Egumi Yotene Nisunzihiwaga na Namasunziha Wehu Munddimuwa-nddimuwa

YOTAGIHA YA AMAMBALI AGA

Omamalelo wa yaka ya 1950, amambali aga ahimwala w’Itália badhowa o Canadá wi akale sidadi ya Kindersley, provinsia ya Saskatchewan. Musogorhomwa awene ahisunza ebaribari vina ebaribariya yahidha okala elobo yamakamaka mwigumini mwehu. Ddinowubuwela wi valimi mwana ddambudduwa malabo menjene mmalaleyoni vamodha na anamudhi aga, dila dhina miyo ddinovegaga ddilogaga wi ddali “pionero wokamihedha” vanimina vyaka tanu na ttaru dhobaliwa!

Amambali aga àli ayelegi; masiki dhawene awene ahikosa guru enddimuwa wila amulabele Yehova vina ahiddittiyedha yotagiha yapama. Motagiha, yaka ya 1963 awene ahiguliha dhilobo dhinjidhene dhanani wi agumele kobiri wila adhowe oone kongresu onkosiwa vamodha na dhilabo dhina o Pasadena, California, Estados Unidos. Musogorhomwa, yaka ya 1972 iyo nahimwalela sidadi y’o Trail, provinsia ya Colúmbia Britânica o Canadá, sidadi eji yalapelane makilometuru 1.000 na mburo wakalihu, yoganaya yali ya wakamihedha attu aloga Italiano akala murudda obule. Mabasa a babani àli a okuputta vina ovenyihedha musika. Dila dhinjene iyene wahikodda ovahiwa mabasa mena sabwani wanfuna ozuzumela mabasa omuyani.

Ddinotamalela vaddiddi sabwa yotagiha enittiyedhile amambali aga, miyo na abalaga araru. Awene ahiroma oddishagiha mmabasani a Yehova vina ahiddisunziha elobo yamakamaka vaddiddi ejuwene enddikamihedha mpaka ovanene: Miyo ddigeeka Omwene wa Mulugu vamburoni voroma, Yehova onelege oddikoya.—Mt. 6:33.

NIROMAGA MABASA A MUDHIDHI WOTENE

Yaka ya 1980, ddahimutela Debbie, murogora wokoddela vaddiddi wazuzumela mabasa a Yehova. Iyo nanfuna ovolowa mmabasani a mudhidhi wotene, nona myeri miraru mmalelihu otelana, Debbie wahiroma olaba ninga pionera. Yaka modha mmalelihu otelana, nahimwalela mulogo wajombeliwa anamalaleya vina miyo ddahiroma olaba ninga pionero.

Na mudhidhiya, nahidha orimeliwa wagalala mmabasani mwehu vina nahubuwela ottiya mabasaya. Mbwenyi vamaromo iyo nahiloga na nameddelela milogo. Na okwela wahinaddela ebaribari, iyene wahiloga: “Nyuwo munokosiha makattamiho enyu okala ottabwa. Munozuzumela bahi makattamiho angumaninyuna. Nyuwo mugatamela dhilobo dhinudhelanina wagalala mmabasani mwenyu munele ofwanya.” Nlago ntti nifiyile mudhidhi wofwanyelela. (Ms. 141:5) Momaguva-mwene iyo nahitxinja monelo wehu vina nahizinddiyela wi dhahikalawo dhilobo dhinji dhapama mmabasani mwehu. Enji mmulogoni anfuna omukosela venjene Yehova, otaganyiha na aima vina arogora ateliwe na alobwana ahili Akristu. Iyo nihisunza ozuzumela dhilobo dhapama dhinnipadduwela vina okuluvela wi Yehova onowodha ogomiha makattamiho ankala ninga orutxa vaddiddi. (Mik. 7:7) Iyo nahiyelela okaana wagalala mmabasani mwehu vina dhilobodha dhahidha otxinja.

Anamasunziha ehu a eskola yoroma ekosilihu ya apionero ahilaba dhilabo dhina. Awene ahinilagiha mafoto mang’onovi, ahinaddela mareliho vina dhorutxa dhigumanilanina mmabasani mwawa. Ejo ehinittukulela okana efunelo ya olaba ninga amisionario. Nona nahimetxa yogana eji.

Wi nifware ttarho yoroma vina nitagihe vang’onovi egumi ya amisionario, yaka ya 1984 nahimwalela provinsia y’o Quebec, wenewo onlogiwa Enfransezi. Provinsia eji elapelana makilometuru 4.000 na Colúmbia Britânica. O Quebec, iyo nanfwanyela olemelela mweddelo vina elogelo eswa. Makattamiho mena àli a wi iyo kanana kobiri yinjene. Mwari mwa mudhidhene, yana iyo wila nije yali bambaya wamuttiya namalima dhahi wi nimuttukule iyene agamala omutiba. Debbie wanziwa oviparhapattela vina iyene wampiya dhoja dhoziwa na bambaya oddule! Masiki na makattamiho, iyo nahikosa mpaka mwawodhelihu wi nivilele nowagalala. Yamakamakaya jawi nanwodha wona wi Yehova wela onikoya.—Ms. 64:10.

Labo dhahi, mohijedheleya-mwene nahiligareliwa. Yali konviti wi nakamihedhe Beteli y’o Canadá. Masiki iyo nikanaga wagalala sabwa ya okonvidariwa, nahikubanya sabwani nahittikitta petisau wi nakose Eskola ya Gileadi. Masiki dhawene nahigana orumela konvitiya. Mfiyelihu o Beteli nahinvuza Mbali Kenneth Little, musogorheli mmodha wa Filiali, “Ninakose eni nigakonvidariwa wi nakose Eskola ya Gileadi?” Iyene wahakula, “Kamuzuzume, ejo egapadduwa ninele wona yokosa.”

Jijuwene-wene edhile opadduwa sumana modha musogorhomwa. Miyo na Debbie nahikonvidariwa wi nakose Eskola ya Gileadi vina nanfwayela okosa yogana. Mbali Little ohiloga: “Kintanala yosakula enakosinyu, dila dhina munele wubuwela wi mwanfwanyela okosa yosakula yottiyana. Kintanala yosakula enakosinyu Yehova onele oruriha.” Iyo nahirumela konviti wi nakose Eskola ya Gileadi vina mwa ovira wa vyaka nihona wi mazu a Mbali Little àli ebaribari. Dila dhinjene nanavaha malago akakene abale afuna osakula mabasa gani afwanyelani omuttiddela Yehova.

NILABAGA NINGA AMISIONARIO

Nahagalala vaddiddi okosa mpaddi wa anamasunza 24 a turma 83 ya Eskola ya Gileadi ekosiwe o Brooklyn, Nova York, eromile Abrili wa 1987. Anamasunziha ehu àli mbali Ulysses Glass na Jack Redford. Myeri esile mitanu dhivirile momaguva, nipulihile eskolaya labo 6 ya Setemburu wa 1987. Nihittomeliwa olaba o Haiti, vamodha na John vina Marie Goode.

Oromana yaka ya 1962 elabo y’o Haiti kiyawakela amisionario akosile Eskola ya Gileadi. Vavirile sumana ttaru mmalile miyo na Debbie okosa Eskola ya Gileadi, nahirumiwa wi nakamihedhe o Haiti. Mulogo wehu wanna anamalaleya awakwana 35 vina wakala murudda worutxa ofiyawo wenewo wali myango dhinjidhene. Iyo nali azombwe, kanana ttotto yinjene vina nakalavo nooka ntakulu na amisionario. Attuya a muruddaya àli ayelegi vaddiddi vina enjiya kaziwa wengesa. Mudhidhi okalilihu o Haiti nampattiwa na koddo, olupeliwa wa guverno, manifestasau vina pevo ya mutokora.

Iyo nihisunza venjene na ovilela vina wagalala wa abali na arogora o Haiti. Enji mwa awene ahikana egumi yorutxa, mbwenyi annimukwela Yehova vina mabasa a olaleya. Ddinomubuwela murogora wowunuwelavo wahaziwa wengesa; mbwenyi iyene wanubuwela malebo a mBibiliani awakwana 150. Mikalelo dhorutxa dha elabo ejile dhahinikosiha okana efunelo ya odhowavi nilaleyaga miselu dha Omwene obuwene onawodhe ogomiha makattamiho otene a nlogo na attu. Kinwodheya ologa wagalala wakanilihu sabwa ya oziwa wi anamasunza ehu oroma ahidha okala apionero a mudhidhi wotene, apionero a vawoka vina anddimuwa a mmulogoni.

O Haiti ddahimuziwa muzombwe onkuweliwa Trevor, wali misionario wa kapela dhahi enkuweliwa Mormon, dila dhina nanloga mwaha wa Bibilia. Motikiniha-mwene mvirile vyaka dhing’onovi ddahakela karta naye naloga dhahi: “Miyo ddinele obatiziwa asembeleya onaddamela! Ddinfuna ddiyele o Haiti ddakamihedhe ninga pionero wa vawoka mburo wakakene olabilemi ninga misionario wa kapela ya Mormon.” Jijuwene ekosiliye mwari mwa vyaka dhinjene vamodha na mwadhiye.

EUROPA VINA MUSOGORHOMWA O AFRIKA

Iyo nahirumiwa wi nakamihedhe dhilabo dhina dha Europa, wenewo wahakoddihiwa mabasa ehu. Yaka ya 1992 nahifiya o Liubliana, o Eslovênia sidadi yali vakuvi na okule wunuwile amambali aga ahinatti omwalela o Italía. Mudhidhene obule sidadi ya Lugoslávia yawale wanrabiwa koddo. Beteli y’o Áustria, o Viena, y’o Croácia, o Zagreb vina y’o Sérvia, o Belgrado, yansogorhela mabasa a olaleya murudda obule. Mbwenyi ovano, kadda elabo egahikana Beteli yawa.

Okala o Eslovênia yatapulela osunza elogelo eswa vina yeddelo eswa. Attuya anloga dhahi, “Jezik je težek,” entapulela “Elogeloya jorutxa.” Yali yorutxa-wene! Nahitikina venjene wawona abali akalaga omala-nawale wi arumele matxinjo a munikuruni na Yehova vina nahoona mukalelo warurihile Yehova. Wili, nahiwodha wona wi Yehova onosisigula makaniya na okwela vina mudhidhi wofwanyelela. Dhilobo dhisunzilihu wale nimulabelaga Yehova dhinikamihedha ovilela o Eslovênia vina nahisunza dhilobo dhina dhiswa.

Mbwenyi matxinjoya kagomeli venevo. Yaka ya 2000 nahittomeliwa okamihedha o Costa do Marfim o Afrika. Venevo mweri wa Novemburu wa 2002, sabwa ya koddo nahittawela o Serra Leoa. O Serra Leoa dhilobodha dhahifwasa vang’onovi sabwani koddo egonelile vyaka 11 yela ogoma-wene. Kiyali yovevuwa obudduwa o Costa do Marfim na namaguve. Mbwenyi dhilobo dhasunzilihu dhahinikamihedha okanavi wagalala.

O Serra Leoa attu enjene anfuna osunza ebaribari, abaliya àli okwela vina ahivilela koddo mwari mwa vyaka dhinjene, nona iyo nafwaseyele dhilobodhene esile dhapama. Masiki abaliya akalaga ayelegi, awene anziveliwa ogawelana dhanani. Murogora dhahi wahinvaha Debbie guwo dhowabala. Debbie wahikana manyazo a wakela, mbwenyi murogoraya wahimudidela alogaga: “Mudhidhi wa koddo abali a dhilabo dhina ahinikamihedha. Ovano mudhidhi wa iyo okosa yakakene.” Miyo na Debbie nahigana ofwara yotagiha yawa.

Na mudhidhiya nahiwodha wiyelela o Costa do Marfim, mbwenyi dhilobodha dhahittabwa wili. Venevo, mweri wa Novemburu wa 2004, iyo nahittawa, nahidhowa na aviau mburo wakala anyakoddo o França, muttu-muttu wa iyo wattukulile mala alemela kilo 10 bahi. Nagonile venevale vati, siku nafwarela nahiwela aviau wadhowa o Suíça. Nafiyile o Beteli vari va mattiyu, mbwenyi abali asogorhela Filiali, anamasunziha a Escola de Treinamento Ministerial vina awadhawa ahinakela na okwela onddimuwa, ahinikubatta, ahinivaha dhoja vina chocolate w’o Suíça. Iyo nahagalala vaddiddi.

Nahikala mudhidhi mung’onovi nikamihedhaga o Gana, musogorhomwa nahiwodha wiyelela o Costa do Marfim mmaleli ovuguwa koddo. Opama wa abali ohinikamihedha ovilela midhidhi esi dhorutxa vina matxinjo a mabasa ehu. Miyo na Debbie nahoona wi okwela oku wa abali onowoneya venjene munikuruni mwa Yehova, mbwenyi ejo kinlagiha wi ninofwanyela ottiya ovaha ttima esile dhinkosela abali. Na mudhidhiya nahizinddiyela wi mudhidhi obule worutxa ohikosa mpaddi wa oshagihiwa wehu.

DHILABO DHO ORIENTE

Yaka ya 2006 nahakela karta nadha o katti enddimuwa naloga wi nigahikana mabasa maswa, dila eji nigadhowile elabo y’Oriente. Wili, nigahigumanana dhilobo dhiswa, dhorutxa vina nigahifwanyela olemelela dhilogelo dhiswa vina yeddelo eswa. Nanziwa wi yanfuneya osunza dhilobo dhinjidhene mwilaboni mpule mwali makattamiho menjene mpaddi wa politika vina wa relijiau. Yali elobo yapama wona dhilogelo dhottiyana-ttiyana dhalogiwa mmilogoni. Yanoneya wi masiki na ottiyana wa dhilemelelo, abali àli awiwananeyene sabwani anfwara malago a munikuruni na Yehova. Iyo nanatikina venjene abali sabwani àli oliba murima vina anwanana ofwara-fwariwa na anamudhi, anamwanddamani, akwawa oskola vina omabasani.

Yaka ya 2012 nahidhowa omoona kongresu wa vawoka o Tel Aviv, o Izrayel. Aba àli matugumano oroma manddimuwa a nlogo na Yehova mwilaboni ejile mvirile Pentekosti wa 33 nsaka na Kristu. Aba àli matugumano ohidduwaleya!

Vyaka dhikamihedhilihu wenewale naharedhela elabo dhahi enkoddihiwa mabasa ehu. Nahittukula manivuru mang’onovi, nahidhowa mmabasani a olaleya vina nahoona matugumano a asembeleya. Dhipaddi dhotedhene nanawona anyakoddo na futti dhawa vina mimburo dhinji dhowang’aneliwa. Vowi nankala txenjewa vina nanedda vamodha na abali, nankala obareleyene.

NIHIYELELA O AFRIKA

Yaka ya 2013 nahakela mabasa ottiyana—nahittomeliwa okamihedha filiali y’o Kinshasa, Congo, elabo yokoddela vaddiddi mbwenyi yapattiwe na oyelega onddimuwa vina koddo. Omaromo nahubuwela dhahi, “Iyo ninoziwa o Afrika; nona kinanirutxe okalawo.” Mbwenyi nahisunza dhilobo dhinji wenewale, makamaka muleddoni, vowi elabo ejile kiyana rampa dhaderetu vina ponti. Nihoona dhilobo dhapama wenewale, motagiha abali ahivilela nowagalala. Masiki na makattamiho a oyelega awene ankwela mabasa a olaleya, anivilibihedha wona matugumano vina asembeleya. Nihoona na mento ehu wi wunuwa wa mabasa ewodheyile sabwa ya nikamihedho vina maruriho a Yehova. Vyaka dhikamihedhilihu o Congo dhihinisunziha dhilobo dhinji dhamakamaka vina dhinivaha amarho adhile okala anamudhi ehu.

Omamalelo wa yaka ya 2017, nahakela mabasa mena maswa o Joni—eji filiali enddimuwa opitta dhina dhikamihedhile iyo vina mabasa akelilehu àli maswa mwa iyo. Nona wili, nahikaana dhilobo dhinji dha osunza, mbwenyi dhilobo dhasunzilihu wale dhahinikamihedha. Vafiyelihu okuno nihiziveliwa waziwa abali anvilela mwari mwa vyaka dhinjene mmabasani a Yehova. Jotikiniha wona mukalelo onlaba anamudhi o Beteli na wiwanana masiki akalaga a dhilabo vina dhilemelo dhottiyana. Adhari a Yehova anovilibihedha okana mweddelo muswa vina ovirihamo magano a mBibiliani. Yodhelavoya, Yehova onowaruriha na murenddele.

Mwa ovira wa vyaka, Debbie na miyo nihakela mabasa otikiniha, niviparhapattela yeddelo eswa vina nihisunza dhilogelo dhiswa. Kiyali yovevuwa, mbwenyi nihoona okwela woweddeyana wa Yehova modhela nikuru naye vamodha na abalihu. (Ms. 144:2) Kaninaganyedha wi mabasa a mudhidhi wotene ahinikamihedha okala adhari apama a Yehova.

Ddinotamalela vaddiddi dhotedhene dhiddisunzihile amambali aga, nikamihedho niddivahile mwadhaga wokweleya Debbie vina dhotagiha dhapama dhakelilemi dha abali orugunuwa elabo yotene. Nitanalelaga dha musogorho nihigana odhowavi nisunzihiwaga na Namasunziha wehu Munddimuwa-nddimuwa.