ali anawedda, abudduwile o Suíça wi akale sidadi y’o Timmins, provinsia yo Ontario, o Canadá sidadi mwatibiwa mina. Mwari mwa yaka ya 1939, mmani wahiroma wengesa revista A Sentinela vina wahiroma wona matugumano a Anamoona a Yehova. Iyene wahiddittukulela o Nyumbani ya Omwene miyo vamodha na abalaga atanu na mmodha. Kigonelile mudhidhi mwinjene, iyene wahibatiziwa ninga Munamoona wa Yehova.

Babani kaaziveliwe nne vang’ono sabwa ya Mmani okala Munamoona wa Yehova, mbwenyi Mmani wankwela venjene ebaribari vina wahigana odhowavi akalaga oweddeyana na Yehova. Iyene ohikosa ejuwene masiki mudhidhi wakoddihiwe mabasa a Anamoona a Yehova o Canadá omaromo wa yaka ya 1940. Iyene wanimweddiha Babani noderetu vina na nriho, masiki Babani vahamweddihiye deretu. Yotagiha yaye yapama eddikamihedha vina ehakamihedha abalaga orumela ebaribari. Mowagalaliha-mwene, movira wa mudhidhi, Babani wahitxinja vina wahiroma waweddiha anamudhi otene na opama.

DDIROMAGA MABASA A MUDHIDHI WETENE

Elimwe ya 1950, ddahimona Assembleia Aumento da Teocracia sidadi ya Nova York. Mmalelimi ologa na abali na arogora a dhilabo dhottiyana-ttiyana vina ovuruwana dhotagiha dha abali àkosile Eskola ya Gileadi, miyo ddahikana efunelo ya okosa venjene mmabasani a Yehova! Dhiddaddelilani dhiddagalaliha venjene, venevo ddahigana ovolowa mmabasani a mudhidhi wetene. Mfiyedhimi vatakulu, ddahittikitta petisau ya pionero wa mudhidhi wetene. Beteli y’o Canadá yahakula karta naga addaddelaga wi vamaromo ddanfwanyelela obatiziwa. Venevo ddahibatiziwa labo 1 wa Otuburu wa 1950. Musogorhomwa, ddahidha okala pionero wa mudhidhi wetene vina ddahittomeliwa okamihedha sidadi ya Kapuskasing, aba àli mabasa aga oroma. Sidadi eji yakala wolapela-wene na mburo wakalimi na amudhaga.

Yaka ya 1951, beteli yahakonvidari abale aziwa ologa Efransezi wi avivelele okamihedha provinsia y’o Quebec murudda onlogiwa Efransezi. Murudda obu wanjobeliwa venjene anamalaleya. Miyo ddunuwile ddilogaga Efransezi na Engelezi, nona ddahirumela niwobona vina ddahittomeliwa okamihedha sidadi y’o Rouyn. Wenewale miyo kaddamuziwawo muttu. Ddana nlagiho na mburo wafanyelimi ofiyavo, ninga mulogelimi omaromo. Mbwenyi dhetene ddahedda deretu. Miyo na Marcel nahidha okala amarho ofiyedheya, miyo ddihiziveliwa venjene okamihedha o Quebec mwari mwa vyaka nayi, omagomo wa vyaka esi ddilabile ninga pionero wa vawoka.

GILEADI VINA OKULUVELA ELOBO EHIMPADDUWA OVANANE

Valimi o Quebec, ddahagalala vaddiddi wakela konviti wi ddakose Eskola ya Gileadi turma 26 o South Lansing, Nova York. Labo 12 na Feverero 1956, nali labo nomariha na eskolaya, ddahittomeliwa elabo ovanene okuweliwa Gana,b o Afrika Ocidental. Mbwenyi ddihinatti odhowa wattomiwemi, ddanfwanyelela wiyelela o Canadá wi ddakane dukumento yaddirumeliha odhowa, miyo ddobuwela wi ddigakalilewo “sumana dhing’onovi bahi.”

Mbwenyi ddahidha okala myeri mitanu na minli o Toronto, ddijedhaga dukumentoya. Mudhidhene obu, miyo ddakala vatakulu va anamudhi Cripps, awene àli attu okwela vaddiddi, wenewale ddahimuziwa mwaniwa wa muyana Sheila. Iyo nahiroma ofunana. Vafunimi omukumbirha wila nitelane, dukumento yaga yahibudduwa. Miyo na Sheila nahilobela sabwa ya makani aba vina nahigana wila ddanfwanyela odhowa wattomeliwemi. Vina nahigana wi nigandhowavi nilogaga modhela makarta, nijedhelaga wona akala weddelelana wehu ogahinittukulela otelana. Eji kiyali yogana yovevuwa, mbwenyi mwa ovira wa mudhidhi nahidha wona wi yali yogana yofwanyelela.

Muvireli mweri mmodha ddikosaga oleddo na kumboyu, paporo vina aviau, ddahifiya o Accra, o Gana. Miyo ddahittomiwa ninga nameddelela milogo. Ddanfwanyela weddelela elabo yotene ya Gana vina Costa do Marfim (ddabuno onziwiwa ninga Côte d’Ivoire) vina Togoland (ovano onziwiwa ninga Togo). Masaka menjene, ddakosa oleddo meka ddilabihedhaga karo y’o beteli. Miyo ddanziveliwa wawaredhela abali!

Omagomo wa sumana dhotene, miyo ddankana mabasa mmatugumanoni a murudda. Iyo kanana Nyumba mwakosiwa matugumano a murudda. Nona abali ahimaga alipendra na mirazi vina makubari wi niwodhe okana murunti ogawodhile wabarela abali na nzuwa. Vowi mburo wapiyehu kanana konjeladori, nanattiya anenamaya amentwene nijedhelaga wapa mowiwanana na muttengo wa attu agadhile wona matugumanoya.

Dila dhina mmatugumanoni aba dhampadduwa dhilobo dhoteyiha. Dila dhahi mbali Herb Jennings,c wali misionario, akosaga diskursu yaye ngombe modha yahittawa. Biroma ottamaga osogorho wakosa mbali Herb diskursu yaye. Mbali Herb wahitximiha diskursuya vina ngombeya yahizuzuma vaddiddi. Musogorhomwa abali anayi oliba vaddiddi ahittidha ngombeya vina ahittukulela mburo wattiwani, abali oona matugumanoya ahoba mada.

Vari va sumana, miyo ddanlagiha filimi A sociedade do Novo Mundo em ação mirudda dhowaddamela. Wi ejo ewodheye, ddanlagiha filimiya modhela guwo yotxena yamagimi mmapostini bili obe miri minli. Attu a muruddaya anziveliwa vaddiddi wona filimiya! Mwa enjene, ejile yali dila yoroma yonilani filimi mwigumini mwawa. Awene anoba mada na guru vaddiddi vawonani attu abatiziwaga. Filimi eji ehakamihedha vaddiddi attu wona wi iyo nili nikuru nowiwanana orugunuwa elabo yotene.

Mmalelimi okala vyaka bili o Afrika, ddahagalala venjene wona matugumano a ttattamwa ankosiwa na abali a dhilabo dhottiyana-ttiyana o Nova York yaka ya 1958. Ddahagalala venjene sabwa ya omoona wili na Sheila, wakosile oleddo o Quebec vina ovano walaba ninga pionera wa vawoka. Iyo nanloga modhela karta mbwenyi ovano nahigumana wili, ddahimukumbirha wila nitelane, iyene wahirumela. Venevo ddahimulebela Mbali Knorrd ddinvuzaga akala egahiwodheya Sheila okosa Eskola ya Gileadi vina orumiwa o Afrika wi nilabe vamodha. Iyene wahirumela. Omamalelowa Sheila wahifiya o Gana. Iyo nitelilena o Accra, labo 3 ya Otuburu wa 1959. Iyo nahizinddiyela wi Yehova wahiniruriha sabwa ya omwika vamburoni voroma mwigumini mwehu.

NILABAGA VAMODHA O CAMARÕES

Yaka ya 1961 nahittomeliwa o Camarões. Miyo ddahikana dhilobo dhinji dhokosa sabwani abali ahiddikumbirha wila dhikamihedhe wita filiali eswa. Vowi ddahittomeliwa wang’anela mabasa o Camarões, ddahikana dhilobo dhinji dha osunza. Mbwenyi yaka ya 1965 nahidha ozinddiyela wi Sheila wahikana yari. Yahirutxa ovitanalela nigali ababi. Oziwa wi nigahikana mabasa maswa yahinittiya ozuzumene, mbwenyi oku nivisasanyedhaga wila niyelele o Canadá, yahidha opadduwa elobo yabure vaddiddi.

Mwanaya wahidha okwa ahinabaliwa. Mediku wahinaddela wi wali mulobwana. Vanovira okwaranya vyaka 50, iyo txipo kanidduwalile epadduwile. Masiki nikubanyaga sabwa ya dhipadduwile, iyo nahidhowavi nizuzumelaga mabasa akweletxihu vaddiddi.

Abali o Camarões ahigumanana ofwara-fwariwa sabwa ya ohikosa mpaddi wa politika. Dhilobo dhattabwa vaddiddi nsaka nasakuliwa alamuleli. Elobo yovetxihu yahidha opadduwa labo 13 ya Mayu wa 1970, mudhidhi wakoddihiwe mabasa Anamoona a Yehova elabo ejile. Beteli yehu yokoddela yamalile-wene ofuguliwa, yahifugiwa na guverno myeri mitanu mumaleli iyo omwalelamo. Sumana modha ehinamala, amisionario otene—miyo na Sheila vina—nahittamagihiwa elabo ejile. Kiyali yovevuwa wattiya abali sabwani nanazuzumela venjene. Iyo nannivivuza txini egakosilani ovanene.

Vamaromo iyo nihikala myeri mitanu na modha o beteli y’o França. Wenewo miyo ddanwodha odhowavi ddizuzumelaga dhojombeliwa dha abali o Camarões. Dezemburu ya yakene ejile, iyo nahittomeliwa o beteli y’o Nigéria, yazuzumela mabasa a olaleya o Camarões. Abali o Nigéria ahinakela deretu, iyo nihiziweliwa venjene olaba o Nigéria mwa vyaka dhinjene.

YOGANA YORUTXA VADDIDDI

Yaka ya 1973 nihikosa yogana yorutxa vaddiddi. Sheila wangumanana makattamiho a egumi. Mudhidhi walihu o Nova York mmatugumanoni a ttattamwa, iyene wahiddaddela: “Miyo kaddinawodhe odhowavi na mabasa aba! Ddilema, mudhidhi wetene ddinkala obulelavi.” Iyene wahilaba vamodha na miyo o Afrika ocidental okwaranya vyaka 14. Miyo ddanziveliwana venjene mabasa aye ororomeleya, mbwenyi nanfwanyela okosa matxinjo mang’onovi. Mmalelihu opima makattamiho ehu vina olobela venjene sabwa ya makani aba, nahigana wiyelela o Canadá, wenewo ogawodhilihu ozuzumela deretu egumi ya Sheila. Ottiya mabasa ehu a omisionario vina a mudhidhi wetene, yogana yorutxa vaddiddi ekosilihu mwigumini mwehu.

Mfiyedhihu o Canadá, miyo ddahiwodha ofwanya mabasa na mukwaga dhahi wamuziwilimi vyaka dhinji mundduni, iyene wahikana loja mwagulihiwa karo nafwanyeya sidadi yali vakuvi na Toronto. Iyo nahalugari apartamentu dhahi, nahigula mobiliya dhawale vina nahiwodha omwalelawo se wita mangawu. Iyo nanfuna odhowanavi egumi yovevuwa, nijedhelaga wi na labona niyelele mabasa a mudhidhi wetene. Nahidha otikina, sabwani eji yahipadduwa mudhidhi wahajedhelihu.

Ddahivivelela wi ddikamihedhe Masabuddu otene mabasa a omaga Nyumba ya Matugumano a Murudda o Norval, Ontario. Na mudhidhiya, ddahittomeliwa okamihedha ninga musogorheli wa Nyumba ya Matugumano a Murudda. Sheila wahiroma ovulumuwa, nona iyo nahigana wi nigahiwodha wakwaniha mabasaya. Venevo Junyu wa 1974 nahimwala. Nahagalala venjene wiyelela mabasa a mudhidhi wotene!

Mowagalaliha-mwene, Sheila wandhowavi avulumuwaga. Vyaka bili musogorho, iyo nahigana orumela mabasa a anameddelela milogo. Muruddaya wali Manitoba, o Canadá, waziwiwa ninga murudda waridha vaddiddi. Mbwenyi, iyo nanziveliwa vaddiddi okala na abali vina arogora a murudda obule àli okwela vaddiddi. Nihisunza wi kintanala mburo onimulabelihu Yehova—eli yamakamaka ja odhowagavi nimulabelaga, kintanala mburoya.

DDIHISUNZA ELOBO YAMAKAMAKA

Muvireli vyaka dhinjene nilabaga ninga anameddelela milogo, nahiwobiwa wi nakamihedhe o Beteli y’o Canadá yaka ya 1978. Mudhidhi mung’onovi musogorhomwa, ddahidha osunza elobo yamakamaka vaddiddi yahali yovevuwa. Ddahittomeliwa okosa diskursu ya wora modha na meya na Efransezi va matugumanoni a vawoka o Montreal. Mokubanyiha-mwene, attuyamo kawodhile ononelamo diskursu yaga, nona mbali dhahi wa Mparha wa Mabasa w’o Beteli wahiddivaha malago sabwa ya mukalelo wakosilemi diskursuya. Wi ddiloge ebaribari ddanfwanyela ozinddiyela wi kaddili namakosa diskursu wapama. Miyo kaddakelile nlagona na mukalelo wapama. Ddahisilidhiwa sabwani ddobuwela wi mbaliya wadhile oddipambiha bahi ottiya odditamalela. Miyo ddahivonya sabwa ya ottonga malagoya mowiwanana na mukalelo wavahiwemi vina monelo waga mwaha wa muttuya waddivahile malagoya.

Malabo mang’onovi musogorhomwa, musogorheli mmodha wa Filiali wahidha ologa na miyo sabwa ya ejile epadduwile. Miyo ddahirumela wi kaddakelile na mukalelo wapama malagoya avahiwemi vina ddahiloga wi ddankubanya vaddiddi na dhapadduwile. Venevo ddahiloga na mbaliya waddivahile malagoya. Na opama iyene wahiddilevelela. Nipadduwo ntti nihiddisunziha elobo ehinadduwalimi, okala muttu woviyeviha. (Gano 16:18) Miyo ddimulobelela venjene Yehova ddimukumbirhaga okala muttu woviyeviha. Ddinfuna ddikose mpaka munwodhelimi wi ddinaakele malago anvahiwimi na mukalelo wabure.

Ddinokamihedha o Beteli y’o Canadá okwaranya vyaka 40, oromana yaka ya 1985, ddihikana gari ya okamihedha ninga Musogorheli wa Filiali. Mwadhaga wokweleya Sheila okwile Feverero wa 2021. Ottiya owanana odhugudheya sabwa ya omuyelela mwadhaga wokweleya, ddinogumanana vina makattamiho a egumi. Mbwenyi sabwa ya ozuzumela mabasa a Yehova ddinowagalala, mwa dhawene kaddinubuweletxa malabo mang’onovi ankalimi mwilaboni. (Koh. 5:​19, [Koh. 5:20 NM]) Masiki mugumanilemina makattamiho menjene mwigumini mwaga, dhihikalawo dhilobo dhinjene dhinddittiya owagalalene. Omwika Yehova vamburoni voroma mwigumini mwaga vina ovira vyaka 70 mmabasani a mudhidhi wetene ohiddidhelana mareliho menjene. Miyo ddinolobela wi abalihu na arogora ali azombwe adhowegevi amwikaga Yehova vamburoni voroma mwigumini mwawa, vowi ddihikana nikuluvelo wi awene anele okana mareliho menjene vina wagalala, esuwene dhinwodheya sabwa ya omulabela Yehova.